4 perditesime
23:46

Çitaku: Zgjedhjet e 17 tetorit sollën ribalancim të skenës politike

Nënkryetarja e PDK-së, Vlora Çitaku, ka thënë se zgjedhjet e 17 tetorit kanë sjellë një ribalancim të skenës politike në Kosovë, ndonëse ato ishin lokale.

“Ishte një riekuilibrim i skenës politike kosovare. Qytetarët e Kosovës kanë votuar për kandidatët që kanë besuar se janë më të mirët e më kompetentët. PDK-ja nuk e ka fyer elektoratin, por atij i ka ofruar kandidatë kompetentë, e mbi të gjitha ishte fitore e tyre”, ka thënë Çitaku në Intearktiv të KTV-së.

Ajo ka thënë se në balotazh më 14 nëntor presin rezultate të mira, por ka thënë se është e lënduar me rezultatin në Prishtinë të kandidatit të PDK-së për kryetar Uran Ismaili. Ismaili doli i treti, ndërsa në balotazh në Prishtinë janë Arben Vitia i VV-së e Përparim Rama i LDK-së.

“Nëse ka konsensus për këto zgjedhje, është se Uran Ismaili ka pasur fushatën më të mirë, jo vetëm në këto zgjedhje lokale, por edhe në gjitha zgjedhjet në Kosovë. Ka qenë energjik, i drejtpërdrejt e ka pasur ofertë konkrete”, ka thënë Çitaku.

Çitaku ka shtuar se ka qenë një koktej i arsyeve që ka çuar në ngritjen e PDK-së në zgjedhjet e 17 tetorit.

Ajo thotë se nëse është mësuar diçka nga zgjedhjet nacionale të 14 shkurtit, atëherë ishte se nuk duhet të jenë arrogantë.

“Është koktej i arsyeve. Sigurisht se PDK-ja i është nënshkruar një reforimi në nivel qendror, rifreskimi. Kemi synuar që kompetencën ta kemi kryefjalë të këtyre zgjedhjeve. Jemi munduar t’i ofrojmë qytetarëve kandidatë kompetentë”, ka thënë Çitaku.

Ajo ka thënë se ende nuk ka filluar të diskutohet për koalicion për balotazh, por ka thënë se për çdo gjë do të diskutohet me kandidatët.

23:37

Çitaku: E mbështesim fuqimisht Kurtin, nuk i bëjmë opozitë për dialogun

Nënkryetarja e PDK-së, Vlora Çitaku, ka thënë se Qeveria e Kosovës duhet të ndjekë rekomandimet e Gjykatës Kushtetuese për asociacionin e komunave serbe dhe ky të bëhet vetëm bazuar në ato rekomandime.

“Pjesë e marrëveshjes së Brukselit ka qenë po ashtu që ajo për asociacionin t’i dërgohet Gjykatës Kushtetuese. Gjykata ka dhënë rekomandimet dhe qeveria duhet ta implementojë. S’ka pjesë ekzekutive asociacioni, në marrëveshje nuk ka nivel të tretë dhe aty thuhet se do duhet të shkojë në rishikim në gjykatë dhe në bazë të rekomandimeve të saj të bëhet. Qeveria duhet ti përmbushë obligimet ndërkombëtare, qeveria i ka rekomandimet e kushtetueses, ti marrë ato dhe mbi bazën e tyre të veprojë, asnjë hap më tutje”, ka thënë ajo.

Çitaku tha se klasa politike duhet të punojë për qëllimet e përbashkëta, si dialogu. Shtoi se kryeministrit Albin Kurti PDK-ja nuk i del në kundërshti dhe se e mbështesin në qëndrimin për ta ruajtur shtetësinë.

“Mendoj që ne duhet të ulemi bashkarisht si klasë politike, bashkarisht të vendosim disa vija të kuqe. Ne pajtohemi qind për qind me Kurtin, e mbështesim fuqimisht, ai ka thënë që ne duhet të synojmë që pashmangshëm të ruajmë Kosovën e 17 shkurtit. Ne nuk do t’i bëjmë opozitë Kurtit për dialogun. Ne do ta mbwshtesim qeverinë e Kosovës në përmbylljen e këtij procesi, nuk do ti bëjmë pengesa irracionale”.

