Amerika është kthyer me kokë e këmbë në drejtim të Evropës dhe Ballkanit dhe nënshkrimi i urdhrit ekzekutiv të presidentit amerikan Joe Biden, për të sanksionuar individët dhe organizatat e korruptuara, duhet të shihet në këtë frymë, ka thënë Faruk Ajeti, doktor i shkencave politike, hulumtues në Institutin Austriak për marrëdhënie ndërkombëtare me seli në Vjenë.

Ajeti ka thënë në “Ekspress Intervista” të KTV-së se në urdhrin e Bidenit janë listuar rreziqet si korrupsioni dhe mungesa e sundimit të ligjit, veprime këto që sipas tij minojnë qeverisjen demokratike.

“Amerika është kthyer me kokë dhe këmbë në drejtim të Evropës dhe Ballkanit. Nënshkrimi i këtij urdhri ekzekutiv për të sanksionuar liderët e korruptuar duhet të shihet në këtë frymë. Tani duke përfshirë edhe pjesë të ish-Republikës Socialiste federative të Jugosllavisë por edhe duke vendosur shtesë Republikën e Shqipërisë që njihet si Ballkani Perëndimor. Në këtë urdhër janë të listuara rreziqet si korrupsioni mungesa e sundimit të ligjit, veprime që minojnë qeverisjen demokratike”, ka thënë Ajeti.

Sipas tij, fakti që Bideni ka përfshirë në këtë urdhër edhe vendet e Ballkanit Perëndimor do të thotë se kjo pjesë është më stabile por nuk është në nivelin e pritur.

Ajeti ka shtuar se urdhri i presidentit amerikan, Biden, nuk duhet të shihet ad-hoc, por si një proces afatmesmë dhe afatgjatë.

“Mungesa e shtetit ligjor është shkaku kryesor i korrupsionit. Ende ka disa politikanë që kanë përdorur fuqinë e tyre për të minuar luftën kundër korrupsionit. Presidenti Biden e ka cilësuar korrupsioni si një lloj kanceri të zhvillimit demokratik. Bideni vazhdimisht edhe gjatë fushatës së tij zgjedhore, duke iu referuar rreziqeve globale, një nga to ka qenë lufta kundër korrupsionit. Ai nuk i referohet në parim vetëm Ballkanit Perëndimor por edhe Amerikës së Mesme, asaj Latine dhe Afrikës”, ka thënë Ajeti.

Presidenti Joe Biden, të mërkurën arrin në Evropë, konkretisht në Britani të Madhe, për të marrë pjesë në Samitin e G7-tës që do të zhvillohet në Londër, nga 11-13 qershor.

Kjo do të jetë vizita e parë e Bidenit jashtë shtetit, si president i SHBA-së.

Gjatë vizitës Bideni do të takohet me disa prej liderëve më të fuqishëm botërorë, ndërkaq, vizitën në Evropë do ta përmbyllë me një takim që do të zhvillojë me homologun e tij rus, Vladimir Putin, më 16 qershor, në Gjenevë të Zvicrës.