6 perditesime

Politologu Behlul Beqaj ka thënë se aktgjykimi i Gjykatës Kushtetuese i publikuar sot në version të plotë e ka komplikuar edhe më shumë situatën në të cilën ndodhet vendi.

21:17

Beqaj: Vjosa Osmani përmbush të gjitha karakteristikat e një lidereje

Behlul Beqaj ka thënë se Vjosa Osmani i përmbushë të gjitha karakteristikat e një lideri.

Ai tutje ka shtuar se karshi Albin Kurtit, të dy kanë përparësi ndaj kandidatëve tjerë.

Ai ka thënë se Osmani mund të jetë faktor i ndryshimit.

“Unë jam ithtarë i mbështetjes së Vjosa Osmanit për shkak se ka dalë kundër një lideri autoritar siç është Isa Mustafa. Si e tillë mendoj që është një lidere që ka dhënë një shembull si duhet të sillemi karshi të kërkesave të autoritarëve”, ka thënë ai.

Ai ka thënë se Nisma Socialdemokrate e AKR nuk mund ta kalojnë pragun. Sipas tij, ndryshe do të ndodhë nëse ato hyjnë në familjen e ndonjë partie tjetër.

21:04

Beqaj: Nëse partitë humbëse formojnë qeverinë mund të kemi protesta masive në rrugët e Prishtinës

Politologu Belul Beqaj ka thënë se nëse partitë humbëse në zgjedhjet e ardhshme të Kosovës e krijojnë qeverinë, e që ka ndodhur në të kaluarën edhe me vendim të Kushtetueses, atëherë mund të ketë pakënaqësi të mëdha, e protesta masive në rrugët e Prishtinës.

Ai ka ngritur një paralele me situatën e tensionuar në SHBA, ku përkrahësit e Donald Trumpit janë futur në ndërtesën e Capitolit dhe kanë punuar punën e Senatit.

“Kushtetuta jonë na mëson, pavarësisht se nëse nuk je fitues i zgjedhjeve, ka gjasa që partitë humbëse të bëjnë koalicion e ta marrin qeverisjen. Ka ndodh kjo e mund të ndodhë prapë. Por, çfarë pasoja mund të shkaktohen. Kjo që po ndodh sot në SHBA, është ndoshta e kundërta. Por, tek ne e kemi situatën ndryshe. Nëse ndodh përsëritet ajo që ka ndodhur, atëherë do të kemi protesta masive në rrugët e Prishtinës, që do të mund të destabilizonin sigurinë e vendit. Nuk duhet të përsëritet një skenar që e destabilizon vendin”, ka thënë Beqaj në DESKUN e KOHËS.

Ai ka thënë se edhe moslejimi i kandidimit të Albin Kurtit për kryeministër mund të përcillet me protesta.

21:02

Baliqi: Është parë që vijat e kuqe janë të pavërteta

Politologu Bekim Baliqi ka deklaruar se vijat e kuqe të vendosura nga partitë politike në vend janë të pavërteta. Sipas tij, partitë kanë gabuar kur kanë thënë se kanë vija të kuqe sepse sipas tij, nuk janë respektuar.

“Është parë që vijat e kuqe janë të pavërteta. Temat siç janë të dialogut dhe e presidentit, e vetmja mundësi është që dy parti të mëdha të krijojnë një qeveri stabile”, ka deklaruar Baliqi.

Ai ka potencuar se pas zgjedhjeve parlamentare, Lëvizja Vetëvendosje duhet të krijojë Qeverinë me dy parti më të vogla që të jetë koalicion stabil.

“Pas zgjedhjeve, VV-ja duhet të bëjë koalicion me një apo dy parti më të vogla, por në rast se janë çështje për presidentin apo negociatat me Serbinë, atëherë i duhen më shumë”, ka thënë ai.

Në anën tjetër, analisti Behlul Beqaj, ka thënë se partitë politike duhet bërë reforma brenda tyre mirëpo kjo duhet bërë para zgjedhjeve. Ai ka shtuar se partitë e kapura nga brenda kanë shkaktuar një lloj privatizimi të pushtetit dhe partitë.

