3 perditesime
15:07

Kusari-Lila: Opozita e ka bërë praktikë, secili vendim që kalon me legjitimitet e konsideron kapje

Kryetarja e Grupit Parlamentar të LVV-së, Mimoza Kusari-Lila, ka thënë se opozita e ka bërë praktikë që ta akuzojë pozitën për çdo vendim që kalon. Ajo tha se këtë frymë po e shfaqin edhe në Kryesinë e Kuvendit, duke shtuar se po i ikin përgjegjësive që kanë.

“Është bë si duket praktikë e grupeve parlamentare opozitare që për secilin vendim që kalon me legjitimitet të plotë, në përputhje me ligjin të akuzohemi si parti të pozitës, të etiketohemi se kinse dëshirojmë të kapim institucione siç po deklarojnë ata dhe po bëjmë shkelje, derisa gjithçka është në përputhje me përfaqësimin demokratik edhe me normat dhe rregulloret e Kuvendit. Nuk mund të komentoj tjetër për ta, përveç se nuk po mund ta pranojnë realitetin e ri në Kosovë”, ka thënë ajo pas mbledhjes së kryesisë.

Kusari-Lila ka sqaruar rekomandimin e Komisionit për Media lidhur me shkarkimin e pesë anëtarëve të Këshillit të Pavarur Mbikëqyrës të Shërbimit Civil i cili i ka shkuar Kryesisë që më pas të shkojë për votim në seancë.

“Si kryesi e kuvendit kemi pranuar raportin e komisionit funksional, e Komisionit për Media dje rekomandimi ka qenë që për shkak të shkeljeve të evidentuara në raport dhe në funksion të këtij këshilli, komisioni funksional i rekomandon seancës shkarkimin e pesë anëtarëve të Këshillit të Pavarur Mbikëqyrës të Shërbyesve Civil. Nga dy grupet tjera parlamentare është kërkuar që të kthehet prapa ky vendim i komisionet se kinse nuk ka arsye të mjaftueshme për këtë shkarkim”.

“Po shohim ikje të vazhdueshme të tyre nga përgjegjësia e tyre si opozitë, një kërcënim të vazhdueshëm dhe asnjë përpjekje për zgjidhje”, shtoi ajo.

Seanca e radhës plenare do të mbahet të enjten me fillim nga ora 11:00.

14:45

Gashi: E përkrahim mendimin e Dakës për ndjekjen e rrugëve ligjore pas shkarkimit të saj

Gashi thotë se të martën dhe të enjten pritet të ketë seancë

Në anën tjetër, deputeti i Lidhjes Demokratike të Kosovës, Arben Gashi ka deklaruar se të martën dhe të enjten pritet të ketë seancë në Kuvend.

“Tendenca e LVV-së të prish balancën sa i përket përfaqësimit të anëtarëve nga Kosova për Marrëveshjen e Stabizilim-Asocimit. Çështja e dytë e rëndësishme është rekomandimi për shkarkimin e Këshilit të Pavaruar të Mbikëqyrës të Shërbimit Civil të Kosovës. Është një raport i mangët. Ka një shkelje kur është rikthyer në punë një anëtar. Politika e kapjes ‘krejt dhe drejt’ është e gabueshme. Po ndodhë prekje e institucioneve të pavarur”, ka thënë Gashi.

Ai ka potencuar se e përkrahin mendimin e ish-kryetares së Komisionit Qendror të Zgjedhjeve për ndjekjen e rrugëve ligjore pas shkarkimit të saj.

“Presim që njëherë të merret Avokati i Popullit në këtë drejtim”, ka shtuar ai.

Të martën është një seancë mikpritëse për ministrin e jashtëm italian e të enjten seanca e rregullt*

14:33

Tahiri thotë se LDK-ja po heziton në iniciativën për ta çuar Osmanin në Kushtetuese

Shefi i Grupit Parlamentar i AAK-së, Besnik Tahiri, ka thënë se grupi i tij ka shprehur shqetësimin mbi shkarkimet të cilat janë duke u iniciuar për miratim në Kuvendin e Kosovës.

Tahiri ka thënë se ka kërkuar të ndalohet kjo, siç e ka quajtur ai, “praktikë e uzurpimit”.

“AAK-ja është e shqetësuar me tendencën e kapjes dhe shkarkimeve të institucioneve të pavarura. Kërkesa ime në kryesi është që çfarëdo shkarkimi apo penalizimi të një bordi të jetë mbi bazë të një vlerësimi të performancës, e jo mbi baza politike. Institucionet e pavarura emrin e kanë të pavarura dhe llogari duhet t’i japin vetëm Kuvendit”, ka thënë ai pas mbledhjes së Kryesisë së Kuvendit.

Tahiri ka thënë se AAK-ja e ka përkrahur iniciativën e PDK-së lidhur me dërgimin në Gjykatën Kushtetuese e vendimit për shkarkimin e Valdete Dakës. Por, shtoi se “ka një hezitim të LDK-së në këtë temë”.

Reagimi i Tahirit për shkarkime ka ardhur pasi në rend të ditës për seancën e radhës plenare është edhe Shqyrtimi i Rekomandimit të Komisionit për Administratë Publike, Pushtet Lokal, Media dhe Zhvillim Rajonal për shkarkimin e pesë (5) anëtarëve të Këshillit të Pavarur Mbikëqyrës për Shërbimin Civil të Kosovës.

 

08:47

Kryesia e Kuvendit mblidhet sot

Kryesia e Kuvendit do të mbajë mbledhje nga ora 13:00. Sipas njoftimit të Kryesisë janë disa pika të rendit të ditës.

1. Miratimi i procesverbalit të mbledhjes së mëparshme të Kryesisë së Kuvendit,

2. Përgatitjet për Seancë plenare:

1. Deklarimet jashtë rendit të ditës,

2. Pyetjet parlamentare,

3. Miratimi i procesverbalit nga seanca e mëparshme,

4. Shqyrtimi i Rekomandimit të Komisionit për Administratë Publike, Pushtet Lokal, Media dhe Zhvillim Rajonal për shkarkimin e pesë (5) anëtarëve të Këshillit të Pavarur Mbikëqyrës për Shërbimin Civil të Kosovës,

5. Shqyrtimi i Rekomandimeve të Komisionit për Mbikëqyrjen e Financave Publike lidhur me Raportin e Auditimit të performancës “Efektiviteti i ndërlidhjes së arsimit dhe aftësimit profesional me nevojat e tregut të punës”,

6. Shqyrtimi i Rekomandimeve të Komisionit për Mbikëqyrjen e Financave Publike për Raportin e Auditimit të performancës zbatimi i rekomandimeve të raportit “Administrimi i programit për trajtim mjekësor jashtë institucioneve shëndetësore publike dhe vlerësimi i rezultateve”,

7. Shqyrtimi i Rekomandimeve të Komisionit për Mbikëqyrjen e Financave Publike lidhur me Raportin e Auditimit të performancës “Procesi i licencimit të shfrytëzuesve të mineraleve ndërtimore e industriale dhe mbrojtja e ambientit nga kjo veprimtari”,

8. Shqyrtimi i Rekomandimeve të Komisionit për Mbikëqyrjen e Financave Publike për Raportin e Auditimit të performancës “Organizimi dhe menaxhimi i Investimeve të Teknologjisë së Informacionit në Institucionet Publike”,

9. Formimi i Komisionit ad-hoc për përzgjedhjen e kandidatëve për një (1) anëtar të Bordit për Ankesa të Mediave.

3. Shqyrtimi i propozimeve dhe i kërkesave