8 perditesime

Leonora Kryeziu nga PIPS në emisionin Desku në KTV ka thënë se Kosova është në një rrugë të paqartë.

Ajo ka thënë se Raporti i Progresit ka treguar se pak progres ka bërë Kosova.

“Raporti i Progresit vë në

23:00

Shasha: Klasa politike po dëshmon që s’ka pjekuri për ta luftuar Covidin, e lëre më për reforma

Image

Demush Shasha nga Instituti EPIK ka thënë se klasa politike në Kosovë po e dëshmon se nuk ka pjekurinë e nevojshme as të mbrojë qytetarët e vet nga COVID-19, e lëre më të diskutojë reformat komplekse të integrimit evropian.

Shasha ka thënë se Bashkimi Evropian ka dëshmuar se Kosova është e rëndësishme për të dhe ka gjetur mënyra për ta ndihmuar Kosovën. Por, problemi është te mungesa e interesimit të klasës politike për të ndërmarrë reforma në rrugën tonë integruese.

“Është e rëndësishme dhe BE-ja ka dëshmuar se Kosova është e rëndësishme për BE-në. Kosova është vendi i dytë në botë që pranon fondet më të mëdha për kokë banori nga ana e BE-së. BE-ja, përkundër që Kosova nuk njihet nga pesë vende anëtare, çdoherë ka gjetur rrugë për ta trajtuar Kosovën të barabartë me vende tjera të rajonit. Unë e konsideroj se patjetër që Kosova dhe gjithë Ballkani Perëndimor është i një rëndësie gjeopolitike për BE-në”, ka thënë Shasha për DESKU-n në KTV. “Por problemin ku po e shoh unë, veçanti në vitet e fundit, është mungesa e interesimit të klasës politike për të ndërmarrë reforma në rrugën tonë integruese. Nganjëherë më duket diskutim tepër ambicioz të gjesh interesim politik në kuadër të spektrit politik në Kosovë për çështje të integrimit evropian. Në të njëjtën kohë e ke një klasë politike që në mes pandemisë, ballafaqimit me virusin vdekjeprurës, i lë interesat dhe jetët e qytetarëve anash, për të zhvilluar beteja ditore politike të rëndësisë krejt sekondare. Një klasë politike që rrëzon një qeveri dhe e ngrit qeveri tjetër, një klasë politike që në mes pandemisë nuk dakordohet për ligj për mbrojtje të qytetarëve të vet nga pandemia. Klasë politike që sot ende nuk është në gjendje të dakordohet se si të ndihmojë qytetarëve për t’u ballafaquar me presionin ekonomik që vjen nga pandemia me paaftësinë e tyre për të miratuar ligjin për rimëkëmbje ekonomike. Në këtë kontekst të kërkosh vullnet politik për reforma siç është vettingu, për reforma siç është ndihma shtetërore, më duket e pamundshme. Sepse klasa politike po dëshmon se nuk e ka pjekurinë e nevojshme të mbrojë qytetarët nga një pandemi vdekjeprurëse, e lëre më të diskutojë reformat komplekse të integrimit evropian”.

21:30

Kryeziu: Kosova duhet të ketë koordinim ndërinstitucional që të thithë fondet e BE-së

Image

Leonora Kryeziu nga PIPS-i ka thënë se Kosova duhet të punojë edhe më shumë dhe ketë koordinim ndërinstitucional në mënyrë që të thithë edhe më shumë fonde nga BE-ja.

“Kosova është gjithmonë e fundit në shfrytëzimin e fondeve të cilat janë në dispozicion nga BE-ja, këtu ka nevojë shumë për të punuar edhe në kapacitete njerëzore por edhe në koordinim ndërinstitucional për me pas aftësi për me i thithë këto fonde”, ka thënë Kryeziu.

Sipas saj mund të jenë disa faktorë që kanë sjellë deri në një situatë të tillë.

“Padyshim se vullneti politik dhe një paqëndrueshmëri politike e jep efektin e vet. Gjithashtu përgatitja e institucioneve por edhe përgatitja në përgjithësi karshi integrimeve janë faktorë që kanë ndikuar në masë të madhe në mos sukses”, ka thënë Kryeziu.

Ajo ka thënë se interesimi i klasës politike për këto çështje është zero.

