Kurti në Poklek: Duhet ta padisim Serbinë për gjenocid

Kryeministri i Republikës së Kosovës, Albin Kurti, në Poklek ka përsëritur edhe një herë qëndrimin se Kosova duhet ta padisë Serbinë për gjenocidin e kryer para 22 vjetësh.

Kurti ka thënë se partneriteti me ndërkombëtarët, por sidomos me NATO-n i jep Kosovës “sigurinë për paqen, siç na dha më 12 qershor 1999”.

Pokleku, ka thënë Kurti, është monument dhe dëshmi e gjenocidit serb kundër shqiptarëve në Kosovë.

Ka shtuar se populli i Kosovës është i mbijetuar i fushatës vrastare shtetërore serbe, prandaj duhet që të dëshmojë para botës.

“Serbia ende qeveriset nga persona që kanë qenë ministra e zyrtarë të lartë në kohën kur këto masakra janë urdhëruar e zbatuar. Sigurisht, ata sot nuk mund të vijnë më të na pushtojnë e të na vrasin, por ëndrrat e tyre jo vetëm nuk i mohojnë por i proklamojnë vazhdimisht, me investimet e shfrenuara për armatim modern duke blerë armë prej Rusisë, Bjellorusisë e të tjera. Pse armatoset Serbia, ky vend që ende nuk ka kërkuar falje për krimet masive që ka bërë 22 vite më parë. Duhet ta padisim Serbinë për gjenocid. Vrasjet e civilëve, grave shtatzëna, të miturve, foshnjave, pleqve, përdhunimi i përdorur si armë luftë janë dokumentuar e po dokumentohen”, ka thënë Kurti.

Kryetari i Kuvendit të Republikës së Kosovës, Glauk Konjufca, ka përkujtuar masakrën e Poklekut në 22 vjetorin e Ditës së Çlirimit. Ai ka thënë se 12 qershori është përmbushje e një procesi shumë të gjatë për Kosovën, dhe kurorëzim i shumë sakrificave të pareshtura për liri.

Konjufca ka thënë se sot po përkujtohet masakra e Poklekut, por Serbia nuk ka asnjë pengesë për të e krimet e tjera të kryera gjatë luftës.

“Jemi mbledhur në Poklek meqë kush e njeh mirë masakrën e Poklekut e di sa e thellë është plaga jonë që na ka shkaktuar gjenocidi i Serbisë mbi popullin tonë. Këtu u vranë mizorisht 53 shqiptarë, nga të cilët 24 fëmijë. Liria erdhi, por kjo plagë e shumë të tjera kullojnë. Afër 14 mijë qytetarë të vrarë nga Serbia prej të cilëve 1133 fëmijë. Për Serbinë për të gjitha këto nuk ka pasur kurrfarë pengese kurrë”, ka thënë ai në manifestimin përkujtimor.

Kreu i legjislativit ka thënë se kërcënimi nga Serbia sot është më i pranishëm se kurrë. Ai bëri thirrje për vigjilencë, duke shtuar se derisa Serbia ka plane për t’u kthyer në Kosovë dhe e konsideron tokë të sajën, asgjë nuk ka përfunduar me Serbinë.

“Rreziku dhe kanosja nga Serbia nuk ka kaluar ende, kërcënimi sot është më i pranishëm se kurrë më parë që nga 12 qershori 1999 sepse për sa kohë që Serbia ka ende plane për t’u kthyer në Kosovë dhe ato nuk i fshehë aspak, ne duhet të jemi të gatshëm ta mbrojmë atdheun tonë me çdo kusht. Sa kohë Serbia na ka në kushtetutën e saj dhe sa kohë na konsideron tokë e saj, asgjë nuk ka përfunduar me Serbinë. Prandaj, 12 qershorin duhet ta festojmë gjithnjë me krenari për atë që është arritur, por edhe me vigjilencë për atë që nuk ka përfunduar ende”, ka përfunduar Konjufca.

Presidentja e Kosovës, Vjosa Osmani, ka thënë se këtë vit kanë zgjedhur fshatin Poklek për ta shënuar Ditën e Çlirimit për shkak se siç ka thënë, ky vend është dëshmia më e fuqishme e synimit të shtetit serb për shfarosje e gjenocid.

Osmani ka cituar me këtë rast sekretarin e përgjithshëm të NATO-s atë kohë, Lordin George Robertson i cili kur kishte vizituar Poklekun me hyrjen e trupave të NATO-s në Kosove, kishte thënë se "Kushdo që mund të dyshojë në drejtësinë e intervenimit të NATO-s, duhet të vijë në Poklek".

“22 vjet më parë kur sekretari i përgjithshëm i NATO-s, Lordi George Robertson vizitoi Kosovën, na la me një thënie e cila rezonon aq shumë edhe tash pas më shumë se dy dekadash. Në pllakën që do ta shihni këtu në Poklek është vendosur citati ik tij: Kushdo që mund të dyshojë në drejtësinë e intervenimit të NATO-s duhet të vijë këtu, në Poklek. Kthehemi këtu për ta ritheksuar këtë mesazh sepse nuk është vetëm detyrim politik e institucional por mbi të gjitha është obligimi ynë moral ndaj të gjitha viktimave të luftës në Kosovë. Atë ditë ne fituam lirinë, u çliruam nga agresioni serb por edhe e sollëm paqen së bashku. Sot Kosova është e veshur me petkun e krenarisë për aleancën e fortë me NATO-n dhe shtetet që na dolën në krah dhe jemi jashtëzakonisht krenar për këto aleanca”, ka thënë Osmani.

Ajo ka shtuar se liria e popujve të vegjël lind nga vuajtjet e mëdha, duke aluduar në viktimën gjashtë muajshe të masakrës së Poklekut e cila e kishte emrin Liri.

“Liria e popujve të vegjël lind nga vuajtjet e mëdha. Këtë na e dëshmon simbolika e vajzës së vrarë dhe të djegur në këtë shtëpi e cila si për ironi mbante emrin Liri. Ajo ishte vetëm gjashtë muajshe. Tepër e njomë për ta nuhatur trishtimin e ditës e kobin e pafund. Sot jem i këtu për ta kujtuar emrin e saj, të cilën ajo na e fali secilit prej nesh. Ajo sot prehet në të njëjtin varr me Mbi 50 viktima të tjera ishin djegur aq shumë herë sa nuk arritën as të identifikohen. Mbi 50 njerëz në të njëjtin varr janë shndërruar në dëshminë më të fuqishme të synimit të shtetit serb për shfarosje e për gjenocid”, është shprehur Osmani.

© KOHA. Të gjitha të drejtat janë të rezervuara.