5 perditesime
13:08

Përfundon seanca, konferenca e ardhshme ndaj Thaçit e të tjerëve në fund të janarit

Ka përfunduar seanca ndaj Hashim Thaçit, Kadri Veselit, Rexhep Selimit e Jakup Krasniqit në Speciale.

Prokurori Allan Tiger dhe gjykatësi Nicolas Guillou, kanë kërkuar që konferenca e ardhshme ndaj Hashim Thaçit, Kadri Veselit, Jakup Krasniqit e Rexhep Selimit të mbahet në fund të janarit të vitit 2021.

Këtë e kanë pranuar edhe mbrojtjet e tyre.

Gjykatësi Nicolas Guillou, ka kërkuar të dijë se cila është një datë e përshtatshme për konferencat e ardhshme.

Prokurori Allan Tiger ka kërkuar që konferenca e ardhshme të zhvillohet në janar.

“Ka rrethana kur kjo është më e rëndësishme, ku mund të merren përgjigje për disa pyetje”, tha Prokurori, duke shtuar se gjykata nuk duhet të lejojë të ketë periudha të gjata kohore mes konferencave", tha ai. 

“Deri tani kemi pasur konferenca për ecurinë e çështjes, 1 herë në muaj. Propozoj që e ardhshmja të jetë në fund të janarit”, tha Avokati David Hooper përfaqëson Hashim Thaçin.

“Menaxhimi i përgatitjes për gjykim është proces i rëndësishëm. Dhe duke marrë parasysh parashtrimin e Tiger se mbrojtja po përpiqet të stërzgjasë procesin e përgatitjeve të veta, është i pavend. Ne pajtohemi që mbajtja e konferencave 1 herë në muaj është në parim si duhet të bëhet në mënyrë të shkëmbehen informacionet. Afati apo orari për konferencën e ardhshme do të sugjeroja të ishte 18 janari 2021”, tha mbrojtja e Kadri Veselit, Ben Emmerson.

“Edhe unë propozoj që konferenca të mbahet pas një muaji”, tha avokatja malajziase Venkateswari Alagendra që përfaqëson Jakup Krasniqin.

Derisa edhe avokati britanik David Young që përfaqëson Rexhep Selimin, tha se “pajtohet me këtë”.

Gjykatësi Guillou, tha se shpejt do të caktohet data e saktë për këtë.

“Edhe unë ndaj mendimin që të paktën një herë në muaj të mbahen konferencat ku të bashkërendohen mendimet. Dua që këto përgatitje të jenë sa më të shpejta dhe palët të bëjnë përgatitjet e tyre që të kryhet një gjykim i shpejtë”, tha ai.

13:00

Mbrojtja e Thaçit e të tjerëve thonë se 18 muaj janë minimumi që iu duhen për përgatitje

Avokatët mbrojtës të të akuzuarve kanë thënë se 18 muaj janë minimumi që i duhet mbrojtjes për t’i bërë përgatitjet.

Avokati i ish-presidentit Hashim Thaçi, David Hooper, ka thënë se ende nuk kanë filluar të mendojnë sa i përket nisjes së hetimeve. Ai ka thënë se është herët, pasi sipas tij, sapo i kanë marrë materialet dhe ende nuk kanë krijuar pikëpamje lidhur me materialin.

Ai ka thënë se afati 18 mujor është minimumi që ata parashikojnë për të filluar që të shikojnë nëse kanë ekipin dhe aspektet e nevojshme për t’u bërë hetimet e nevojshme, e pastaj kjo, sipas tij do të fillonte në vitin 2022.

“Nëse mua më flasin për një proces të rregullt gjyqësor unë mendoj që është e pakonceptueshme por duhet të them se këto fjalë të prokurorisë janë zhgënjyese. Ne ende nuk kemi filluar ta krijojmë ekipin hetimor”, ka thënë ai.

Avokati i Veselit, Ben Emmerson ka thënë se kanë marrë hapat paraprak për krijimin e një mekanizmi hetimor.

Sipas tij, mbrojtja duhet të kryej hetim më të gjerë për të gjitha akuzat.

“Nëse mund ta them për çështjet tjera gjyqësore kjo është tepër e pazakontë. Janë ngritur dyshime kundër të akuzuarve që përpiqet t’i lidhë ata me krime që nuk kanë qenë të përzier”, ka thënë ai.

Ai ka thënë se kanë identifikuar një hetues me përvojë në Kosovë që është pjesë e ekipit të mbrojtjes. Ai tutje ka shtuar se do të rekrutojnë deri në gjashtë hetues.

Emmerson ka propozuar një ekspert ndërkombëtar për mbikëqyrjen e hetuesve të kualifikuar.

Ai ka thënë se gjyqi mund të fillojë në fillim të vitit 2023.

12:45

Avokati i Veselit e quan “gijotinë” kërkesën e Prokurorisë që gjykimi të nisë në shtator

Ben Emmerson, avokati i ish-kryetarit të Kuvendit të Kosovës, Kadri Veseli, ka kërkuar Prokuroria të pushojë së paraqituri prova kur të do, ndërkohë që e ka quajtur “gijotinë” kërkesën e saj që gjykimi të fillojë në shtator.

Emmerson ka kundërshtuar idenë e avokatit të Prokurorisë, Allan Tiger, që të dorëzojë dosjen e saj në gjykatë në qershor ose korrik, me kushtin që gjykimi të nisë në shtator.