“Projektet shumë të mëdha që kanë të bëjnë me energjinë ose pak sukses ku kemi pas prapa tyre kanë qenë ose një donator i madh si Gizi e Banka Botërore që kanë një shtytje në implementimin e këtyre projekteve. Në masë të madhe mendoj se ka ngecje. Interesimi i deputetëve dhe klasës politike për t’i shtyrë këto gjëra përpara mund të them se është zero. Transicioni energjetik është kalimi nga thëngjilli në energji të pastër”, ka thënë ajo.

21:15

Shasha: S’ka alternativë tjetër pos BE-së

Image

Demush Shasha nga Instituti EPIK ka thënë se procesi i integrimit në BE është program i mirë për të sjellë Kosovën në një gjendje të mirë shëndetësore. Ai ka thënë se procesi është dëshmuar që të asistoj vendet në evropianizimin e tyre.

Duke pasur parasysh këtë ai ka thënë se nuk duhet të kesh alternativë tjetër pos BE-së.

“Nuk ka alternativë ndaj BE-së. Pse të kesh alternativë ndaj sundimit të ligjit, ndaj mjedisit të pastër. Ai destinacioni i fundit, nuk është i rëndësishëm, në atë sens mund të mos jemi anëtare të BE-së. Por ta themi sikur ato programet për humbje të peshës, procesi i integrimit është një program i mirë për të sjellë shtetin në një gjendje të mirë shëndetësore. Në këtë sens, procesi i integrimit është dëshmuar të ketë vlerën unike, të asistojë vende të ndryshme në evropianizimin e tyre. Në mënyrë që qytetari i Malishevës, i Suharekës, të ketë standard të njëjtë jetësor si qytetari i Nices e Berlinit. Përderisa ky është qëllimi përfundimtar, atëherë nuk duhet të kesh alternativë tjetër. Kur vjen dita a do votojmë të jemi anëtar të BE-së apo nuk dëshirojmë të jemi anëtar, është më pak e rëndësishme përderisa arrijmë qëllimin. Ky është synimi i secilit qytetar të Kosovës”, ka thënë Shasha në DESKU-n në KTV.

21:02

Kryeziu: Integrimi evropian i Kosovës peng i dialogut me Serbinë

Image

Drejtoresha e Institutit të Prishtinës për Studime Politike (PIPS), Leonora Kryeziu, ka thënë se procesi i integrimit evropian të Kosovës është peng i dialogut me Serbinë dhe njohjes nga Serbia.

Kryeziu ka thënë se këto ngjarje kanë bërë që procesi i integrimit të Kosovës të shkojë disa hapa prapa.

“Gjithsesi se është peng. Gjatë rrugëtimit të saj në vitet e fundit, e sidomos pas vendimit të GJND-së dhe hapjes së procesit të negociatave me Serbinë, Kosova ka hyrë në rrugëtimi, ku e pamë, deri para një viti, ku edhe vet statusi final i Kosovës rrezikonte të futej në diskutim. Ky diskurs patjetër dhe krejt këto ngjarje, kanë bërë që procesi i integrimit të Kosovës në BE të shkojë disa hapa prapa. Prej stopimit të njohjeve e deri te anëtarësimi në organizata shumëpalëshe. Kemi rastet e plotë organizatave ku Kosova ka synuar anëtarësimin, por të cilat rezervohen, me arsyetimin se duhet të presin finalizimin e dialogut mes Kosovës dhe Serbisë për të ecur para”, ka deklaruar Kryeziu për DESKU-n në KTV. “Shumë e qartë është për çudi, nganjëherë mendoj edhe nënshkrimi i marrëveshjes së MSA-së edhe këtë nuk e konsiderojmë si arritje, me të vërtetë ishte arritje e madhe për Kosovën dhe vendet anëtarë të BE-së që të vijnë në një zgjidhje të mundshme, t’i hapin Kosovës mundësinë. Tani dialogu Kosovë – Serbi dhe çështja e marrëveshjes e ka marrë rolin primar në atë se si Kosova do të mund të ec para”.

21:01

Shasha: Kosovës i iku treni më 2016 për liberalizimin e vizave

Image

Demush Shasha nga Instituti EPIK ka thënë se Kosova e pati rastin e liberalizimin të vizave në vitin 2016, por klasa politike nuk e ka shfrytëzuar këtë rast.

Ai thotë se çështja e liberalizimit të vizave duhet ndarë në dy diskutime.

