4 perditesime
18:32

Hoti: Ata i kanë vra njerëzit në rrugë, ne e kemi shpallur pavarësinë

Kandidati i LDK-së për kryeministër, Avdullah Hoti, u ka premtuar simpatizantëve në Hajvali, se viti 2021 do të përmbyllet me projekte të mëdha.

Hoti tha se “LDK-ja të gjithë i ka mbi kokë”, pos qytetarëve e miqve ndërkombëtare, që sipas tij i ka në krah. Ai akuzoi edhe partitë rivale për zgjedhjet e 14 shkurtit.

“Krejt i kemi këta me propagandë prapa dhe mbi kry, por i kemi qytetarët dhe miqtë e fortë. Ju garantoj që 2021-n kemi me përmbyllë me projekte të mëdha që derivojnë nga Marrëveshja e Wshingtonit. Ata i kane vra njerëzit në rrugë, ne e kemi shpallë pavarësinë. Sot i kanë lidhur shiritat nëpër qytet, por iu ka ardhur fundi, ata janë pakicë, në Hajvali s’ka hiç. Nuk e kemi plan me u dorëzu, e as me u frikësu. Me ndihëm e qytetarëve, bekimin e Zotit e mbështetjen e partnerëve, do të fitojmë të dielën. Kemi projekte të mëdha nga Komisioni Evropian, qindra miliona euro në infrastrukturë, arsim e shëndetësi. Shumë projekte të Prishtinës, e cila është lënë prapa, qe tetë vjet prej kur se e ka lënë LDK-ja. Rruga A, kolektori, janë këto projekte të mëdha që e bëjnë Prishtinën metropol”, tha Hoti.

17:41

Hoti: Qytetarët tashmë e dinë, e vërteta është vetëm LDK-ja

Kandidati i Lidhjes Demokratike të Kosovës për kryeministër, Avdullah Hoti, tha të mërkurën gjatë një tubimi në Artanë se fitorja e LDK-së këtë të diele është fitore e demokracisë ndaj autokracisë.

“Është fitore e vlerave perëndimore, ndaj atyre lindore dhe qytetarët e Kosovës, të përcaktuar qysh përpara 21 vjetësh për përafrim me perëndimin, nuk do të lejojnë ta kthejnë Kosova kah lindja”, tha Hoti.

Ai tha se me votën për LDK-në më 14 shkurt, qytetarët e Kosovës do t’ua pamundësojnë majtistëve bolshevikë të udhëheqin me qeverinë e Kosovës.

“Por, ne do të kujdesemi për ata qytetarë që u besojnë atyre që t’u shpjegojmë se ata janë mashtruar nga propaganda dhe t’i afrojmë edhe ata me vlerat e vërteta perëndimore”, tha Hoti.

Sipas tij, këto ditë tashmë në tërë Kosovën është përçuar mesazhi dhe tashmë dihet e vërteta.

“Ne do ta marrim mbështetjen e qytetarëve dhe jemi të sigurt se e kemi të qartë rrugën që duhet ndjekur në procesin e dialogut me Serbinë. Atë proces ne do ta përmbyllim me njohje reciproke, duke punuar bashkë me aleatët tanë evropianë dhe me amerikanë. LDK-ja ka mision për ta udhëhequr me përgjegjësi përmbylljen e integrimit e Kosovës në strukturat euro-atlantike dhe për t’i ruajtur vlerat demokratike të shoqërisë dhe shtetit tone”, tha Hoti.

Hoti u shpreh i bindur në fitoren e LDK-së, ndërsa siguroi se do të vazhdoj menaxhimin me sukses të proceseve që kanë sfiduar shtetet më të zhvilluara të botës.

“Edhe pse me resurse të pakta shëndetësore, radhitemi ndër vendet që kemi menaxhuar më së miri pandeminë, që gjunjëzoi botën. Me këtë rast, i falënderoj të gjithë ata që ende janë në vijën e parë të frontit në luftën kundër pandemisë dhe ju shpreh ngushëllime atyre që kanë humbur të dashurit e tyre. Me pakon e rimëkëmbjes ekonomike më të madhen në rajon, kemi arritur të përgjysmojmë efektin negativ të pandemisë në ekonomi. E ndihmuam shëndetësinë, arsimin, komunat, bujqësinë, gratë në biznes, qytetarët në kushte të vështira, pensionistët, familjet në asistencë sociale”, ka thënë ai.

16:16

Abdixhiku: Të gjithë janë bërë kundër LDK-së

Lidhja Demokratike e Kosovës ka zhvilluar sot fushatën zgjedhore në komunën e Kamenicës.

Lumir Abdixhiku, kandidat për deputet nga kjo parti tha se të gjithë janë bërë kundër LDK-së dhe se LDK-ja mbetet forca kryesore në vend.

