2 perditesime
21:27

Ish-shefi i AKP-së: Ka pasur ndikim politik në këtë agjenci

Ish- drejtori menaxhues i Agjencisë Kosovare të Privatizimit, Ekrem Hajdari, ka thënë se në këtë agjenci ka pasur ndikim politik.

Hajdari ka thënë se kur ka filluar privatizimi si proces, ka pasur mundësi që të ketë mbarëvajtje, mirëpo siç ka thënë, qysh prej fillimit ka dështuar për shkak të ndërhyrjeve.

“Fillimi ka pasur një proces të mbrapshtë me plotë parregullësi, me ndikim nga ana e organeve ndërkombëtare që kanë qenë atë kohë, edhe politikë nga liderët kosovarë, qysh atëherë, asetet vitale, kryesore konsiderohet se nuk janë privatizuar ashtu siç është dashur, me qëllimin primar që ekonomikisht të bëhet një privatizim që do të kontribuonte në mirëqenien përmes hapjen së vendeve të reja të punës”, ka thënë Hajdari.

Sipas tij, resurset humane në AKP nuk kanë munguar, mirëpo ka munguar vullneti politik dhe operativ atë kohë.

“Njerëz të mjaftueshëm ka pasur, resurset humane në AKP nuk kanë munguar, ka pasur bile tepër, ka munguar një vullnet edhe politik edhe operativ në atë kohë. Të potencojmë edhe ngecjet në Dhomën e Posaçme të Gjykatës Supreme. Arsyetimi i gjyqtarëve kosovarë ka qenë që këta të EULEX-it po flenë mbi dosje, por ata shkuan dhe me po të njëjtin ritëm vazhdoi puna, ishin akomoduar edhe këta në zonën e tyre të komforit”, ka thënë Hajdari.

21:25

Isufi: Ka pasur raste ekstreme kur AKP-ja ka refuzuar oferta pa arsye, faji është i Kuvendit

Avokati Bejtush Isufi, ka treguar se ka pasur raste ekstreme kur AKP-ja ka refuzuar ofertat pa asnjë arsye. Isufi në Desk të KOHËS ka thënë se e gjitha kjo është faji i Kuvendit të Kosovës, pasi ekzistojnë dispozita skandaloze në ligj të AKP-së.

“Di raste ekstreme kur një tenderues, një blerës potencial ka apliku dhe janë paraqitur 18 oferta, 18 oferta i ka pasur AKP-ja dhe nuk ia kanë dhënë e kanë refuzu. Me ka dy e tri oferta ka bërë, e nganjëherë edhe me një, por për disa nuk ka bërë as me 18, edhepse ka dhënë miliona. I ka refuzuar të 18 ofertat. Këtu është një dispozitë, një faj tepër të madh e ka Kuvendi i Kosovës që i ka mbyllur sytë dhe kur kryeministri, kryetari i partisë apo ndonjë ministër e ka dërgu ligjin, ata i kanë mbyllë sytë e kanë votu. E kemi këso dispozita skandaloze. Kem dispozitë në ligj të AKP-së ku thotë se AKP-ja mund të refuzojë një blerës pa asnjë arsye”, ka thënë Isufi.

Ai ka shtuar se për këtë arsye është bërë edhe një luftë disavjeçare në Dhomën e Posaçme. Ai ka thënë se ka disa vendime, përfshirë një në kohën e EULEX-it ku thuhet qartë se autoriteti publik ka dal me shitje publike dhe mund të anulohet tenderi, por duhet të ketë arsye për këtë.

20:43

Isufi: Dhoma e Posaçme e Supremes ka probleme pa fund

Avokati Bejtush Isufi, ka thënë se Dhoma e Posaçme e Gjykatës Supreme ka probleme të mëdha dhe se ka qenë një mekanizëm që ka ndikuar shumë keq në sistemin gjyqësor të Kosoës.

Duke folur për mundësinë e shuarjes së Agjencisë Kosovare të Privatizimit, Isufi ka thënë në “Desku” të KOHËS se kjo Dhomë ka qenë jashtë sistemit gjyqësor pa asnjë arsye, duke krijuar kështu siç ka thënë, sistem paralel të drejtësisë.

“Ata kanë qenë të veqantë, jashtë sistemit gjyqësor që nuk ka pasur asnjë arsye. Nëse këtë e ka dashur UNMIK-u në atë kohë, është dashur që Kuvendi i Kosovës të reagojë dhe të ketë parasysh se Kosova nuk mund të krijojë dy sisteme gjyqësore paralele. Përgjegjësia kryesore bien mbi Kuvendin e Kosovës që është themeluese e AKP-së dhe e Dhomës së Posaçme”, ka thënë Isufi.

Sipas tij, absurd tjetër për këtë Dhomë është se nuk e ka asnjë qasje në Gjykatën Supreme ndërkohë që thuhet se është e kësaj gjykate.

“Absurdi tjetër është që Dhoma e posaçme thuhet e Gjykatës Supreme, por vetëm kjo gjykatë nuk e ka asnjë qasje në Gjykatën Supreme. Asnjë qasje nuk e ka. Me Ligjin e Ri për Dhomën e posaçme u mundova të sugjeroj që është e patolerueshme që qytetarët e Kosovës si palë në këtë gjykatë, të mos kenë qasje fare ne Gjykatën Supreme. Dhe sot e atë ditë, të gjithë janë të heshtur, në mohimin e mjeteve juridike ndaj qytetarëve të Kosovës. Është e vetmja gjykatë ku nuk ka farë mjete të jashtëzakonshme, gjithçka përfundon me një gjysëminstancë, nuk kemi asnjë instancë të plotë gjyqësore”, është shprehur Isufi.