“Kjo nuk është vetëm qesharake, por edhe absurde. Duhet të ndalet kjo gijotinë e Prokurorisë. Ajo që Tiger sapo tha, është shqetësim mjaftë i rëndë. Habitem se si prokuroria i jap këto përgjigje. Është një parashtrim shokues, ka vetëm një arsye, që të kufizojë mundësinë e mbrojtjes për përgatitje, në qoftë se rregullat thonë që për një gjykim mbrojtja duhet të ketë pak kohë për përgatitje është në rregull, por nuk e thonë. Afati përcaktohet nga kompleksiteti i rastit”, ka thënë Emmerson.

Ai ka paralajmëruar që bashkëngjitur me kërkesën për lirim të klientit të tij, Veselit, do të dorëzojë edhe prova që dëshmojnë se përgatitjet për mbrojtje në raste të tilla kanë marrë deri në 3 vjet e gjysmë. Ka përmendur edhe gjykimin e Ramush Haradinajt në Hagë.

“Është qesharake, është përpjekje e prokurorisë për të pasur një gjykim të padrejtë”, shtoi avokati i Veselit.

12:30

Prokuroria s’jep datë për përfundimin e hetimeve ndaj Thaçit e të tjerëve

Prokuroria e Dhomave të Specializuara nuk ka dhënë datë për përfundimin e hetimeve.

Prokurori ka thënë se është në interes që hetimet të mos ndërpriten për shkak se sipas tij mund të paraqiten dëshmitarë të rinj.

“Lidhur me pyetjen nëse ka datë për përfundimin e hetimeve dua të theksojë se këto përcaktohen nga procedurat e provave, përdorimi i deklaratave. Kjo siguron që përgatitja e shpejtë të mos ndërpritet, kjo përputhet edhe me përvojën e tribunaleve që hetimet të vazhdojnë. Kjo ka interes pse duhet hetimet të vazhdojnë duke u nisur nga shtimi i dëshmitarëve që deri tash kanë pasur frikë për dorëzimin e materialeve që kanë qenë të fshehura”, ka thënë ai.

Ai ka thënë se nuk janë në gjendje të japin një datë për përfundimin e hetimeve, pasi kjo do të ndikonte në objektivin e tyre.

“Për sa i takon vlerësimit se kur do të jenë në gjendje ta parashtrojnë dosjen gjyqësore, në këto rrethana do të ishim të përgatitur ta parashtronin dosjen para gjyqësorit në fillim të korrikut”, ka thënë ai.

12:01

Prokuroria Speciale thotë se ka nxjerrë 1764 dokumente

Prokuroria e Hagës, në nisje të seancës ndaj Hashim Thaçit, Kadri Veselit, Rexhep Selimit e Jakup Krasniqit, ka folur rreth nxjerrjes së dokumenteve.

“Në lidhje me procesin e nxjerrjes së materialeve deri tani prokuroria i ka dorëzuar 1309 materiale potencialisht shfajësuese, dhe kemi bërë nxjerrjen e materialeve mbështetëse, në gjuhën shqipe dhe angleze. Kemi nxjerrë edhe deklarata nga të akuzuarit. Materialet në bazë të rregullës 102/1, prokuroria ka nxjerrë 1764 dokumente, duke marrë parasysh dokumente që kanë probleme teknike. Po kryejmë kontrolle të hollësishme për t’i hequr të gjitha vështirësitë teknike”, tha prokurorja.

Këto dokumente, ka thënë Prokuroria, do t’ia japë më pas mbrojtjes.

Avokati David Hooper përfaqëson Hashim Thaçin, avokatja malajziase Venkateswari Alagendra do ta përfaqësojë Jakup Krasniqin, avokati britanik David Young, Rexhep Selimin dhe britaniku Ben Emmerson, Kadri Veselin.


Mbrojtja e të akuzuarve kërkon që dorëzimi i dokumenteve të jetë i organizuar

Avokati i Thaçit, David Hooper ka thënë se materialet e prezantuara janë të pamjaftueshme dhe të papërshtatshme. Ai ka thënë se janë bërë punë në përgjithësi dhe jo të specifikuara.

“Ju jeni në dijeni për formatin e listës që ka shoqëruar materialin që keni dorëzuar. Këto materiale janë të pamjaftueshme dhe të papërshtatshme. Janë bërë punë në përgjithësi dhe jo të specifikuara. Kur ceken krimet duhet të jenë krime kundër njerëzimit apo çfarë krime. Në lidhje me nxjerrjen e materialeve neve na duhet informacion për kategoritë por edhe për llojin e materialit na jepet”, ka thënë ai.

Sa i përket origjinës së dokumentit, kronologjia e ruajtjes së dokumentit na duhet, na duhet kush e ka pasur në dorë dhe kush e ka ruajtur.

Avokati i ish-kryetarit të PDK-së Ben Emmerson ka thënë se është detyrim i prokurorisë që t’i plotësojë kërkesat e nxjerrjes së materialeve sipas legjislacionit.

“Nuk është praktike që në këtë fazë mbrojtja të bëjë parashtrime me përshtatshmërinë e materialeve”, ka thënë ai.

07:55

Seancë e re për Thaçin dhe të tjerët në Speciale

Gjykata Speciale në Hagë, sot do të mbajë seancë të re për ish-krerët e Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi e Jakup Krasniqi.

Seanca pritet të nisë në orën 11:00 dhe do të jetë konferencë statusore mbi ecurinë e çështjes, siç ishte mbajtur edhe më 18 nëntor.

Mbrojtja, sipas kërkesës së gjyqtarit të procedurës paraprake, është dashur që të dërgojë parashtresat me shkrim deri më 15 dhjetor. \ ksp