Ajo ka thënë se marrë parasysh veprimet e serbëve në veri së fundmi, Kurti nuk veproi në standardet që vetë i ka bërë. Sipas Çitakut, Kurti duhej të shkarkonte ministrin e Qeverisë, Goran Rakiq.

“Ne kemi parë Kurtin të shkarkojë ministra për shumë më pak, ndërkohë që ka pasur tolerancë për ministrin Rakiq. Bazuar në standardet që ka vënë ai vetë Kurti, ai ka shkakruar ministra për shumë më pak. Problemi ynë nuk është me serbët, problemin e kemi me Beogradim. Deri sa ta zgjidhim përfundimisht, të kemi njohje reciproke, Serbia do të tentojë të instrumentalizojë pakicën serbe në Kosovë”.

23:24

Çitaku: Kosova po bie pre e dramave të Vuçiqit

Nënkryetarja e PDK-së, Vlora Çitaku, ka thënë se Qeveria e Kosovës është duke rënë pre e melodramave të presidentit të Serbisë, Aleksandar Vuçiq.

Çitaku në Interaktiv të KTV-së ka thënë se Vuçiq vazhdimisht gjatë procesit të dialogut ka bërë drama të tilla, por me rëndësi është të mos bihet në kurthe të tij.

“Dallimi tash është se këtu po glorifikohen dramat e Vuçiqit. Drama të tilla Vuçiq ka bërë vazhdimisht. Isha prezentë vet në ato takime. Nuk është korrekte me i shpalos, ndoshta i shpalos kur boto memoar. Është grackë që vendos Vuçiq vazhdimisht, e luan rolin e viktimës. Hyni në arkivat tuaja, pas çdo takimi të dialogut, ai thotë se ka qenë takim i vështirë, betejë e rëndë, i konvenon atij të luajë rolin e viktimës. Do që sot Serbinë ta portretizojë si lojtarin konstruktiv, e këtë e ka bërë vazhdimisht. Se gjoja Serbia po mbështetet për mur e ka shumë pozitën e rëndë. Ne nuk duhet rënë në grackën e tij. Ai bën melodrama vazhdimisht. Duhet të luajmë rolin tonë. Me rëndësi është që Kosova nuk e ka luksin të marrë koston e dështimit të procesit, së paku jo për folklorizma të panevojshëm”, ka thënë Çitaku.

23:08

Çitaku: Pa përfshirje të SHBA-së në dialog Kosova do të jetë e cunguar

Nënkryetarja e PDK-së dhe ish-ambasadorja e Kosovës në SHBA, Vlora Çitaku, vlerëson se pa përfshirjen e drejtpërdrejt të SHBA-së në dialogun Kosovë – Serbi, Kosova do të jetë e cunguar.

Çitaku ka thënë se shpreson që Qeveria e Kosovës të ketë kuptuar këtë më në fund.

“Shpresoj që Qeveria sot i ka lexuar drejtë mesazhet nga Brukseli. Në kohën kur unë e partia që përfaqësoja bënim thirrje të zëshme që pashmangshëm e me çdokusht të kërkohet përfshirja amerikane në proces, kryeministri Kurti thoshte që Kosova se ka fqinje as Meksikën e as Kanadanë. Kryeministri i Kosovës duhet ta ketë të qartë se pa përfshirjen e drejtpërdrejt të SHBA-së, Kosova do të jetë e cunguar në këtë proces. Unë me tërë respektin e konsideratën e them edhe nga përvoja, Kosova nuk e ka luksin që ta përjashtoi SHBA-në nga procesi i dialogut”, ka thënë Çitaku në Interaktiv të KTV-së.