“E para që duhet thënë është se, është e padrejtë që qytetarët e Republikës së Kosovës janë të vetmit në kontinentin evropian pa të drejtë të lëvizjes së lirë në zonën shengen. Pasi që e themi këtë kalojmë te pjesa e dytë se kush është përgjegjës për këtë. Dhe këtu konsideroj se ky folklor politik që BE-ja nuk na do, nuk na mbështet, BE-ja nuk po i respekton obligimet e saj etj”, ka thënë Shasha. “Më çon mallin e atyre studentëve jo të mirë të cilët pasi që të ngelin në provim akuzojnë profesorin për ndonjë padrejtësi”.

Sipas tij në vitin 2016 BE-ja ofroi liberalizimin e vizave për Kosovën dhe së bashku me Gjeorgjinë dhe Ukrainën.

“Ne e patëm mundësinë që të lëvizim lirshëm në Evropë. Dhe në atë moment, në vitin 2016, nuk ishte BE-ja e cila zgjodhi një rrugë të një katrahure politike që pasoi me demarkacion, por ishim ne. Klasa jonë politike e cila tha që neve nuk na intereson izolimi i qytetarëve tonë. Ne duam të qërojmë hesape politike ditore në këtë temë. Dhe treni i majit 2016 ka ikë. BE-ja e 2020-s nuk është ajo e 2016-s. Rrjedhimisht përgjegjësinë duhet kërkuar tek klasa jonë politike”, ka thënë Shasha.

20:52

Palokaj rreth vizave: Kosova po e paguan çmimin e problemeve të brendshme dhe të BE-së

Image

Korrespondenti i KOHËS në Bruksel, Augustin Palokaj ka thënë se sa i përket liberalizimit të vizave, nëse një gjë e tillë nuk ndodh gjatë Presidencës gjermane, skepticizmi mund të rritet.

"Gjithmonë, jo vetëm gazetarët por edhe diplomatët në Bruksel thonë se nëse nuk mundet Gjermania të bëjë diçka, atëherë parashtrohet pyetja se kush mundet. Pra, skepticizmi mund të rritet se nëse nuk ndodh gjatë Presidencës gjermane, atëherë si mund të ndodhë në vitin që vjen", ka thënë ai në DESKU të KTV-së.

Si ka thënë Palokaj, është parë se disa shtete vazhdojnë të jenë skeptike.

"Edhe kur Komisioni Evropian thotë se Kosova i ka përmbushur të gjitha kriteret, ka shtete që nuk i besojnë as Komisionit Evropian dhe kjo nuk është hera e parë", ka shtuar Palokaj.

Rrjedhimisht, si ka thënë ai, pa vendimin e Komisionit Evropian se janë përmbushur kriteret, procesi nuk lëviz.

"Por edhe kur të vijë vendimi i Komisionit Evropian dhe propozimi apo rekomandimi, kjo nuk do të thotë me automatizëm që shtetet anëtare do ta përfillin", ka thënë korrespondenti i KOHËS.

Sipas tij, Kosova vazhdon ta paguajë çmimin e problemeve që ekzistojnë "së pari në Kosovë, sepse ka vërejtje për sundimin e ligjit dhe për mungesë të rezultateve konkrete në luftë kundër krimit të organizuar dhe korrupsionit në nivel të lartë, e sidomos në konfiskimin e pasurisë së arritur në mënyrë të paligjshme, si thuhet edhe në këtë raport. Por, ka problem edhe te shtetet anëtare, që kanë një përvojë të keqe me shtetet të cilave u janë hequr vizat kohë më parë, sidomos me Shqipërinë dhe Gjeorgjinë dhe tani janë më skeptike në rastin e Kosovës".

"Pra, është një çmim që po e paguan Kosova. Por gjithsesi, unë mbetem një optimist i rezervuar dhe do të isha shumë i lumtur nëse Gjermania do ta shtynte këtë gjë. Dhe, Komisioni sot i ka dhënë një rast, duke kërkuar që në mënyrë urgjente të trajtohet kjo në Këshill dhe presim se si do të reagojë tash Gjermania, e cila vazhdon ta ketë kryesimin e radhës deri në fund të vitit", ka thënë Palokaj.

20:38

Palokaj: Raporti i Progresit tregon se aty ku mund të bëhen gjëra, mungon vullneti politik

Image

Korrespondenti i KOHË-s në Bruksel, Augustin Palokaj, në emisionin Desku në KTV ka thënë se Raporti i Progresit ka treguar se aty ku mund të bëhen gjërat ka mungesë të vullnetit politik.

