4 perditesime
23:35

Deliu-Kodra: Arroganca e pushtetit vështirë të përkthehet në bashkëpunim

Partia Demokratike e Kosovës do ta ketë të pamundur të bashkëpunojë me partinë në pushtet, Vetëvendosjen, sipas deputetes Blerta Deliu-Kodra.

Deputetja e PDK-së në një bisedë në Interaktiv të KTV-së, tha se sjellja e Qeverisë Kurti në ditët e para në pushtet, apo siç e ka quajtur ajo, arroganca e saj, e bën të pamundur bashkëpunimin kur bëhet fjalë për dialogun Kosovë - Serbi.

“Ne do të jemi në parlament, është obligim i partive që kanë marrë përkrahjen e qytetarëve të ofrojnë qasjen e tyre. Por me këtë arrogancë, është e pakuptimtë të flitet për ndonjë bashkëpunim. Arroganca e pushtetit do të jetë e vështirë të përkthehet në bashkëpunim. Ashtu siç ka filluar në raport me mediat, opozitën, blerjen e deputetëve, është e vështirë të ketë bashkëpunim. Për në është i rëndësishëm bashkëpunimi me qytetarët e Kosovës. Do t’i kemi konsistonte qëndrimet tona karshi Republikës së Kosovës. PDK-ja ka bërë një punë të jashtëzakonshme sa ka qenë në pushtet dhe ne presim të vazhdojë kjo”, ka thënë Deliu-Kodra.

23:32

Deliu-Kodra: Kryeministri Kurti nuk e ka prioritet luftimin e pandemisë

Deputetja e PDK-së, Blerta Deliu-Kodra, ka thënë se Qeveria Kurti duket se nuk e ka prioritet luftimin e pandemisë.

Deliu-Kodra në Interaktiv të KTV-së ka thënë se është e pakuptimtë heshtja e ministrit të Shëndetësisë dhe e Qeverisë karshi problemit me sigurimin e vaksinave anti-COVID.

“Jemi një prek vendeve të pakta në botë që kemi ngecje të tilla me vaksina. Kujtoj se në të kaluarën, gjatë gjashtëmujorit të Qeverisë Kurti 1, kemi parë ministrin e Shëndetësisë, Arben Vitia, duke dal në konferenca dy herë në ditë. Është e pakuptimtë kjo heshtje e kjo neglizhencë e ministrit të Shëndetësisë dhe e Qeverisë. Kishte një konferencë, por me të thënë të drejtën, po flas edhe si një prej deputeteve që kam pasur rast të punojë një kohë të gjatë në media. Për mua është skandaloze që ministri i Shëndetësisë dhe jo vetëm, për shkak të pamundësisë që të sigurojë vaksinën dhe mosefikasitetit të kësaj Qeverie, tenton ta zhvendos fajin dhe të instalohet diktat, të instalohet mekanizëm i shtetit policor karshi mediave, në një kohë kur informimi i drejtë është shumë i rëndësishëm për qytetarin. Kur qytetarët kanë nevojë të informohen për vaksina”, ka thënë Deliu-Kodra. “Secili qytetar ka dëshirë të dijë kur do të vijnë vaksinat. A do të vijnë siç janë premtuar nga z. Kurti deri në fund të vitit, apo nuk do të jenë prioritete. Z. Kurti njëherë e pati prioritet plotësim ndryshimin e ligjit të zgjedhjeve, pastaj e kishte të siguronte votat për presidente. E prioritetin e ka zhvendos deri në përmbyllje të themi të procesit të zgjedhjeve në Shqipëri. Për mua dhe për çdo qytetar të Kosovës është e pakuptimtë. Është neglizhencë tejet e madhe që kjo Qeveri e bën jo vetëm ndaj qytetarëve, por edhe ndaj vendit dhe ndaj zhvillimit e shëndetit të qytetarëve”.

23:19

Deliu-Kodra e quan të hutuar dhe arrogante Qeverinë Kurti

Deputetja e PDK-së, Blerta Deliu-Kodra, ka thënë se partia që i përket ka iniciuar tri debate parlamentare për masat e Qeverisë Kurti në lidhje me pandeminë dhe ekonominë në këtë kohë.

Ajo në një intervistë në Interaktiv të KTV-së, tha se Qeveria Kurti është e hutuar dhe po shfaq arrogancë për shkak të numrave që ka në parlament.

Ka thënë se masat e marra së fundi, për mbyllje të pjesshme, nuk kanë dhënë asnjë rezultat.

