Arbëri

Qeveria Hoti me armatë zëvendësministrash

Lidhja Demokratike kishte premtuar në zgjedhjet e fundit se një qeveri e drejtuar nga ajo do t’i kishte vetëm 12 ministri e secila sosh më së shumti dy zëvendësministra. Por kryeministri Hoti ka emëruar më shumë se dyfishin e zëvendësministrave krahasuar me këtë zotim të bërë. Në shoqërinë civile zotimet e kësaj natyre i shohin si tregues që partitë janë të vetëdijshme se është keqpërdorim i parasë publike kur emërojnë më shumë ministra e zëvendësministra sesa që premtojnë

Prishtinë, 27 janar – Nën sloganin BESO, Lidhja Demokratike pati listuar pikat programore për zgjedhjet e kaluara, e para nga të cilat kishte këtë përmbajtje: Qeveria e Kosovës do t’i ketë 12 ministri, secila sosh me vetëm dy zëvendësministra.

LDK-ja doli e dyta në zgjedhje dhe për pak muaj bashkëqeverisi me Lëvizjen Vetëvendosje. Pasi e braktisi koalicionin dhe e kaloi mocionin e mosbesimit kundër Qeverisë Kurti, mbërriti ta formonte qeverinë e vet me partnerë të rinj politikë.

Duke u bazuar në premtimet zgjedhore të vitit 2019 të Vetëvendosjes dhe LDK-së, dhe duke krahasuar me postet ministrore në Qeverinë Haradinaj, Instituti GAP kishte kalkuluar se mund të kurseheshin deri në 15.5 milionë euro në paga dhe shpenzime përcjellëse.

Agron Demi, analist politikash në Institutin GAP, tregon se një kursim i këtillë nuk është mbërritur.

“Edhe në koalicionin LVV-LDK nuk u mbajt premtimi zgjedhor dhe emëruan ministra e zëvendësministra më shumë se që u premtua, edhe pse më pak se në Qeverinë Haradinaj”, thotë Demi.

Avdullah Hoti, që LDK-ja e vuri në krye të Qeverisë, braktisi zotimin për numrin e ministrive dhe të zëvendësministrave.

Mbështetur në dokumente dhe të dhënat që ka ofruar Qeveria, që nga qershori kur e ka marrë mandatin, në 15 ministri Hoti ka emëruar gjithsej 51 zëvendësministra. Aktualisht në detyrë janë 47, 3 janë liruar nga detyra ndërsa një ka vdekur.

Hoti ka emëruar shumë më shumë zëvendës nëpër dikastere qeveritare, sesa dy, sa ishte zotimi para elektoratit.

Kësisoj, nga pesë zëvendësministra kanë: Ministria e Infrastrukturës, Ministria e Ekonomisë, si dhe Ministria e Kulturës.

Nga 4 zëvendësministra kanë Ministria e Punëve të Jashtme dhe Ministria e Bujqësisë.

Nga 3 zëvendësministra kanë Ministria e Punës, Ministria e Financave, Ministria e Shëndetësisë dhe Ministria e Punëve të Brendshme.

Nga 2 zëvendësministra kanë Ministria e Arsimit, Ministria e Mbrojtjes, ajo për Komunitete dhe Kthim, Ministria e Tregtisë, si dhe Ministria e Pushtetit Lokal.

Ndërkaq nga 1 zëvendësministër kanë Ministria e Drejtësisë dhe Ministria e Zhvillimit Rajonal.

Agron Demi thotë se vetë partitë e dinë që emërime kaq të shumta përbëjnë keqpërdorim.

“Kur partitë premtojnë se nuk do emërojnë më shumë se 12 ministra e 24 zëvendësministra, kjo tregon se partitë janë të vetëdijshme se është gabim dhe keqpërdorim i parasë publike nëse emërojnë më shumë se aq ministra e zëvendësministra”, thotë Demi.

Shtimi i numrit të zëvendësministrave përcillet me kosto të lartë buxhetore. Kjo për faktin se ata përpos pagës së rregullt realizojnë shpenzime edhe në shumë kategori dhe kanë të drejtë të rekrutojnë edhe një staf mbështetës.

Zv.ministrat në Qeverinë Hoti: 

Ministria e Infrastrukturës

Artan Berisha

Arton Retkoceri

Hamza Balje

Muhamet Gashi

Xhavit Zariqi

Ministria e Ekonomisë dhe Ambientit

Muharrem Sfarqa

Ergin Bunjaku

Rexhep Kadriu

Muharrem Nitaj

Burbuqe Bakia-Deva

Ministria e Kulturës, Rinisë dhe Sportit

Engelbert Zefaj

Qazim Rrahmani

Valdete Bajrami

Arbër Grabovci

Halil Matoshi

Ministria e Punëve të Jashtme dhe Diasporës

Bekim Brestovci

Teuta Sahatqija

Gani Dreshaj

Muhamet Brajshori

Ministria e Bujqësisë, Pylltarisë dhe Zhvillimit Rural

Enver Hoti

Bajram Kastrati

Bahrim Shabani

Jashar Qukiq

Ministria e Punës dhe Mirëqenies Sociale

Bashkim Krasniqi

Besart Dreshaj

Adnan Redzeplar

Ministria e Financave

Agim Krasniqi

Kushtrim Bahrimaj

Jasmina Jovanoviq

Ministria e Shëndetësisë

Resul Makreshi

Pjetër Ndou

Lua Gola

Ministria e Punëve të Brendshme

Agron Bacaj

Yildiray Bayram

Zafir Berisha

Ministria e Arsimit dhe Shkencës

Driton Bardheci

Xhavit Rexhaj

Ministria e Mbrojtjes

Muhamedali Mergjollari

Sadika Kofrc

Ministria për Komunitete dhe Kthim

Enis Sulejmanoviq

Selim Kryeziu

Ministria e Tregtisë dhe Industrisë

Nexhat Ramadani

Qerim Bajrami

Ministria e Pushtetit Lokal

Fatbardha Emini

Magbule Shkodra

Ministria e Drejtësisë

Florian Dushi

Ministria e Zhvillimit Rajonal

Eldis Abazi

Janë liruar nga detyra

Milan Radojeviq

Erxhan Galush

Sema Ispahiu

I vdekur

Nehat Ramadani