7 perditesime
17:07

Votohen drejtorët e Bordit të AKP-së

Kuvendi i Kosovës ka votuar drejtorët e Bordit të ri të Agjencisë Kosovare të Privatizimit, me 60 vota për dhe një abstenim.

Anëtarët e rinj të drejtorëve të Bordit të AKP-së do të jenë Nazmi Mikollovci, Suzana Dautaj Surdulli, Mentor Hyseni, Vjollca Jashari, Violeta Arifi Krasniqi, Xhevdet Neziraj, Halim Muqolli dhe Avni Ajdini.

Mandati i tyre do të jetë katër-vjeçar.

16:49

Kurti për bordin e ri të AKP-së: Do të bëhet një auditim i thellë për privatizimet e egra

Kryeministri i Kosovës, Albin Kurti ka thënë se me bordin e ri të Agjencisë Kosovare të Privatizimi (AKP) synojnë të bëjnë një auditim të thellë të këtij institucioni dhe vendimeve të bordeve paraprake.

Para deputetëve, Kurti tha se ky do të jetë bordi i fundit i AKP-së që do t’i hap rrugë Fondit Sovran, Agjencisë dhe Bankës Zhvillimore.

“Ky do të jetë bordi i fundit i AKP-së në mënyrë që të hapim një etapë zhvillimore për Kosovën drejtë Fondit Sovran, Agjencisë dhe Bankës Zhvillimore. Nga bordi i ri presim që pas votimit në Kuvend të marrë masat për të ndaluar proceset që ne si qeveri i kemi paraprijë për ndaljen e tyre. Me bordin e ri synojmë një auditim të gjerë dhe thellë në AKP dhe të vendimeve të ish-bordeve të AKP-së”, tha ai.

Duke prezantuar bordin e ri, Kurti kritikoi të kaluarën e menaxhimit të AKP-së dhe tha që kjo do të ndryshojë me qeverisjen e tij.

“Privatizimi i egër u bë në një kohë kur Kosova e porsa dal nga lufta nuk e kishte rimëkëmbur ekonominë. Funksionimi i AKP-së ka mbledhur para nga privatizimi i pronave, por merrni me mend i ka mbuluar shpenzimet operative me to. Aty janë pagat më të larta në Kosovë dhe shpenzohen pa masë. Kjo mënyrë e buxhetit të AKP-së duhet të ndryshohet menjëherë, kompensimet e larta të paarsyeshme, mëditje nga 2000 dhe 3000 euro për një mbledhje të mbajtur. Paramendoni sikur ATK-ja dhe Dogana paratë e mbledhura t’i kishin shpenzuar për shpenzime operative, ashtu ka vepruar AKP. Mandej, pse të privatizohen objektet publike përderisa jemi duke shpenzuar qindra mijëra euro për qiratë e institucioneve”, tha ai.

Emrat e kandidatëve për anëtarë të Bordit të AKP-së që do t’i propozohen Kuvendit janë: Nazmi Mikollovci, Suzana Dautaj-Surdulli, Mentor Hyseni, Vjollca Jashari, Violeta Arifi Krasniqi, Xhevdet Neziraj, Halim Muqolli dhe Avni Ajdini.

Muaj më parë, Kuvendi shkarkoi bordin e kaluar nga udhëheqja e AKP-së. /KP

16:14

​Kuvendi miraton në lexim të parë Projektligjin për mbrojtjen e ajrit

Kuvendi i Kosovës ka miratuar në lexim të parë Projektligjin për mbrojtjen e ajrit nga ndotja. Përkrahje kësaj nisme ligjore i dhanë 74 deputetë nga të gjitha grupet parlamentare, përfshirë pozitën dhe opozita. I njëjti u konsiderua i rëndësishëm për ruajtjen e ajrit nga ndotja, shëndetin e njeriut dhe faunës natyrore.

Në arsyetimin e projektligjit, para deputetëve doli ministri i Mjedisit, Planifikimit Hapësinor dhe Infrastrukturës, Librun Aliu, i cili tregoi qëllimin e tij.