“(Punët) me Raportin e Progresit i kemi pak a shumë ashtu siç e kemi pritur dhe siç e kemi pasur edhe shumë vite të më hershme, vërejtjet janë pak a shumë të njëjta. Ku ka progres ai është i mangët ose i kufizuar. Aty ku ka kornizë ligjore për të bërë diçka nuk bëhet sa duhet dhe nuk ka rezultate në implementim. Aty ku mund të bëhen gjërat mungon vullneti politik dhe e kemi një stagnim”, ka thënë Palokaj.

Përveç Raportit të Progresit sot është prezantuar edhe një iniciativë e re e Komisionit Evropian për investime, për të cilat Palokaj thotë se ende duhet kohë për ta definuar se çfarë parasheh ku plan, megjithatë e sheh si mjaft pozitiv.

“Në shikim të parë ky plan për projekte të mëdha, përmend 9-20 miliardë euro. Gjithsesi është shumë i rëndësishëm por duket se nuk ka shumë para të reja dhe duket se gjithçka është për të planifikuar më mirë”, ka thënë ai.

20:28

Shasha: Raporti i Progresit tregon se institucionet e sundimit të ligjit janë nën presionin politik

Image

Drejtori ekzekutiv i Institutit Epik, Demush Shasha, ka thënë se Raporti i Progresit në mënyrë eksplicite tregon se institucionet e sundimit të ligjit në Kosovë janë nën presionin politik.

Shasha ka thënë se në Raportin është konfirmuar se Kosova nuk është e aftë t’i përmbushë as ato kritere që janë në kuadër të MSA-së. Madje ka edhe shkelje të disa pikave, sipas Raportit. Ai tregoi se mungon vullneti politik për zbatimin e reformave.

“Reformat në rrugën tonë integruese, të themi se kemi filluar nga një bazë e vogël, kërkesë e vogël. BE-ja po kërkon nga Kosova që të përmbushë disa kritere sikur që janë ato në kuadër të MSA-së. Por ajo që konfirmoj raporti sot është se ne nuk jemi të aftë t’i përmbushim as ato. Raporti konfirmoj se Kosova është në shkelje të disa pikave të MSA-së, e lëre më të ndërmarrë referoma të thella siç është vettingu. Nuk jemi gati për një Evropë përnime. Mungon vullneti politik për zbatim reformave evropiane, ato që i themi reforma evropiane. Nuk ka asgjë të huaj në përkufizimin reforma evropiane”, ka thënë Shasha për DESKU-n në KTV. “Raporti evidenton që brenda dy vjetëve, nga 2017 deri më 2019, përkundër gjendjes alarmante mjedisore në Kosovë, numri i deponive ilegale në Kosovë, jo që nuk është zvogëluar, por nga 1500 deponi ilegale më 2017 sot i kemi 2500 deponi ilegale. Po shkojmë në drejtim tërësisht të kundërt. Po e marrim një çështje si çështjen mjedisore. Pastaj vijmë te çështjet më të ndjeshme politike, si lufta kundër korrupsionit. Për nuk e di të satën herë konfirmohet prapë e njëjta gjë, që Kosova ka problem serioz me korrupsionin dhe nuk ka vullnet politik për të ndërmarrë hapa në adresimin e korrupsionit. Përderisa njëkohësisht në mënyrë eksplicite raporti konfirmon se institucionet e sundimit të ligjit janë nën presionin politik. Me një mjedis të tillë të zhvillimeve, nuk mund të flasim për një rrugë serioze integruese”.

20:25

Kryeziu: Kosova në rrugë të paqartë, Raporti i Progresit vë në pah mangësi të shumta

Image

Leonora Kryeziu nga PIPS në emisionin Desku në KTV ka thënë se Kosova është në një rrugë të paqartë.

Ajo ka thënë se Raporti i Progresit ka treguar se pak progres ka bërë Kosova.

“Raporti i Progresit vë në pah mangësi të shumta të cilat janë tash e sa vite. Nuk mund të gjejmë ndonjë progres të theksuar, i cili është vlerësuar në Raportin e Progresit. Edhe viti që lamë pas e lenë Kosovën me një krizë të thellë institucionale, me ngecje në reforma pothuajse gati në secilin nivel”, ka thënë Kryeziu.

Sipas saj institucionet duhet t’i kushtojnë më shumë vëmendje këtij raporti.

“Kosova gjendet në një udhëkryq, në një rrugë shumë të paqartë. A e meriton BE-ja Kosovën? Besoj se institucionet e vendit duhet të japin shumë më shumë vëmendje dhe të kemi një qartësi se çfarë me të vërtetë duam ne si shtet dhe a e kemi njëmend reformat të cilat tash e sa vite Raporti konfirmon”, ka thënë ajo.