Gjini: Kjo do të jetë gara ime e fundit për të parin e Gjakovës

Kryetari i AAK-së, Ardian Gjini, ka thënë se do të garojë edhe për një mandat për të parin e Komunës së Gjakovës.

Ai ka thënë se ky do të jetë mandati i fundit që do ta kërkojë nga qytetarët.

Gjini ka thënë se e ka të qartë se çfarë duhet të punohet në Gjakovë.

“Nuk e di se kush janë kundërkandidatët por do t’i respektoj. Do të garoj jo vetëm me atë që kam bërë për Gjakovën por do t’iu tregoj edhe për ato se çka do të punohet përsëri. Elektorati e ka shprehur një vullnet të vetin më 14 shkurt. Unë do ta ofrojë më të mirën për komunën e Gjakovës. Ajo çka ka ndodhur në Gjakovë për katër vjet do të shpaloset në fushatë”, ka thënë ai, duke shtuar se nëse merr këto katër vjet mandat, do të jenë të fundit për të.

Numri dy i AAK-së, Ardian Gjini, ka kritikuar nismën e Qeverisë për hartimin e ligjit për konfiskim të pasurisë së pajustifikueshme.

Gjini në një intervistë në Interaktiv, tha se Qeveria po tenton të krijojë rrugë të shkurtra me gjyqësorin, duke u shndërruar në palë.

Ai tha se ky ligj nuk mund të kalojë, pasi do të ketë reagime sipas tij në vend dhe nga shtetet demokratike.

“Nëse e kemi një ligj që është në harmoni me shumicën dërrmuese të legjislacionit në BE, dhe ligji nuk ka funksionuar, janë dy rrugë: ndoshta ka defekt në ligj ose në sistem, por nuk janë procese të shpejta. Më kryesorja, me çfarëdo veprimi që ka implikime ligjore nëse qeveria provon përmes një agjencie me e shndërru ekzekutivin në palë, në vendime gjyqësore, atëherë kemi probleme serioze. Ekzekutivi nuk mundet me u shndërru në palë, aq më tepër me marrë vendime që i takojnë gjyqësorit. Çfarëdo lloj vendimi, çfarëdo cenimi të çfarëdo të drejte, nëse e cenon të drejtën edhe të kriminelit, atëherë shkelën parimet kushtetuese”, ka thënë Gjini.

Ai pranoi se jo gjithmonë kanë funksionuar mirë prokuroria dhe gjyqësori, por e sheh të panevojshme një nismë të tillë, sipas tij në këtë formë.

“Unë mendoj se më mirë është me u marrë me këtë problem, cilat janë problemet strukturale, nëse ka, dhe cilat janë problemet subjektive, e jo me vepru me rrugë e lidhje të shkurtra, me provu me dëshmu që po duam të luftojmë korrupsionin duke e ngatërruar rolin e ekzekutivit me atë të gjyqësorit. Është problem serioz. Do të ketë reagime, jo vetëm prej shoqërisë civile, jo vetëm prej organizatave që kanë pasur monitorim të ligjit e rendit e që nuk janë eksponentë politikë, por edhe të vendeve shumë demokratike”, ka thënë ai.

Nënkryetari i AAK-së, Ardian Gjini ka thënë se nga Qeveria Kurti po e sheh një koncept politik anti-pluralist.

Ai ka thënë se kjo qeveri ka pasur tendencë për ndryshim të ligjeve shumë serioze si ai për zgjedhje, duke shtuar se ky ishte sulm ndaj opozitës, e pastaj edhe sulm ndaj mediave.

“Ky është sulm ndaj mediave, ndaj zyrtarëve civilë. Janë në fraza populiste shumë problematike me të cilat Kosova duhet me u marrë. Ka tendencë serioze për autoritarizëm. Por e mira është që protektorë tonë nuk janë Rusia por është Amerika”, ka thënë ai.

Duke folur për nismën për konfiskim të pasurisë së pajustifikueshme, ai ka thënë se “ky është propozim me therra”.

Sipas tij, Qeveria po gjen rrugë të shkurta që ndërrojnë sisteme në mënyrë të pakontrolluar.

Kryetari i Gjakovës dhe nënkryetari i AAK-së, Ardian Gjini, ka komentuar situatën me vaksina dhe atë që është raportuar se ministri i Shëndetësisë, Arben Vitia, ka hezituar të nënshkruajë një kontratë për blerje të vaksinave.

Gjini në një intervistë në Interaktiv të KTV-së, tha se nuk ka pritur më shumë nga Qeveria Kurti 2.

“Është situatë jashtëzakonisht e keqe, shkakton frikë te njerëzit, është gabim se si sillet qeveria. Në takimin e kryetarëve të komunave, ku isha edhe unë pjesëmarrës, me ministrin Vitia, nuk kemi marrë një konfirmim se kur mund të ketë vaksina për qytetarët tjerë, pos këtyre që kanë ardhur e që janë shumë pak. Në të njëjtën kohë mënyra e komunikimit, e reagimit pas informatave se Vitia ka dështuar të nënshkruajë kontratën, është shumë e keqe, ka elemente serioze antiplurasiste të qeverisë ndaj raportimit medial. Nuk kam pritur më shumë, ajo që është problematike, është thjeshtëzimi i problemeve. Unë po besoj që qeveria e Kosovës është një vazhdimësi, ministrat ndërrohen, por duhet të ketë vazhdimësi”, ka thënë Gjini.

Kryetari i Komunës së Gjakovës, Ardian Gjini ka thënë se siç është paraparë me masat e Qeverisë, shkollat në këtë komunë janë hapur sot.

Sipas tij, në izolim janë shtatë nxënës dhe shtatë mësimdhënës.

Ai  në Interaktiv të KTV-së ka thënë se është lajm i mirë lehtësimi i masave.

“Në këtë fazë jemi në rregull. Komuna e Gjakovës i ka të gjitha kapacitetet për mbikëqyrjen e masave. Nuk kemi pas probleme as në të kaluarën. Edhe tani i kemi të gjitha kapacitetet ta mbikëqyrim situatën. Ka edhe bashkërendim me nivelin qendror dhe lokal”, ka thënë ai.

Gjini tutje ka shtuar se edhe në shtabin komunal për COVID është i pranishëm drejtori i spitalit rajonal. Ai ka thënë se ditët më të vështira i kanë pasur në gushtin e vitit të kaluar, porse që nga atëherë gjithçka është e menaxhueshme.

Sipas tij, edhe numri i pacientëve nuk është afër limitit të shtretërve.

Gjini ka folur edhe procesin e vaksinimit, duke shtuar se kanë pasur më shumë se 300 vaksinime dhe nuk ka pasur problem për vaksinim.

© KOHA. Të gjitha të drejtat janë të rezervuara.