“Ky vendim për ndryshim të këtij ligji është marrë pas vlerësimit të përshtatshmërisë së legjislacionit të Kosovës me atë të BE-së. Hartimi i ligjit të ri për mbrojtjen e ajrit nga ndotja ka për qëllim të rregullojë dhe sigurojë të drejtën e qytetarëve për të jetuar në një mjedis me ajër të pastër, duke mbrojtur shëndetin e njeriut, faunën, florën dhe vlerat natyrore e kulturore të mjedisit nga ndotja e ajrit”, u shpreh ministri Aliu.

Nevojën e miratimit të këtij projektligji e arsyetoi edhe deputetja e Lëvizjes Vetëvendosje, Fitore Pacolli-Dalipi.

“Ndotja e ajrit është njëri nga shkaktarët kryesorë të vdekjeve të parakohshme, sëmundjeve të tjera, sulmeve në tru, sëmundjeve të mushkërive, kancerit dhe astmës. Përveç ndikimit në shëndetin e njeriut, ndotja e ajrit ka ndikime edhe në mjedis, vegjetacion dhe faunë”, tha ajo.

Përkrahje këtij projektligji i dha edhe Partia Demokratike e Kosovës.

“Në emër të Grupit Parlamentar mbështesim nismën ligjore për plotësim-ndryshimin, apo ligjin për mbrojtjen e ndotjes së ajrit. Në proces e sipër do të japim rekomandimet e nevojshme, veçanërisht tek pjesa e përmirësimit të cilësisë”, tha deputeti i PDK-së, Ferat Shala.

Ani pse shprehu përkrahje, deputeti i LDK-së, Besian Mustafa tha se nuk është i bindur që ky projektligj nuk bartë fare kosto financiare.

“LDK përkrah projektligjin për mbrojtjen e ajrit nga ndotja. Natyrisht siç deklaruan edhe kolegët më parë, ndotja e ajrit është njëri prej problemeve më akute të qytetarëve të Kosovës. Mirëpo ju bëj thirrje ministrisë së linjës t’i kushtojnë vëmendje kalkulimit të kostos financiare. Nuk jam i bindur që ky projektligj nuk bart fare kosto financiare”, tha ai.

Ndërsa, Pal Lekaj nga AAK tha se kontributin e tyre për këtë projektligji do ta japin në mes të dy leximeve.

“AAK e përkrah projektligj në shqyrtimi e parë për mbrojtjen e ajrit nga ndotja dhe kontributin tonë do ta japin mes dy leximeve”, tha Lekaj./KSP/


​Kuvendi voton në lexim të parë edhe Projektligjin për mbeturinat nga industritë nxjerrëse të mineraleve

Me 74 vota për dhe asnjë kundër Kuvendi i Kosovës e ka miratuar në parim Projektligjin për mbeturinat nga industritë nxjerrëse të mineraleve. Ky ligj mori mbështetjen edhe të deputetëve nga partitë opozitare.

Ministri i Mjedisit, Planifikimit Hapësinor dhe Infrastrukturës, Liburn Aliu e ka arsyetuar këtë projektligj duke thënë se përmes tij synohet të zvogëlohen efektet negative në mjedis dhe të ul rrezikun nga këto mbeturina. /KP

11:58

Nuk kalon rezoluta e LDK-së për marrëveshjen e Washingtonit

Më 24 vota për dhe 57 abstenime, nuk ka kaluar rezoluta e propozuar nga Lidhja Demokratike e Kosovës që i bën thirrje Qeverisë për zbatimin e marrëveshjes së Washingtonit.

Për të votuan vetëm deputetët e opozitës, ndërsa deputetët e pushtetit abstenuan.

11:51

Kuvendi miraton dy marrëveshje ndërkombëtare, për dy të tjera s'ka kushte për votim

Me nga 84 vota për, asnjë kundër dhe asnjë abstenim, Kuvendi i Kosovës ka miratuar në seancën e sotme dy marrëveshje ndërkombëtare.