“Duhet bërë në lloj guximi për t’i thënë mjaft privatizimit të pushtetit dhe partisë. Koncentrimi i pushtetit në disa pengesa serioze ka shkaktuar problematika të tilla. Në kuadër të ndryshimeve, mendoj se një nga hapat që duhet bërë është të ndiqen sugjerimet për demontimin e politikës brenda partisë”, ka deklaruar Beqaj.

Ai ka shtuar se partitë e kapura nga brenda kanë shkaktuar kapje të pushtetit, ku sipas tij, është krijuar një sistem i udhëhequr nga joprofesionistët, të pandershmit dhe të paaftët.

20:50

Baliqi e Beqaj pajtohen se LDK-ja do të ndëshkohet nga elektorati

Politologët Bekim Baliqi dhe Behlul Beqaj janë pajtuar Lidhja Demokratike e Kosovës do të pësojë rënie në zgjedhjet të cilat do të mbahen në shkurt.

Baliqika thënë se ajo çfarë është parë nga zgjedhjet në rajon tregon se qytetarët i kanë ndëshkuar partitë në pushtet.

Ai ka thënë se është e qartë se një pjesë e madhe e elektoratit e ka një orientim ndryshues.

Baliqi ka thënë se partitë të cilat kanë qeverisur në Qeverinë Hoti do të pësojnë ndëshkim edhe për shkak të rrëzimit të Qeverisë Kurti por edhe për shkak të qeverisjes gjatë kohës së pandemisë.

“Ajo çka duhet të bëjnë partitë opozitare është që duhet të fokusohen në program. Duhet të afrojnë elektoratin e pavendosur. Dallimi do të jetë te përqindja e daljes në zgjedhje”, ka thënë ai.

Ai ka thënë se çfarëdo premtimi që jep LDK-ja për rimëkëmbje është ofenduese për ata që janë në nevojë.

Sipas tij goditje për këtë parti është edhe dalja e Vjosa Osmanit.

“Nuk mendoj që LDK-ja mund të bëjë një surprizë apo reformë. Lista me Vjosa Osmanin ka gjasa reale që të jetë në Kuvend dhe të marrë një pjesë të elektoratit”, ka thënë ai.

Edhe Behlul Beqaj ka thënë se LDK-ja e ka humbur betejën më 6 tetor 2019.

Ai thotë se do të ishte mirë që Isa Mustafa të hiqte dorë nga drejtimi i partisë për shkak se ai po i bën dëm partisë.

“Unë besoj që LDK-ja do të bie shumë. LDK-ja mendoj që është e kapur nga disa autoritar dhe nga shumica e servilëve”, ka thënë ai.

Beqaj ka folur edhe për PDK-në. Sipas tij slogani “Liria ka emër” por sipas tij edhe kriminelet serb që kanë bërë krime kanë emër e kanë mundur të zbulohen nga ata që nuk janë këtu. Do të shkojë një llogarie dhe për ta. Mendoj se do të bie edhe përqindja e PDK-së në masën që e meriton PDK-ja”.

20:39

Beqaj: Në zgjedhjet e radhës do të pësojnë partitë që janë sinonim për kapje të shtetit

Politologu Belul Beqaj ka thënë se në zgjedhjet e jashtëzakonshme ai pret që të fitojnë ato parti që premtojnë ndryshimin, e të pësojnë partitë që janë sinonim për kapje të shtetit si PDK-ja, AAK-ja, LDK-ja apo Nisma.

Ai në DESKUN e KOHËS, insiston se qytetarët tashmë kanë prerë mendjen se për kë do të votojnë.

“Mendoj se ideologjia absolutisht do të ketë injorancë totale kësaj radhe, votuesi do të votojë në bazë të asaj që e ka prerë në kokën e vet me rrëzimin e Qeverisë Kurti. Besoj se ndërgjegja e qytetarëve të zakonshëm ka arritur masën kritike ku do të vendosë ose të shkojë me partitë që janë sinonim të kapjes së shtetit ose me partitë që potencialisht mnd të paraqiten si çkapëse e shtetit. Në këto zgjedhje besoj se do të fitojë ana e atyre që premtojnë ndryshimin, do të pësojnë të gjitha ata që në forma të ndryshme, periudha të ndryshme, janë sinonim për shtetin e kapur, qoftë PDK-ja, LDK-ja, AAK-ja apo Nisma. Gjitha ofertat që vijnë besoj se nuk do të kenë ndikimin që e kanë pasur”, ka thënë Beqaj.

