Fatime Imeri-Berisha, bakteriologia kosovare e cila jeton dhe vepron në Cyrih të Zvicrës, ka deklaruar se vaksina aktualisht është mjeti më efikas në luftën kundër COVID-19.
Sipas saj, vaksinimi është e vetmja rrugëdalje për të dalë nga situata me këtë pandemi.
Në një paraqitje direkte në “60 Minuta” të KTV-së, ajo ka thënë se vaksina ka qenë përherë një çështje që ka shkaktuar polarizim të shoqërisë.
“Vaksina është një temë shumë emocionale e cila shkakton polarizim të shoqërisë. Në kuptimin e ngushtë vaksina nuk është ndonjë ilaç por një produkt medicinal e cila në bashkëpunim me sistemin tonë imunitar shkakton imunizim. Vaksina tani për tani është mjeti më efikas në luftën kundër COVID-19, dhe mendoj se do të jetë rrugëdalja e vetme për të dalë nga kjo situatë”, është shprehur Imeri-Berisha.
Ajo ka bërë të ditur se në Zvicër gjendja me koronavirus aktualisht është stabilizuar, duke rënë numri i të hospitalizuarve dhe po ashtu numri i rasteve pozitive.
Sipas saj, mosha mesatare e të vdekurve në Zvicër si pasojë e COVID-19 është mbi 70 vjeç, ndërkohë që ka shtuar se varianti Delta po dominon atje me 98% të rasteve ditore pozitive.
-
17 shtator 2021 19:38
-
Shpërndaje në: