2 perditesime
23:45

Azemi: Punëtorët që mirëmbajnë zyrat e kryeministrit dhe zv.kryeministrave paguhen 170 euro

Kryetari i Sindikatës së Sektorit Privat, Jusuf Azemi, ka treguar për pagën e ulët që marrin punonjësit që mirëmbajnë zyrën e kryeministrit, zëvendëskryeministrave dhe ministrave.

Ai ka thënë se këta punonjës marrin vetëm nga 170 euro.

“Ne kemi informata për çdo kompani në nivel të Kosovës. Punëtorët që kryejnë shërbime në raport me Qeverinë e Kosovës, janë në gjendje shumë të rëndë. E kam thënë edhe në konferenca, punëtori që mirëmban zyrën e kryeministrit, zëvendëskryeministrave dhe ministrave, merr një pagë prej 170 euro. Ajo pagë për të ardhur në punë, për të ngrënë ushqim më të thjeshtë, sipas deklarimeve të punonjësve nuk kanë gjasa as nga 120 euro t’i çojnë në shtëpi. Çka të bëjë një punëtor të cilit i kërkohet përgjegjësi tepër e madhe nga menaxheri dhe me arsye, e në fund merr 170 euro në muaj, në fakt 150 euro pasi hiqen edhe kontributet”, ka thënë Azemi në Interaktiv të KTV-së.

Ai ka thënë se është krim që derisa punëtorëve tjerë u premtohet paga e 13-të, të ketë paga 170 euro për punonjësit që mirëmbajnë zyrën e kryeministrit.

“Kryeministri i Kosovës premton pagë të 13-të për punonjësit e sektorëve të tjerë publik, dhe ky është krim. Përderisa punëtorët e sektorit publik, pjesën më të madhe të kohës së pandemisë kanë kaluar në shtëpi me vendim të Qeverisë, ata të sektorit privat kanë paguar shtesë për transport, pasi e dini se 2-3 muajt e parë ka qenë e vështirë për të siguruar transport. Është dashur të paguajnë 2-3 fishë më shumë për të shkuar në vend pune. Ata kanë infektuar. Asnjëherë Qeveria e Kosovës nuk e bëri stimulimin më të vogël për punëtorët që mirëmbajtën edhe spitalin edhe ambulantat e të gjitha, por po e stimulon një punëtor sepse në një formë ju ka imponuar. Ne nuk jemi ata që duam të imponohemi”, ka thënë Azemi. “Tani kemi organizim fenomenal, ndoshta më të mirin në rajon. Do të presim që të përfundojë fushata zgjedhore e pastaj e shohim se a janë në numër më të madh ata të sindikatës së Arsimit apo sindikatave tjera, apo numër më të madh janë punëtorët e sektorit privat të Kosovës. Në nesër mund të japim urdhër e për dy ditë gjitha spitalet i ke të bllokuara. Por, kemi një kulturë. Më shumë po interesohemi ne si Sindikatë për pacientët që kemi në spitale, sesa vet Qeveria e Kosovës”.

23:26

Azemi: Javën tjetër dorëzojmë padi në Gjykatë ndaj Zemajt

Kryetari i Sindikatës së Punëtorëve të Sektorit Privat, Jusuf Azemi ka thënë se javën tjetër do të dorëzojnë padi në Gjykatë ndaj ministrit në detyrë, Armend Zemaj.

Ai në Interaktiv të KTV-së ka thënë se e kanë përfunduar gjithë dokumentacionin dhe i njëjti do të dorëzohet.

“Është marrë vendim, që nuk dua t’i lë punëtorët teknikë që të vazhgitën më shumë se dy javë ditë, dhe e vetmja rrugë ka qenë që t’i nxjerrë nga greva dhe të fillojmë me procedurën ligjore, dhe do ta fitojmë këtë grevë. Gjithçka është e kompletuar dhe vetëm duhet të dorëzoet në gjykatë javën tjetër”, ka thënë ai.

Azemi ka thënë se vet ministri në detyrë, Zemaj ka dalë para opinionit duke thënë se është arritur marrëveshje me përfaqësuesit e sindikatës, sepse sipas tij, pagesa do të bëhej sipas marrëveshjes. Porse ai thotë se Zemaj më vonë nuk u lajmëruar.

“Dhe vet ministri doli para opinionit dhe tha, jemi dakorduar me përfaqësuesit e sindikatës sepse pagesa do të bëhet sipas marrëveshjes dhe kjo do të përfundojë deri nesër në ora 12. Pastaj Zemaj asnjëherë nuk u lajmërua, përkundër që i kemi shkruar, edhe në mënyrë private, por megjithatë nuk und ta kuptojmë sesi mund të jetë i rrezikuar një mjek që hyn te pacienti një herë brenda ditës ose dy herë, e të mos ketë stimulim për një punëtor teknik i cili në dhomën e pacientit hyn disa herë brenda ditës. Përderisa mjeku është profesionist dhe din t’i ikë rrezikut, punëtorët teknik nuk dinë ta bëjnë. Si ka të drejtë një njeri ta bëjë një ndarje të tillë”, ka thënë ai.

Azemi ka thënë se janë në përfundim të dokumentacionit, pasi thotë se kanë dokument zyrtar nga Ministria e Shëndetësisë që iu takojnë këto mjete.

Ai ka thënë se kanë menduar që do të nënshkruajnë një marrëveshje sot për pagesën e mjeteve.

Azemi ka treguar se si nuk u mbajtën premtimet. 

“Secila sindikatë i ka njëfarë forme qëndrimet e veprimet e veta. Mua nuk mund të më akuzojë askush pse nuk e kam prit kryeministrin Hoti, nuk do ta pres prapë. Ne nuk kemi çfarë t’i kërkojmë më absolut. Ai i din vendimet që i ka marrë për stimulimin e punëtorëve të Qendrave të Mjekësisë Familjare, të spitaleve e ambulantave, vendim që është marrë dhe e ka nënshkruar ai së bashku me ministrin Armend Zemaj. Për një muaj kemi dialogu, për dy javë ditë kemi hyrë në grevë. Ne u morëm vesh për një orë që ky stimulim duhet paguar, e Zemaj tha se kjo pagesë do të bëhej deri nesër në ora 12:00. Tri herë e kam pyet ministrin a janë të gatshëm të bëjnë këtë pagesë. Ka thënë po, vetëm tha mos e trego shumën. Na kanë kategorizu në kategorinë e tretë, ai decidivisht ka thënë, se ndoshta do ta bëjmë pagesën më shumë se kjo shuma që është 100 euro”, ka thënë Azemi në Interaktiv të KTV-së.

Ai ka thënë se nuk është kundër rritjeve e pagesës së shtesave në sektorët tjerë. Por, se duhet stimuluar personat që janë në kontakt direkt me pacientët e prekur nga COVID-19.

“Ne i gëzohemi rritjes së secilit sektor, Arsimit e Policisë. Edhe dhjetëfishtë të rriten pagat nuk do të ishin në formë e standarde që e meritojnë ata. Por ta stimulosh një punëtor të arsimit që ndoshta pjesën më të madhe ka qëndruar në shtëpi, e mos ta stimulosh një punëtor të spitaleve që shkon e mirëmban qendra spitalore në Prishtinë, Gjakovë e Prizren, nuk do koment. Ai mirëmbajtës është në kontakt të drejtpërdrejt me COVID. Normal ne kemi vazhduar dy javë me grevë. Nga momenti që jemi marrë vesh për të bërë pagesën, ministri Zemaj të nesërmen nuk e ka hap telefonin. Në ditën e parë që e kemi filluar grevën, kryeministri Hoti së bashku me drejtorin e SHSKUK-së kanë kërkuar të shkojmë në takim. Brenda 20 minutave jemi dakordu që pagesat dhe gjitha procedurat ligjore të përfundojnë deri nesër në ora 12:00. Vet ministri doli para opinionit e tha se jemi dakordu me përfaqësuesit e Sindikatës”.

23:13

Azemi tregon pse nuk u takua me Hotin

Kryetari i Sindikatës së sektorit privat, Jusuf Azemi, ka treguar pse nuk është takuar me kryeministrin në detyrë, Avdullah Hoti.

Ai në Interaktiv të KTV-së ka thënë se përveç vonesës së këtij të fundit, ai paraprakisht ka parë që takimi nuk ishte serioz.

Azemi tutje ka shtuar se para se të shkonte në Kryeministri, Sindikata ka menduar që Hoti ka bërë marrëveshjen e gatshme dhe do të duhej vetëm nënshkrimi.

“Unë nuk kam nevojë të qëndroj në korridor të kryeministrisë apo kudo pa treguar se kur do të jetë saktë fillimi i takimit. Kërkesa për takim kur është bërë ne nuk kemi pasur njohuri dhe kemi menduar që kryeministri ka bërë një marrëveshje të gatshme për nënshkrimin e kërkesave tona që i kemi bërë si sindikatë, por në momentin kur kam shkuar aty, kam parë që në atë takim janë paraparë të jenë disa asociacione të ndryshme dhe unë kam parë që ky takim nuk mund të jetë serioz dhe nuk kam dashur t’ia jap dëshirën askujt të bëjë fotografim se kryeministri po flet me sindikatën e punëtorëve”, ka thënë ai.