Ai ka shtuar se beson se LVV-ja dhe lista e Vjosa Osmanit do ta marrin shumicën e konsiderueshme.

“Unë mendoj se do ta marrin shumicën e konsiderueshme”, ka shtuar Beqaj.

Ai ka thënë se beson se më pas mund të arrihet marrëveshje më pas me ndonjë parti nga ato që janë sinonim për kapje të shtetit, e cila do të bëjë ndonjë reformim.

“Nuk përjashtohet mundësia që mes fituesve që janë sinonim për ndryshimin dhe partive të gatshme për të bërë reforma të brendshme në kuadër, të arrihet marrëveshje për qeverisje lokale. Do të ishte normale. Nuk është normale nëse këto parti nuk e kuptojnë nevojën për ndryshime”, ka deklaruar Beqaj.

20:27

Baliqi: Kushtetuesja ka lënë paqartësi me aktgjykimin e fundit

Politologu dhe njohësi i çështjeve politike, Bekim Baliqi, ka deklaruar se aktgjykimi i Gjykatës Kushtetuese ka sjell paqartësi të mëdha me vendimin e fundit. Ai ka deklaruar se ky vendim nuk e ka precizuar se deri në çfarë mase kanë të drejtë partitë të garojnë dhe se çfarë kandidatë duhet të fusin në lista zgjedhore.

“Kjo mendoj se duhej qartësuar nga Komisioni Qendror i Zgjedhjeve, duhet të ketë një koordinim mes KQZ-së dhe procesit zgjedhor kur kandidatët kanë të drejtë të konkurrojnë. Në aspektin politik është proces i lënë me shumë kuptimësi”, ka deklaruar Baliqi në emisionin Desku të KTV-së.

Ai ka potencuar se vendi ka hyrë tashmë në parafushatën zgjedhore dhe partitë po bëjnë përhapje të premtimeve të tyre.

“Mendoj se partitë kësaj here do të jenë më të kujdesshme në koalicionet parazgjedhore. Ato kanë treguar se mund të përfitojnë në ndarje të pushtetit, ka pasur parti me më shumë ministri se deputetë. Me këtë kanë pësuar partitë e mëdha”, ka deklaruar Baliqi.

Ai ka theksuar tutje se partitë e vogla do ta kenë të vështirë mbijetesën politike për shkak të komunikimit me qytetarët, si pasojë e koronavirusit.

20:22

Beqaj: Aktgjykimi i Kushtetueses e ka komplikuar edhe më shumë situatën

Politologu Behlul Beqaj ka thënë se aktgjykimi i Gjykatës Kushtetuese i publikuar sot në version të plotë e ka komplikuar edhe më shumë situatën në të cilën ndodhet vendi.

Ai në DESKU-n e KOHËS ka thënë se me një veprim të tillë ka lënë hapësirë që edhe po t’i fitojë zgjedhjet Albin Kurti i VV-së apo ndonjë tjetër, përsëri dikush t’i drejtohet Kushtetueses.

“Ka krijuar një konfuzion juridik që me këtë aktvendim e ka komplikuar edhe më shumë situatën për faktin që ndoshta do të ndalohet çështja e kandidimit për deputetë, por sipas të gjitha gjasave ajo që e pash në këtë aktgjykim që nesër pasnesër nëse Kurti bëhet kryeministër dhe dikush i drejtohet Kushtetueses atëherë besoj që është prapavijë që e komplikon situatën edhe pas këtyre zgjedhjeve”, ka thënë ai.

Ai thotë se nuk është sqaruar asgjë vetëm se e ka komplikuar këtë situatë.

Beqaj ka thënë se ka mbivalencë duke bërë që edhe juristët të kenë mendime të ndryshme.

Ai ka thënë se ka shumë kundërthënie, duke shtuar se janë përzier kompetencat e ligjit me Kushtetutën.

“Kjo rikonfirmon nevojë për rishikim të Kushtetutës”, ka shtuar ai.