“Shpresojmë që në debate, te jene kryeministri, ministri i Shëndetësisë dhe ministrat tjerë dhe të flasin para qytetarëve për masat, për vasksinat që është një prej temave të rënda dhe se si do t’u ndihmojnë qytetarëve dhe ekonomisë. Para dy javësh kishim bllokim, por mbi 50 mijë qytetarë e lëshuan vendin dhe si pasojë kemi statistikat e Odës Ekonomike, që tregojnë se këto masa nuk kanë sjell asnjë rezultat, përkundrazi kanë dëmtuar shëndetin e qytetarëve dhe të ekonominë. Qeveria është e hutuar dhe ka një arrogancë të numrave, prandaj është e pakuptimtë që për 12 vjet ishte në opozitë dhe nuk ka arritur të ketë një listë prioritetesh për tash në pushtet”, ka thënë Deliu-Kodra.

23:12

Deliu - Kodra: Grainca duhet ta kthejë mandatin

Deputetja e Partisë Demokratike të Kosovës, Blerta Deliu-Kodra ka deklaruar se deputetja Adelina Grainca duhet ta kthejë mandatin e saj te PDK-ja.

Sipas saj, minimumi i korrektësisë politike që mund të bëjë tani Grainca është që të kthejë mandatin, pasi votuesit e saj nuk kanë votuar për Albin Kurtin por për PDK-në.

“Mendoj që është minimumi i korrektësisë politike, që i është besuar një deputeteje të ardhshme të PDK-së, mandati t’u kthehet votueseve sepse ata nuk kanë votuar për Albin Kurtin por për listën e PDK-së”, ka thënë Deliu-Kodra në “Interaktiv”.

Ajo ka shtuar se ishte vetë Albin Kurti dhe partia e tij të cilët kërkuan nga deputetët e Partisë Sociale Demokrate që t’i kthenin mandatet kur ata u shkëputën nga Lëvizja Vetëvendosje dhe tani vetë Kurti, siç ka thënë, në mënyrë joparimore i është qasur një të reje në politikë.

“Unë kujtoj rastin kur deputetë të Partisë Social Demokrate dhe kujtoj deklaratat ku ata etiketohen si tradhtarë dhe kërkohet që mandatet e tyre të kthehen sepse ishin mandate që ishin marrë për lëvizjen dhe të njëjtin që sot thonë që zonja Grainca ka vendosur për ndryshimin po harrojnë që ata që kanë kërkuar që mandatet të kthehen te ta, është po i njëjti rast, zoti Kurti zgjodhi që në mënyrë me joparimore ti qaset një të reje në politikë”, ka thënë Deliu-Kodra.


Deliu - Kodra: Do të angazhohemi që kandidatët tanë për zgjedhje lokale të jenë figura kredibile

Deputetja e Partisë Demokratike të Kosovës, Blerta Deliu-Kodra ka thënë se PDK-ja do të angazhohet që kandidatët e kësaj partie për zgjedhjet lokale që do të mbahen këtë vit të jenë figura kredibile.

Deliu Kodra ka deklaruar se po punohet shumë në këtë drejtim dhe se PDK-ja nuk pret që rezultati zgjedhor i 14 shkurtit të reflektojë edhe në zgjedhjet lokale.

“Ne presim që brenda muajit të ardhshëm të fillojmë me zyrtarizmin e kandidaturave, PDK-ja ka emra të rëndësishëm, janë figura që kanë integritet. Është punuar dhe ka pasur një angazhim maksimal gjatë kësaj kohe, nuk presim që ky rezultat zgjedhor të reflektojë në zgjedhjet lokale prandaj do të angazhohemi që kandidatë tanë të jenë figura kredibile dhe të kenë program që i përgjigjet interesave të qytetarëve të Republikës së Kosovës. Ka angazhim serioz që PDK-ja në këto zgjedhje të dalë e konsoliduar. Procesi gjyqësor në Hagë për PDK-në ka qenë sfidë kryesore”, ka thënë ajo.

23:06

Deliu-Kodra për Graincën: Ikja e saj ishte joparimore

Deputetja e Partisë Demokratike të Kosovës, Blerta Deliu-Kodra ka thënë se ishte joparimore ikja e deputetes së PDK-së, Adelina Grainca dhe kalimi i saj në Lëvizjen Vetëvendosje.

Deliu-Kodra ka thënë në “Interaktiv” të KTV-së se Grainca ka qenë deputetja më e re femër në mesin e deputeteve të PDK-së e cila ka marrë besimin e votuesve të PDK-së.

“Nuk mund të flasë që largimi i saj është largim parimor. Ka qenë vetëm zonja Grainca e re në mesin e deputeteve femra të PDK-së. Kishte përkrahjen e rinisë së PDK-së. Nuk mund ta kuptojë që një e re vjen me një entuziazëm të tillë ta ketë një ndryshim të tillë të pakonsultuar”, ka thënë Deliu-Kodra.

Ajo ka shtuar se deri në momentin e fundit ka pasur konsultime me deputeten Grainca dhe se deri në momente të fundit, Grainca ka pasur kundërshti ndaj LVV-së.