Instituti GAP ka prezantuar raportin “Ndikimi i subvencioneve dhe granteve në prodhimin bujqësor”.

Gentian Gashi nga GAP ka thënë se nga viti 2015 deri në vitin 2019 janë ndarë 135 milionë euro në formë të subvencioneve.

Sipas tij, në shumicën e këtyre kulturave nuk përputhen shumat e pagesave që janë ndarë.

“Te kultura e grurit nga viti 2010 pagesa direkte janë 55 milionë euro. Në vitin 2019 rendimenti është ulur për 4 %, dhe është shtuar importi i tij, nuk ka pasur zhvillim. Pavarësisht subvencioneve që po jepen ende importi është esencial për grurin. Pothuajse tek të gjitha kulturat janë rritur subvencionet por nuk është rritur prodhimi”, thuhet në njoftim.

Deputetja e Lëvizjes Vetëvendosje, Fitore Pacolli, ka thënë se bujqësia nuk është trajtuar si sektor për mbrojtjen e ushqimit.

Ajo ka thënë se është investuar në autostrada por nuk janë marrë me bujqësinë.

“Pandemia na ka treguar sa e rëndësishme është bujqësia. Nuk ka prodhim cilësor, kjo ndodhë edhe prej farave jo cilësore. Shteti ka dhënë subvencione por ka pasur keqpërdorime të mëdha. Ne kemi kuptu keqpërdorime shumë ma herët, deputetët e VV-së kanë paraqitur në prokurori prova që nga viti 2019, ato i kishte dorëzuar deputeti Sali Zyba. Në lumenjtë tanë derdhen kanalizimet e me po atë ujë ujitin tokat plot fermerë. Jemi duke punuar në akreditimin sepse ne nuk arrijmë ende t’i shfrytëzojmë fondet e BE-së. E me akreditim do ta arrijmë atë”, ka thënë ajo.

Përkundër që kemi pasur një investim relativisht të madh, nuk kemi rritje të prodhimit e të rendimenteve. Arsyeja është politika bujqësore jo adekuate, bashkëpunim jo i mirë mes nivelit qendror dhe atij komunal. Ministria ende nuk ka një raport gjithëpërfshirës për efektet e investimeve. Ne nuk kemi monitorim efektiv se a po përmbushen kontratat”, ka shtuar Besnik Osmani nga Zyra Kombëtare e Auditimit.