16:12

Përfundon seanca ndaj Gucatit, brenda 30 ditëve pritet aktakuza

Ka përfunduar seanca në Gjykatën Speciale ndaj kryetarit Organizatës së Veteranëve të Luftës së Ushtrisë Çlirimtare të Kosovës, Hysni Gucati.

Avokati mbrojtës i Gucatit, Jonathan Rees , ka kërkuar lirim me kusht dhe ka thënë se është parashtruar kjo kërkesë me shkrim.

“Keni kërkuar parashtrimet me shkrim, ne duam të marrim përgjigjen nga ju dhe të kemi lirimin me kusht. Arsyet që janë në parashtrimin tonë janë të arsyeshme. Duke marrë parasysh për çfarë akuzohet z. Gucati, natyrën dhe veprat të cilat mund të bien në fushën e veprimit të kësaj gjykate. Kemi propozuar paketë të plotë kushtesh që i përmbushin shqetësimet e prokurorisë”, ka thënë Rees.

Vet Gucati ka thënë se nga periudha e arrestimit dhe edhe tash në paraburgim janë sjellë të gjithë mirë.

“Çfarë tha mbrojtësi im nuk kam çfarë të shtoj më tepër. Arrestimi im prej Prishtine deri në Holandë ka qenë i mirë. Jam invalid i luftës me shkallë invaliditetit 75 për qind. Më kanë respektuar deri në arrestim edhe në paraburgim. E falënderoj stafin që sillen në mënyrën më korrekte ndaj meje duke e marrë parasysh shkallën e invaliditetit që kam. Atë që ka thënë avokati im nuk kam çfarë të shtojë”, ka thënë Gucati.

Zyra e Prokurorit të Specializuar në Hagë tha se ka ndërmend që brenda 30 ditësh të ngrehë aktakuzë për kryetarin e Organizatës së Veteranëve të Luftës së Ushtrisë Çlirimtare të Kosovës, Hysni Gucati, i cili dyshohet se ka penguar drejtësinë, ndërkaq mbrojtja e tij kërkoi lirimin me kusht.

Gjatë paraqitjes së parë para gjykatës së Dhomave të Specializuara, gjyqtari i procedurës paraprake, Nicolas Guillou tha se mbrojta e Gucatit ka parashtruar katër ankesa me shkrim për të kundërshtuar legjitimitetin e arrestimit dhe transferimit të Gucatit në paraburgim në Hagë. Gjyqtari kërkoi nga Zyra e Prokurorit të Specializuar që deri më 2 tetor t’i përgjigjen këtyre kërkesave të mbrojtjes.

“Prokuroria e Specializuar ka ndërmend të dorëzojë aktakuzën brenda një periudhe 30 ditore”, tha prokurorja Valeria Bolici.

15:48

Mbrojtja kërkon lirimin me kusht të Gucatit

Mbrojtja e Hysni Gucatit, Jonathan Ellison Rees, ka kërkuar nga kryeprokuri Jack Smith lirimin me kusht të Hysni Gucatit.

“Gucati e ka refuzuar arrestimin dhe çështjet që ngritën brenda fletarrestimit. Z.Gucati është në paraburgim dhe mbetet në paraburgim ndërkohë që pret përgjigjen e Prokurorisë. Kërkoj nga ju z.gjykatës, dhënien e lirisë me kusht. Kam bërë edhe një kërkesë me shkrim për lirimin me kusht të z.Gucati”, tha Rees.

Mbrojtësi i Gucatit ka treguar edhe për problemet me të cilat ballafaqohet kreu i OVL-UÇK, përfshirë astmën e problemet me lëvizje.

“Kërkoj lirimin me kusht dhe ne ofrojmë garanci 5 mijë euro që ai të jetoj në adresën që i përcaktohet dhe të raportoj në policinë e EULEX-it”, tha ai.

15:33

Gucati: Nuk jam informuar për arrestimin tim deri kur EULEX-i hyri në zyre

Kryetari i OVL-UÇK, Hysni Gucati, ka thënë se fletëarrestimin e ka pranuar ditën që ishte arrestuar.

“Fletëarresti më është kumtuar ditën e arrestimit”, tha Gucati.

Gucati tha se arrestimi s’i ishte konfirmuar deri kur EULEX-i i hyri në zyre.

“Nuk jam informuar për arrestimin tim deri në momentin kur policia e EULEX-it erdhi në zyrën time”, tha tutje Gucati.

Kryetari i OVL-UÇK, Hysni Gucati, tha se pas arrestimit, kishte njoftuar djalin e tij.

“Kanë mundur të më njoftojnë vetëm mua. Nuk kanë pasur nevojë të hyjnë ashtu siç kanë hyrë zyrtarët e EULEX-it. Kanë mundur të më njoftojnë mua dhe unë do t’i kisha njoftuar vetë familjarët”, tha Gucati.

Gucati shtoi se pas rreth një orë e gjysmë, ka njoftuar djalin e tij për arrestim.

Kryeprokurori i Specializuar, Jack Smith konfirmoi se ka lëshuar fletëarrestim për Gucatin për veprën penale frikësim të dëshmitarëve, hakmarrje dhe shkelje të fshehtësisë së procedurës.

Smith tha se do të bëjë riklasifikimin e dokumenteve të dosjeve, lidhur me arrestimin dhe paraburgimin e Gucatit.

“Zyra administrative ka afat deri më 14 tetor të japë përgjigje”, tha Smith, duke shtuar se ende nuk është ngritur asnjë akuzë ndaj Gucatit.

Sipas Speciales, ekziston dyshimi i bazuar se Gucati është penalisht përgjegjës për kryerjen e veprës së hakmarrjes, në pajtim me Nenin 388 të Kodit Penal. Në mënyrë specifike, ekziston dyshimi i bazuar se Gucati mbajti tri konferenca shtypi më 7, 16 dhe 22 shtator të 2020-s, ku shpërndau apo vuri në dispozicion në forma tjera për mediat, informata konfidenciale dhe jo-publike si dhe dokumente lidhur me punën e Zyrës së Prokurorit të Specializuar, përfshirë emrat dhe detajet personale të dëshmitarëve (potencialë), rrjedhimisht duke i ekspozuar këta individë përballë rrezikut potencial për sigurinë e tyre.

15:10

Nis seanca në Speciale ndaj Gucatit

Ka nisur të enjten seanca në Gjykatën Speciale ndaj kryetarit të Organizatës së Veteranëve të Luftës së Ushtrisë Çlirimtare të Kosovës, Hysni Gucati.

Gucati u arrestua më 25 shtator në Kosovë nga Zyra e Prokurorit të Specializuar, në bazë të një fletarrestimi dhe urdhri për transferim, të lëshuara nga një gjykatës i Dhomave të Specializuara.

Gucati ishte arrestuar për vepra penale kundër administrimit të drejtësisë, përkatësisht për frikësim të dëshmitarëve.

Fillimisht, avokati i Hysni Gucatit, Jonathan Ellison Reis, ka kërkuar të mos fotografohet Gucati i rrethuar me oficerë policie, pavarësisht që kjo është traditë.

Tri herë muajin e kaluar, OVL e UÇK-së ka thënë se ka pranuar - në mënyrë anonime - dosje që lidhen me Gjykatën Speciale për krime lufte në Kosovë. Përmbajtja e këtyre dokumenteve nuk është bërë e njohur dhe nuk është konfirmuar nëse ato janë autentike ose jo.