3 perditesime
19:52

Eksperti i sigurisë kibernetike ngre dyshime për reagimin e MF-së pas sulmit kibernetik

Eksperti i sigurisë kibernetike, Hekuran Doli, ka ngritur dyshime lidhur me deklarimet e Ministrisë së Financave se sulmi i sotëm kibernetik, ka përfunduar pa ndonjë dëm të madh.

Doli ka shkruar se vlerësimi i gjendjes së sigurisë pas një sulmi duhej bërë pas një analize të detajuar, për dallim nga MF-ja që sipas tij, ka bërë reagim të menjëhershëm.

Ai ka shtruar edhe pyetje sesi hakerët kanë arritur të kenë qasje në Regjistrin Civil.

 

I gezuar te degjoj konstatimin e menjehereshem se tentativa per sulm kibernetik nuk paska qene e suksesshme, pavaresisht...

Posted by Hekuran Doli on Sunday, February 28, 2021

 

18:19

MF-ja për sulmin kibernetik: S’janë cenuar të dhënat personale të qytetarëve

Ministria e Financave ka konfirmuar sulmin kibernetik duke thënë se sulmues të paidentifikuar, kanë përdorur të dhënat personale të Regjistrit Civil, duke tentuar t’i lexojnë të dhënat e faturave të tatimit në pronë.

Ministria përmes një komunikate thotë se sulmuesit nuk kanë arritur ta cenojnë integritetin dhe sigurinë e Sistemit Informativ dhe se me rastin po merren organet kompetente.

Pasditen e sotme KOHA ka raportuar për sulmin në fjalë. Një i tillë dyshohet se ka ndodhur edhe në Telekomin e Kosovës. Këtë e ka bërë të ditur Policia e Kosovës.

17:17

Pas Ministrisë së Financave, dyshohet për sulm kibernetik edhe në Telekom

Gjatë së dielës është raportuar se ka pasur sulm kibernetik edhe në Telekomin e Kosovës, krahas atij në Ministrinë e Financave.

Policia e Kosovës i ka thënë KOHËS se kanë informacione për një sulm në Telekom, derisa thonë se informatat e pranuara janë duke u trajtuar nga specialistët e Policisë.

“Sot është raportuar për sulme kibernetike në dy institucione. Informatat e pranuara po trajtohen nga ana e specialistëve të Policisë për hetimin e krimeve të tilla në koordinim me institucionet ku dyshohet të kenë ndodhur”, thuhet në njoftimin policor.

Në anën tjetër, Vala i ka mohuar raportimet e tilla, duke i cilësuar si të pavërteta.

“Telekomi i Kosovës është sulmuar me lajme të rrejshme dhe shumë të dëmshme për biznesin tonë. Nuk jemi sulmuar e as nuk është rrezikuar as edhe një IP e vetme. E gjitha është sajuar nga ekspertë të vetëshpallur”, thuhet në njoftimin e Valës.

16:46

Sulm kibernetik në Ministrinë e Financave

Ministria e Financave sot ka qenë cak i një sulmi kibernetik. Ministri në detyrë i kësaj ministrie, Agim Krasniqi, i ka thënë KOHËS se sulmi ka ndodhur gjatë së dielës në Departamentin e Tatimeve.

“Sulmi ka ndodhur sot në Departamentin e Tatimeve. Jemi duke u marrë me rastin, s’ka diçka serioze. Brenda pak minutash do dalim me njoftim”, ka thënë Krasniqi.

Për sulmin ka folur edhe Policia e Kosovës, ku thotë se është duke u marrë me informacionet e pranuara.