1 perditesime
10:22

Aliu: Kompanitë e hidrocentraleve e lëshojnë ujin vetëm gjatë vizitave të paralajmëruara

Ministri i Mjedisit Liburn Aliu ka thënë se në vizitën e djeshme në lumin e Brezovicës nuk ka pasur ujë të rrjedhshëm në shtratin e tij.

Sipas tij, kompanitë që menaxhojnë me hidrocentralet në Brezovicë e ndalin rrjedhën e ujit, por pastaj ai lëshohet nëse ka paralajmërime se dikush do ta vizitojë.

“Ne kemi ardh dje pa paralajmërim dje këtu dhe situata ka qenë krejtësisht ndryshe prej kësaj qe kemi sot. Uji ka qenë pothuajse i palëvizshëm dje, sot kemi rrjedhë të ujit. Situata prej orës 5:30 dje dhe asaj sot, është krejtësisht ndryshme. Po ashtu duhet parë edhe pjesën tjetër, dje kemi ecë nëpër të sepse nuk ka pas ujë ndërkaq sot nuk mundemi me ecë. Vizitën që e kemi bërë dje ka qenë për kanalin e betonit që nuk do të duhej të ishte këtu”, ka thënë ai.

Ai tutje ka thënë se do të shikojnë se e ka leje dhe si është dhënë leja për ndërtimin e kanalit në lumin e Brezovicës.

Sipas tij, përgjegjësia është zinxhirore dhe se do të analizojnë se përgjegjësia e kujt është.

09:27

Aliu në Brezovicë: Kemi pasur ankesa nga banorë e aktivistë për hidrocentralet

Ministri i Mjedisit, Planifikimit Hapësinor dhe Infrastrukturës, Liburn Aliu, është duke qëndruar në Brezovicë. Vizitën atje, ai thotë se po e bën për shkak të vërejtjeve që kanë marrë nga aktivistët e banorët e kësaj pjese për shkak të hidrocentraleve.

Pas lumit në Brezovicë, ai ka paralajmëruar se do të vizitojë edhe lumin në Shtërpc.

“Pas shumë vërejtjeve që kemi marrë nga aktivistë e banorë, kemi dalë në terren. Këtu jemi në Brezovicë te lumi. Këtu kemi pasur vërejtje për shtratin e lumit, pas kësaj do ta vizitojmë lumin në Shtërpc. Unë kam qenë edhe dje në një inspektim pas orarit të punës”, ka thënë ai.

Aliu pas këtyre vizitave ka paralajmëruar konferencë për media.