Paneli për Ankesa dhe Parashtresa ka njoftuar se brenda 24 orëve janë paraqitur 208 ankesa nga partitë dhe subjektet politike kundër rezultatit zgjedhor, të publikuar nga KQZ-ja.
PZAP-ja ka njoftuar se lidhur me këto apele do vendoset brenda afatit ligjor prej 72 orëve.
“Jemi në procedim/administrim të ankesave dhe ende nuk kemi mundësi për të ju informuar me numrin e kandidatëve të subjekteve politike për secilin subjekt të cilat kanë parashtruar apele në PZAP-i lidhur me publikimin e rezultateve përfundimtare të zgjedhjeve”, thuhet në njoftimin e PZAP-së.
09:43
31 ankesa në PZAP për rezultatin e zgjedhjeve
Sot përfundon afati kur subjektet politike dhe kandidatët për deputetë mund të dorëzojnë ankesat e tyre në Panelin Zgjedhor për Ankesa dhe Parashtresa në lidhje me rezultatin përfundimtar nga zgjedhjet e 14 shkurtit.
Deri në këtë orë, në PZAP janë paraqitur 31 apele nga kandidatët e subjekteve politike, ka thënë kryesuesi i sekretariatit të PZAP-it, Mulë Desku.
“Apelet janë paraqitur kundër këtyre rezultateve për shkak të mospërputhjes së rezultateve: Parregullsi në plotësimin e FPR-së, gabime në FPR, parregullsi gjatë numërimit me kusht, mungesa e votave, bartja e votave në një kandidat tjetër, etj”, i tha Desku Kohës.
Afati për paraqitjen e apeleve kundër rezultateve të zgjedhjeve është 24 orë që nga momenti i shpalljes së tyre, ndërsa PZAP merr vendim lidhur me to brenda 72 orëve. Afati rrjedhimisht do të mbyllet në orën 11:00.
Në bazë të rezultateve përfundimtare, VV ja është partia e parë me 49.95 për qind, e pasuar nga PDK-së, me 16.9 për qind, LDK-ja me 12.64 për qind, AAK 7.078 për qind.
