Arbëri

Kërkohet kontrollim i rreptë i respektimit të masave e ndëshkim i shkelësve

Kërkesë për kontrollim të rreptë të respektimit të masave dhe ndëshkim të shkelësve të tyre, ka bërë kryeministri Albin Kurti në mbledhjen e parë të Komitetit për koordinimin dhe vlerësimin e situatës me pandeminë.

Siç ka njoftuar Qeveria e Kosovës, në këtë takim, Kurti ka kërkuar nga anëtarët e Komitetit të përqendrohen kryesisht në vendet e ambientet ku ka ngjarje superpërhapëse.

“Në mënyrë që zbatimi i masave të jetë sa më i përpiktë, kërkoj nga ju të shfrytëzoni të gjitha resurset të inspektimit që keni në dispozicion, duke përfshirë inspektorët e AUV-it, inspektorët e MINT-it (sidomos inspektorët e tregut), inspektorët komunalë dhe Policinë e Kosovës”, u tha kryeministri anëtarëve të Komitetit.

Në anën tjetër, kryesuesi i këtij Komiteti, ministri i Shëndetësisë, Arben Vitia, ka përsëritur se në Kosovë po dominon varianti Delta që shpërndahet shumë më shpejt.

Ministri i Punëve të Brendshme, Xhelal Sveçla, ka njoftuar se Policia e Kosovës është mobilizuar “në mbikëqyrjen e zbatimit të masave dhe nga sot edhe Inspektorati Policor të Kosovës, i cili do të mbikëqyrë përmbushjen e detyrimeve të Policisë, nëpërmjet monitorimit të pjesëtarëve të Policisë në raport me masat e ndërmarra nga Qeveria e Kosovës”.

“Tashmë çdo zyrtari policor ka filluar t’i shpërndahet kopja e ligjit për COVID dhe vendimi i fundit i Qeverisë në mënyrë që secili prej tyre të jenë të informuar mbi këtë ligj dhe këtë vendim. Po ashtu ka nisur zbatimi i vendimit për zgjatjen e orarit të punës për zyrtarë policorë nga 8 në 12 orë”, tha ministri Sveçla.

Ministrja e Industrisë, Ndërmarrësisë dhe Tregtisë, Rozeta Hajdari, kërkoi bashkëpunim më të mirë ndërmjet inspektorëve të AUV, tregut dhe inspektorateve komunale.

Komiteti për koordinimin dhe vlerësimin e situatës me pandeminë COVID-19 është themeluar dje, me datë 30 gusht 2021, me vendim të Qeverisë së Kosovës. Komiteti përbëhet nga 27 anëtarë që janë përfaqësues të institucioneve dhe organeve të ndryshme shtetërore e qeveritare.

Në fjalimin e tij, Kurti thuhet se ka kërkuar nga ky komision raport ditor deri më 13 shtator.

Nga dje në vend kanë hyrë në fuqi masa më të rrepta në luftën ndaj pandemisë, pas rritjes enorme të rasteve të infektimeve e të vdekjeve javëve të fundit.