Deputetja e Lëvizjes Vetëvendosje, Fatmir Kollçaku-Mulhaxha, ka thënë se pala kosovare ka dështuar në dialog, çka sipas saj e kanë vënë Serbinë në pozitë shumë më të favorshme.
Ajo në Interaktiv të KTV-së ka thënë se nuk do të ketë vazhdim të dialogut çfarë ka qenë deri tash dhe se të gjitha marrëveshjet e arritura ndër vite do të rishqyrtohen.
“Ka shumë dështime që kanë ndodhur nga pala kosovare që nga kur kanë filluar, nga viti 2011. Thjesht shumë dështime, fillimisht dëshmohet sepse i kishim të gjitha dëshmitë në anën tonë, lufta çlirimtare e jonë, përkundër faktit që kemi pasur agresion jo vetëm në Kosovë por edhe në pjesë të ish-Jugosllavisë. Dështimet që i kemi bërë ne në ndërkohë e kanë vendosur Serbinë në pozitë shumë më të favorshme se do të duhej të ishte sot karshi nesh”, ka thënë ajo.
Mulhaxha-Kollçaku ka shtuar se pozita e Kosovës karshi Serbisë do të ishte shumë më ndryshe sikur zëri i Kosovës të ishte më ndryshe në dokumentimin e krimit të kryer nga forcat serbe.
Ajo tha se ka vullnet nga pala kosovare që ky proces të përfundojë me një zgjidhje, por jo që Kosova të jetë në pozitë inferiore.
Kollçaku: Platforma për dialogun do të prezantohet pas takimit në Bruksel
Deputetja e Lëvizjes Vetëvendosje, Fatmire Mulhaxha-Kollçaku ka thënë se platforma e Qeverisë Kurti për dialogun Kosovë – Serbi do të shpaloset pas takimit në Bruksel në mes të këtij muaji,.
“Është e qartë që platforma do të paraqitet pasi që të përfundojë takimi në Bruksel. E keni parë programin e Qeverisë në vija të trasha. Platforma e strategjia prezantohen më vonë”, ka thënë Mulhaxha - Kolçaku në Interaktiv të KTV-së.
Ajo ka thënë se në seancën e Kuvendit të Kosovës të premten, kryeministri Kurti do të flasë për formatin e ecurinë e dialogut të ardhshëm. Ajo ka bërë thirrje opozitës që të japin kontributin qoftë përmes kritikave.
“Shpesh kritika e qëndryeshme ndihmon në këtë proces”, ka thënë ajo.
