1 perditesime
17:43

Osmani pritet nga kancelari austriak, flet për vizat, dialogun dhe vaksinat

Presidentja e Kosovës, Vjosa Osmani, është pritur sot edhe nga kancelari i këtij vendi, Sebastian Kurz.

Osmani, sipas komunikatës nga Zyra e Presidencës, ka falënderuar kancelarin Kurz dhe Austrinë për ndihmën që i kanë dhënë Kosovë, si dhe ka shprehur gatishmërinë për thellim të marrëdhënieve dypalëshe.

Osmani po ashtu ka folur edhe për proceset që po kalon Kosova.

“Sa i përket dialogut me Serbinë, presidentja Osmani ka ritheksuar qëndrimin për dialog të barabartë ndërmjet palëve, i cili përfundon me njohje reciproke. Presidentja Osmani po ashtu ka theksuar se parakushte për paqen e qëndrueshme në rajon janë drejtësia për viktimat e luftës së fundit në Kosovë, zbardhja e fatit të të zhdukurve me dhunë gjatë luftës dhe respektimi i sovranitetit dhe integritetit kushtetues e territorial të Republikës së Kosovës”, thuhet në komunikatë.

Osmani ka falënderuar kancelarin edhe për ndihmën që ka dhënë Austria në sigurimin e 95 mijë vaksinave anti-Covid nga BE-ja. Ka folur edhe për liberalizimin e vizave.

“Në takim me kancelarin Kurz, presidentja Osmani ka shprehur falënderim për mbështetjen e vazhdueshme austriake ndaj Kosovës. Ka theksuar se është në interesin e Kosovës që kjo mbështetje të vazhdojë me procesin e liberalizimit të vizave si dhe fuqizimit të subjektivitetit ndërkombëtar të Kosovës”, thuhet në njoftimin e Presidencës së Kosovës.

Osmani po qëndron për vizitë në Austri, ku më herët është pritur edhe nga zyrtarë tjerë të lartë të këtij vendi.

12:11

Osmani në Austri kërkon që BE-ja t’i përmbahet premtimit për liberalizim të vizave

Presidentja e Kosovës, Vjosa Osmani në vazhdën e vizitës zyrtare në Austri, ka takuar anëtarët e shoqatës së miqësisë Kosovë – Austri, ka mbajtur ligjeratë në Akademinë Diplomatike në Vjenë dhe ka takuar një grup të grave të suksesshme Austriake, me ftesën e Zonjës së Parë të Austrisë, Doris Schmidauer.

Siç bëhet e ditur përmes një njoftimi për media, përgjatë takimit me shoqatën e miqësisë Kosovë – Austri, të udhëhequr nga eurodeputeti Lukas Mandl, presidentja Osmani ka falënderuar shtetin e Austrisë për mbështetjen ndaj Kosovës në faza të ndryshme përgjatë historisë. Ka theksuar se Kosova tashmë i ka plotësuar të gjitha kriteret për liberalizim vizash, ndaj ka kërkuar nga BE-ja që t`i përmbahet premtimit për kosovarët. Më tej, Osmani ka shfaqur bindjen se Austria do të vazhdojë t`i qëndrojë në krah Kosovës edhe në procesin e integrimit evropian, sikurse edhe në atë të të integrimit euro-atlantik.

“Republika e Kosovës ka potencial të jashtëzakonshëm të të rinjve, të cilët janë të shkolluar dhe të aftë për t`i dëshmuar vlerat e tyre sapo t`u jepet mundësia. Duhet të sigurojmë mobilitet dhe të ndërtojmë partneritet të fuqishëm”, ka theksuar Presidentja Osmani në takim me Grupin e Miqësisë Kosovë-Austri.

Në këtë kontekst, ajo ka përmendur edhe rolin e diasporës shqiptare në shtetin austriak.

“Diaspora jonë këtu ka rol qenësor për Republikën e Kosovës, shkaku i potencialit, dijes dhe ideve të reja që sjellin”, është shprehur Osmani.

Osmani ka takuar edhe një grup të grave të suksesshme në Austri, nën organizimin dhe me ftesë të Zonjës së Parë të Austrisë, Doris Schmidauer, ku morën pjesë edhe ministrja e Drejtësisë në qeverinë austriake, Alma Zadic, ish-raportuesja e Parlamentit Evropian për Kosovë, Ulrike Lunacek, si dhe gra nga fusha e biznesit, akademia, politika e shoqëria civile. Në këtë takim u diskutuan sfidat dhe mundësitë me të cilat përballen gratë në sektorin publik dhe privat, si dhe në shoqëri në përgjithësi. Osmani diskutoi rolin e grave në sjelljen e një ndryshimi të rëndësishëm politik dhe shprehu nevojën për investime në arsim dhe kujdes shëndetësor për të mundësuar dhe fuqizuar gratë që të jenë të barabarta në tregun e punës, si dhe nevojën për të krijuar më shumë vende pune për të rinjtë dhe gratë.

Në përmbyllje të ditës së parë të vizitës në Austri, presidentja Osmani ka mbajtur ligjeratë në Akademinë Diplomatike në Vjenë, me temën “Forcimi i shtetësisë së Kosovës- Sfidat dhe Storjet e Suksesit”. Përmes kësaj ligjërate interaktive, presidentja Osmani ka shpalosur rrugëtimin e popullit të Kosovës drejt pavarësisë dhe shtetndërtimit, si dhe ka diskutuar për sfidat me të cilat përballen institucionet e Republikës së Kosovës, sukseset që janë arritur dhe synimet.