Kryetari i Lëvizjes Vetëvendosje, Albin Kurti, iu është falënderuar qytetarëve të Podujevës për fitoren e Vetëvendosjes në zgjedhjet komunale që u mbajtën dje në këtë komunë.

Ai ka thënë se shqiptarët duan ta ndryshojnë përfaqësimin politik e ta reformojnë vetën.

Kurti ka shkruar se bashkatdhetarët dikur kanë mërguar jashtë Kosovës për shkak të të këqijave të shtetit okupator serb.

“E, ka kohë që shqiptarët po shpërngulen për shkak të pushteteve tona të këqija. Ama së fundmi, ata kanë nisur ta përjetojnë këtë si një ikje nga vetja, si një deformim nga stërzgjatja. Në shekullin XX, gjyshi e babai ishin gastarbeiter, e tash njësoj u dashka edhe djali e nipi në shekullin XXI?”, ka shkruar ai.

Kurti ka thënë se nuk mund të vazhdojë mërgimi që të vazhdojë sundimi.

“Shqiptarët duan ta ndryshojnë pamjen në pasqyrë, ta ndërrojnë përfaqësimin politik, ta reformojnë veten. Pra, dëshirojnë ta bëjnë vetveten, t’i përbëjnë institucionet, e jo të bëjnë si u thonë ata prej atje lart e larg, që pasurohen gjersa përbetohen. Njerëzit duan të qëndrojnë, teksa kërkojnë drejtësi dhe punë, tash dhe këtu”, ka shkruar ai. “Shumë kohë të vlefshme kemi humbur të dashur qytetarë. Shpejtimi është i domosdoshëm. Urime të gjithëve fitorja në Podujevë e ngritja në Mitrovicë, dhe, ju faleminderit secilit prej jush!”.