Beqaj: Nëse Kurti po e mendon bashkimin me Shqipërinë atëherë ta thotë publikisht

Politologu Belul Beqaj në Desk të KOHËS ka thënë se nëse Albin Kurti ka për qëllim bashkimin me Shqipëri atëherë duhet ta thotë këtë.

Ai ka thënë se Kurti duhet të tregojë se çfarë po do, pasi ka treguar atë që nuk do.

“Nuk fillon as dialogu e as shtetndërtimi prej Albin Kurtit. Është një bajraktarizëm që nuk mund të arsyetohet. Unë jam shtetas i Albin Kurtit, mendoj se është një nga liderët që ka vizion të jashtëzakonshëm karshi gjithë liderëve tjerë që kemi në Kosovë. Por në këtë rast po mendoj se është peng i pikëpamjeve që ka, e që nuk i ka definu e publiku definitivisht. Mos është një lloj skenari që ka në mend e nuk po guxon ta bëjë publik. Si shembull bashkimi me Shqipërinë. Nuk e përjashtoj mundësinë e bashkimit, por jo kur i duhet e i nevojitet Serbisë. Çështja e bashkimit etnik duhet të jetë çështje e një procesi të natyrshëm. Procesi i natyrshëm më së miri realizohet nga Kosova duke u integruar në BE. Ndoshta e ka këtë koncept, por ta thotë publikisht. Qëllimi është si t’i afrohemi zgjidhjeve e jo si t’i largohemi. Kurti duhet të përcaktohet qartë, nëse po e din çfarë nuk do, atëherë të tregojë se çfarë po do. Të tregojë diçka që është reale e jo imagjinare”, ka thënë Beqaj.

Politologu Belul Beqaj ka thënë se Kosovën e presin tri opsione në rast se nuk e implementon Asociacionin e Komunave Serbe, edheduke i marrë parasysh vërejtjet e Gjykatës Kushtetuese.

Beqaj në Desk të KOHËS ka thënë se katër propozimet që i dha kryeministri Albin Kurti në takimin në Bruksel më 15 qershor me Aleksandar Vuçiqin, janë hap prapa.

“Opozita po transformohet në një formë jo të duhur, ngase ajo ka qenë bartëse e procesit të dialogut e tash po e kritikon Kurtin për faktin se po merr pjesë ne dialog, e pasi para dhjetë vjetëve ka thënë jo negociata por Vetëvendosje. Është shumë mirë që është transformuar në formën e duhur, por shumë keq që nuk po transformohet në përputhje me kontekstin e rrethanave reale. Konteksti është ky, nëse nuk duam të implementojmë Ascociacionin duke i marrë parasysh vërejtjet e Gjykatës Kushtetuese, atëherë aterlantiva është, nën një statuso-quoja, nën dy t’i kthehemi temës për këmbim të territoreve apo ndryshim të kufijve, tre e lexova një analizë të Anxhelkoviqit në një revistë serbe që paralajmëron se Serbia do të kthejë strukturat paralalele në Kosovë nëse nuk implementohet Asociacioni, që do të thotë konflikt. Propozimet e dhëna nga Kurti në takimin në Bruksel, janë hap prapa normalizimit të raporteve me Serbinë”, ka thënë Beqaj në Desk të KOHËS.

Politologu Belul Beqaj ka thënë se kryeministri Albin Kurti po tregon arrogancë të panevojshme ndaj opozitës.

Në Deskun e KOHËS Beqaj ka thënë se duhet të shihet se si pushteti po i qaset transformimit, në kuptimin e ndryshimit të qëndrimeve sa ishte parti në opozitë dhe tash, dhe sa po i përmbushë kërkesat e qytetarëve përmes këtij transformimi.

Ai ka thënë se superioriteti të cilin Kurti e ka fituar në zgjedhjet e fundit po keqpërdoret ndaj opozitës.

Beqaj ka shtuar se Kurti duhet të gjejë bashkëpunim me partitë në opozitë.

“Problemi është në raport me qasjen reale me realizimin të pritjeve që po i presin qytetarët. Një nga elementet ka të bëjë me faktin që superioriteti që është krijuar për fitoren plebecitare nga një anë e ka krijuar unanimitetin por në anën tjetër superioriteti po më duket se po keqpërdoret në llogari të kritikave ndaj opozitës. Albin Kurti nuk e ka marrë votën plebecitare për shkak se kemi kërkuar nga ai që ta mësojë opozitën si duhet bërë kritika, ne ia kemi dhënë votat për t’i realizuar kërkesat tona. Ndërkaq, ai doli dhe tha se opozita nuk po di ta kritikoj as pushtetin. Mendoj se kjo është arrogancë e panevojshme, e tepërt dhe është në këtë situatë joproduktive. Kurti me superioritetin që e ka duhet të gjejë medoemos bashkëpunim me opozitën, nuk mund t’i thotë opozitës se nuk kemi nevojë për votat e tuaja”, ka thënë ai.

© KOHA. Të gjitha të drejtat janë të rezervuara.