Ushtruesi i detyrës së kryetarit të Partisë Demokratike të Kosovës, Enver Hoxhaj, ka thënë se sot shteti bëri krim ndaj qytetarëve pas tollovisë që ndodhi në qendrën e vaksinimit në sallën ‘’1 Tetori’’ në Prishtinë.
Sipas Hoxhajt, pas asaj që ndodhi Qeveria duhet të mbajë përgjegjësi.
“Jemi të dëshpëruar me pamjet që i pamë në trajtimin e qytetarëve në sallën ‘’1 Tetori’’. Ishim dëshmitar të pamjeve tronditëse ku të moshuarit shtyheshin me njëri-tjetrin për të marrë vaksinën. Sot mungoi shteti, mungoi kryeministri dhe ministri i Shëndetësisë. Kjo është e papranueshme. Sot shteti bëri krim ndaj qytetarëve dhe qeveria duhet të mbajë përgjegjësi. Ne si PDK kërkojmë përgjegjësi penale dhe morale për këtë”, ka thënë Hoxhaj.
I pari i PDK-së ndërkohë kritikoi ftesën e kryeministrit Albin Kurti për të diskutuar në Kuvend të hënën programin qeverisës, që sipas Hoxhajt, është thjesht një program seminarik dhe nuk thotë asgjë.
“Ftesa që Kurti bëri dje për të hënën që të diskutohet në Kuvend për programin tregon për qasjen autoritare të Kurtit. Ky program është punim i thjeshtë seminarik, nuk i parasheh as premtimet e LVV-së me të cilat ata i fituan zgjedhjet. Vendi i ka tri kriza të mëdha për shkak të pandemisë. Së pari vaksinimi, pasojat e pandemisë e arsimimi së treti. Në program në faqen 5 dhe 6 përmendet se si do të vaksinohet 60% e popullsisë dhe asgjë më shumë. Jemi ballafaquar me humbjen e një gjenerate në arsim. Programi e ka vetëm një fjali për këtë. Shkollat janë lënë vetëm, nxënësit janë lënë vetëm. E të tre skenarët e arsimimit kanë dështuar. Ne nuk e dimë se si do të ia bëjë Qeveria me testin e maturës, semi-maturës. Qeveria nuk ka plan për politiken e jashtme. Nuk flitet për njohje as për anëtarësim të vendit në organizata ndërkombëtare”, u shpreh Hoxhaj.
12:48
LDK-ja thotë se Qeveria Kurti ka dështuar në menaxhimin e pandemisë
Lidhja Demokratike e Kosovës ka thënë se Qeveria ka dështuar në menaxhimin e pandemisë dhe të vaksinimit kundër koronavirusit në vend. Në një konferencë për media, zyrtarë të LDK-së thanë se Ministria e Shëndetësisë, e menaxhuar nga ministri Arben Vitia, po e rrezikon jetën e qytetarëve duke mos arritur të sigurojë vaksinat anti-COVID.
“Albin kurti ka rrezikuar jetën e qytetarëve, nuk e kanë në plan qytetarin, ata vazhdojnë të qeverisin si populistë. Sot deputetët e tyre merren me lindjen e mesme, i kanë mashtruar qytetarët, me transparencë 0, asnjë kontratë e nënshkruar, në një luftë politike, ekstreme për të mbyllur zërin e qytetarëve dhe të mediave”, ka thënë ish-ministri Armend Zemaj.
Për tollovinë tek salla “1 Tetori”, deputeti Zemaj ka thënë se pamje të tilla tregojnë se të moshuarit po dërgohen drejt vdekjes.
“Qeveria e udhëhequr nga Albin Kurti dhe Ministri i shëndetësisë Arben Vitia i kanë rrezikuar qytetarët. Kur kemi thënë që jemi të dëshpëruar me situatën e krijuar është dukur si politike, por kjo u dëshmua dhe shihet që kjo qeveri nuk ka prioritet shëndetësinë" tha Zemaj.
“Asnjë e mirë nuk ka ndodhur deri më tani, sot e kemi parë përmes mekanizmit të policisë që t’u ndalet zëri qytetarëve e mediave. Bëjmë thirrje që Qeveria ta merr situatën në dorë. Ka mekanizma vetëm duhet të përdoren e jo të shkarkohen. Ministria e Shëndetësisë nuk po udhëhiqet nga Qeveria. U bëjmë thirrje edhe ndërkombëtarëve që të intervenojnë sepse kjo gjendje është skandaloze”, ka shtuar ai.
Zemaj ka potencuar se organet e drejtësisë duhet hetuar mënyrën e vaksinimit pasi që sipas tij, disa persona janë vaksinuar pas raportimit që nuk kanë mbetur më vaksina.
“Edhe ne si departament i shëndetësisë e kemi analizuar në thellësi programin qeverisës. Është vërejtur se është një program sipërfaqësor. Nuk ka prioritet as për investime kapitale. Nuk ka plan për vaksinim, pa protokoll se si do të shkojë vaksinimi në 2021, shembull sot është 1 tetori”, ka thënë Ardian Shala, zyrtar i LDK-së.