“Kjo betejë është më e vështirë se të gjithë janë bërë kundër nesh, mendjet që thirren të pavarura, kanalet mediatike e kështu me radhë. Sot është e domosdoshme me ju tregu që sot nuk është marre me qenë me LDK, marre është mos me qenë me LDK-në. Ta kuptojnë kundërshtarët tanë që shteti mbetet shtet, miqtë miq dhe LDK forcë kryesore”, ka thënë Abdixhiku.

14:48

Hoti: Të dielën garon demokracia me regjimin autokrat

Kandidati i Lidhjes Demokratike të Kosovës për kryeministër, Avdullah Hoti, nga tubimi në Gjilan ka thënë se të dielën në zgjedhjet e 14 shkurtit, do të jetë garë mes fitores së demokracisë apo regjimit autokrat duke iu referuar Lëvizjes Vetëvendosje.

“Jemi në situatë specifike qe më 2021 të kthehemi në parimet mbi të cilët është ndërtuar shteti. Ne po duhet të kthehemi në bazament të shoqërisë sonë evropiane sepse përballë i kemi këta me shamia të kuqe që përpara i kanë lidhur në qafë e që janë totalitarë si në kohën e Mao Tse-tungut (ish-lideri komunist kinez). Ne jemi para një fitoreje të madhe për demokracinë. Ne e kemi për obligim që të sigurohemi që shtetin ta anëtarësojmë në Bashkimin Evropian dhe NATO. Një hap të rëndësishëm e kemi bërë vitin e kaluar që ushtria jonë u bë aleate me atë amerikane. Kërkoj besimin e Gjilanit për të çuar përpara këtë mision sepse të dielën është garë se a do të fitojë demokracia apo regjimi autokrat me shamia të kuqe”, ka deklaruar ai.

Në anën tjetër, kryetari i Gjilanit dhe nënkryetari i LDK-së, Lutfi Haziri ka thënë se “do të votojmë për LDK-në për t’i dhënë mundësi stabiliteti dhe qetësisë në qeverisje”.

13:25

Hoti: Oponentët tanë ishin kundër Planit të Ahtisarit që solli pavarësinë e Kosovës

Kandidati i LDK-së për kryeministër, Avdullah Hoti, gjatë një tubimi elektoral në Viti sot, tha se oponentët tanë politikë, asnjëherë nuk kanë besuar në projektin e pavarësisë së Kosovës, madje, në shkurt të vitit 2008 ata nxorën protestuesit në rrugë, ku u vranë qytetarë të pafajshëm, pasi që nuk besonin në Planin e Ahtisarit që solli pavarësinë e Kosovës.

“Ata edhe sot janë kundër aleancave tone me partnerët amerikanë dhe evropianë. Ata ishin kundër Marrëveshjes së Rambujesë që solli lirinë e Kosovës, ata ishin kundër Planit Ahtisari që solli pavarësinë e Kosovës, ndërsa vitin e kaluar ishin kundër Marrëveshjes së Uashingtonit që solli 1 miliard investime në Kosovë, njohjen nga Izraeli, heqjen e sanksioneve amerikane dhe përfshirjen e FSK-së në misione paqësore”, tha Hoti. “Lidhja Demokratike, për 30 vite, ka qenë në ballë të proceseve të vështira të lirisë, shtet-ndërtimit dhe zhvillimit të Kosovës. Në gjithë historinë tonë prej tri dekadash, nuk jemi shmangur asnjëherë nga përgjegjësitë shtetërore. Gjithmonë kemi mbrojtur shtetin dhe interesat e qytetarëve të Kosovës. Këtë kulturë politike e kemi të trashëguar nga arkitekti i pavarësisë së Kosovës, Presidenti Rugova”.

Ai shtoi se kështu vepruam edhe në pranverën e vitit të kaluar, kur e ndaluam një qeverisje që nisi të dëmtonte shtetin, dhe morëm përgjegjësinë për të qeverisur në momentet më të vështira në 20 vitet e fundit, pasi që ne ishim të vendosur që të mos lejojmë cenimin e miqësisë speciale me Shtetet e Bashkuara të Amerikës.

Hoti ka shprehur bindjen në fitore. 

“Kudo që po shkojmë në komuna, Zoti verë e ka bërë gjithkah, edhe sot është ditë e mrekullueshme këtu në Viti. Edhe të hapet rruga, të çelen dyert kur ke miq të mirë. Unë jam i bindur që të dielën do të festojmë me fitore, sepse kudo që shkojmë, nëpër degë tona, ku do që bisedojmë qoftë me biznese, bujq, me arsimtarë, me mjekë, me bashkatdhetarë tonë nga mërgata, jam i bindur që shumica e qytetarëve janë njerëz që e duan demokracinë, jo njerëz që duan të kthejnë vendin prapa në autokraci”, ka thënë Hoti.