Në këtë seancë është miratuar Projektligji nr. 08/L-019 për amendamentimin 02 të Marrëveshjes bilaterale ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut për Projektin e bashkëpunimit për zhvillim “KSV/017: Programi për mbështetje shëndetësore (pjesa II) dhe Projektligji nr.08/L-009 përratifikimin e amendamentimit nr.1 të Marrëveshjes kornizë së kredisë të datës 14 gusht 2020, ndërmjet Republikës së Kosovës, e përfaqësuar nga Ministria e Financave, Punës dhe Transfereve, dhe Bankës Zhvillimore të Këshillit të Evropës për financimin e projektit “Reagimi Emergjent ndaj COVID-19”.

Dy marrëveshjet tjera Projektligji nr.08/L-006 për ratifikimin e amendamentimit të Marrëveshjes ndërkombëtare me Bankën Evropiane për Investime (BEI), për financimin e Projektit për rehabilitimin e linjës hekurudhore 10 dhe Projektligjin nr.08/L-008 për ratifikimin e Marrëveshjes së bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Agjencisë Austriake për Zhvillim për zbatimin e Projektit “Hulumtimi dhe shkencat e aplikuara në arsimin e lartë + (HERAS+) (ada numri referues 8116-00-2020)”, janë lënë për më vonë pasi kryetari i Kuvendit, Gauk Konjufca ka thënë se nuk ka kushte për votimin e tyre pasi opozita është deklaruar që nuk do t'i votojë.

11:43

Nis seanca e Kuvendit, Konjufca bën thirrje për vaksinim

Ka filluar seanca e Kuvendit të Kosovës, e cila është vazhdim i seancave të kaluar dhe ku në rend të ditës pikat e papërfunduara në mesin e të cilave edhe katër marrëveshjet ndërkombëtare.

Kryetari i Kuvendit të Kosovës, Glauk Konjufca ka kërkuar që të respektohen masat kundër COVID-19.

Ai e ka përmendur vendosjen e banerëve në Kuvend për të përçuar mesazh për vaksinim të qytetarëve.

Konjufca thënë se rritja e numrit të të infektuarve në 72 orët e fundit është shqetësuese dhe se është mirë që qytetarët të vaksinohen që të mos ketë mbyllje të sërishme.

Edhe shefja e Grupit Parlamentar të Vetëvendosjes, Mimoza Kusari-Lila ka bërë thirrje për vaksinim masiv.

11:04

Kuvendi i Kosovës me mesazh për vaksinim kundër COVID-19

Kuvendi i Kosovës do të zhvillojë sot dy seanca plenare, në të cilat do të shqyrtohen edhe disa pika të rendit të ditës nga seancat e mëparshme.

Kuvendi ka vendosur që në seancat e sotme të përçojnë mesazhin tek qytetarët për vaksinim kundër koronavirusit.

Disa banerë në të cilët shkruan “Vaksinohu” në tri gjuhë, shqip, serbisht dhe anglisht, janë vendosur në sallën e seancave plenare.

Ditëve të fundit ështe shtuar numri i rasteve pozitive me COVID-19 në Kosovë. Kjo ka ngritur shqetësimet për një valë të re infektimesh, me variantin Delta i cili tashmë është prezent në Kosovë dhe i cili parashihet se mund të përhapet më lehtë.

07:59

Kuvendi sot mban dy seanca plenare

Kuvendi i Kosovës do të mblidhet sot në orën 11:00 në seancë plenare, për të votuar pikat e mbetura nga seancat e kaluara e në mesin e të cilave janë edhe disa marrëveshje ndërkombëtare të cilat në seancat e kaluara nuk arritën të ratifikoheshin për shkak të mungesës së kuorumit.

Ndërkaq, në seancën e re, e cila pritet të fillojë në orën 12:00, pas deklarimeve jashtë rendit të ditës dhe pyetjeve parlamentare Kuvendi do të shqyrtojë në lexim të parë Projektligjin për mbrojtjen e ajrit nga ndotja, si dhe atë për mbeturinat nga industritë nxjerrëse të mineraleve.

Pikë e fundit e rendit të ditës së kësaj seance do të jetë shqyrtimi i Propozim-vendimit të Qeverisë së Kosovës për emërimin e drejtorëve të Bordit të Agjencisë Kosovare të Privatizimit.