Ajo thotë se nuk e ka dëgjuar kryeministrin Kuti të ketë kërkuar publikisht përfshirjen e SHBA-së në dialog, ndonëse ka mundur të kërkojë një gjë të tillë nëpërmjet qarqeve diplomatike.

“Edhe sot në Kuvendin e Kosovës pamë disa deklarata jo të mençura në raport me SHBA-në nga ana e Qeverisë. Megjithatë shpresoj që ata ta kenë kuptuar se pa SHBA-në e përfshirë drejtpërdrejt në procesin e dialogut, do të jemi të cunguar. Sepse BE-ja ka qëndrim neutral karshi statusit të Kosovës për shkak të pesë vendeve anëtare që nuk na kanë njohur”, thotë Çitaku.

Çitaku ka thënë se duhet insistuar me çdo kusht përfshirja direkte e SHBA-së ndonëse mund të ketë rezistencë.

“E di se BE-ja mund të ketë rezistencë, mund të ketë prirje të thuhet e të mendohet se kjo është çështje evropiane e duhet kryer pa SHBA-në. Por duhet të mbrojmë e promovojmë interesat tona të Republikës sonë. Kryeministri Kurti nga nesër, sidomos pas këtij Raporti, duhet të kuptojë se miku ynë i përhershëm është SHBA-ja. BE-ja për shkak të kontekstit të brendshëm është neutrale. BE është edhe Gjermania. Gjermaninë e kemi aleat të fuqishëm. Por BE-ja si tërësi, si mekanizëm, është e rezervuar karshi statusit të Kosovës për shkak të mërnyrës si funksionon me konsensus, për shkak të pesë vendeve që nuk e kanë njohur Kosovën”, ka thënë Çitaku.

Ajo ka shtuar se ka pasur vazhdimisht lëvizje të pozicioneve të Qeverisë së Kosovës karshi dialogut.

“Dialogu është i rëndësishëm. Ne sio opozitë sot nuk do të gabojmë si opozita e kaluar. Nuk ka kohë për të humbur. Duhet synuar që sa më parë të përmbyllim procesin e dialogut me njohje reciproke. Në këtë pikë e kemi mbështetjen e palëkundur të SHBA-së dhe disa vendeve të BE-së”, ka thënë Çitaku.

23:04

Çitaku: Edhe BE-ja ka nevojë për një raport progresi për mospërmbushjen e premtimeve karshi Kosovës

Nënkryetarja e Partisë Demokratike të Kosovës, Vlora Çitaku, ka kritikuar pjesë të raportit të Progresit të BE-së për Kosovën. Në Interaktiv të KTV-së, ajo ka thënë se për një raport të tillë ka nevojë edhe Bashkimi Evropian.

“Jo vetëm Kosova ka nevojë për Raport të Progresit, por ndoshta edhe BE-ja ka nevojë për një raport progresi në raport me zgjedhimin dhe mospërmbushjen e premtimeve të dhëna karshi Kosovës. Është absurde që më 2021 ende flasim për liberalizimin e vizave, Kosova i ka përmbushur të gjitha kriteret”, ka thënë ajo.

Sipas Çitakut, ky raport këtë vit nuk ndryshon fare nga raportet e kaluara, teksa tha se ka një vërejtje shqetësuese për Kosovën.

“Komisioni Evropian ka shfaqur pafuqinë e vet në raport me vendet anëtare të BE-së. Ne duhet të marrim vërejtjet, t’i shndërrojmë në hapa veprimi. Ky raport nuk ndryshon fare nga raportet e mëhershme, megjithatë është një vërejtje shqetësuese në këtë rast që ka të bëjë me pavarësinë e gjyqësorit. Për herë të parë në një formë të tillë Komisioni Evropian sugjeron se mënyra se si Qeveria e Kosovës i është qasur vetingut është e padobishme, pra ka mospajtueshmëri për modelin”.

Çitaku shtoi se Qeveria nuk duhet të ketë dorë fare në procesin e vetingut, pasi sipas saj ky proces “duhet të bëhet nga komisione dhe mekanizma që janë të pavarur”.