19:48

VV-ja i përgjigjet PDK-së: Vija të kuqe për bashkëqeverisje, jo për mocion

Lëvizja Vetëvendosje i është përgjigjur Partisë Demokratike të Kosovës që ka vënë në dyshim iniciativën e të parës për mocionin për rrëzim të Qeverisë Hoti. Pasi Vetëvendosje njoftoi për nisjen e mbledhjes së nënshkrimeve për mocionin e mosbesimit, ajo u shpreh e hapur që të ndryshojë draftin e tekstit të mocionit në “varësi të bashkëpunimit me ata që e mbështesin këtë mocion”. Pas kësaj PDK-ja tha se VV-ja po kërkon bashkëpunim të drejtpërdrejtë me të. Për këtë, Uran Ismaili i kësaj partie e kishte pyetur VV-në se “ku kanë mbetur vijat e kuqe ndaj PDK-së?”

Në përgjigjen e VV-së thuhet se vijat e kuqe mbesin për bashkëqeverisje me PDK-në, por jo për rrëzim të Qeverisë Hoti. Zëdhënësi i partisë, Përparim Kryeziu, ka thënë se “siç duket janë mësuar që prapa rrëzimit të Qeverisë të fshihet gjithnjë një pazar”.

“Kështu ka ndodhur ndaj qeverisë Kurti. Por, kur Lëvizja Vetëvendosje ndërmerr hapa për rrëzimin e një qeverie ndodh sepse vlerëson që ajo duhet të shkojë për arsyet që kemi përmendur. Vijat e kuqe janë për qeverisje dhe aty ku kanë qenë vazhdojnë të mbesin, tash po flasim për rrëzim qeverie e cila objektivisht është e paaftë dhe e dëmshme. Pandemia nuk ishte arsye e mjaftueshme për të mos rrëzuar Qeverinë Kurti ndonëse po e menaxhonte suksesshëm atë, prandaj nuk ka se si të jetë sot kur kjo qeveri po na çon drejt krizës humanitare. Madje, derisa në rastin e Qeverisë Kurti mocioni i mosbesimit ishte ndërprerje e kujdesit për mirëqenien e shëndetit publik, sot mocioni është ndërhyrje e domosdoshme për të siguruar kujdes për të e për të ndaluar përkeqësim të tij. Nisma për mocion ka filluar, qëndroni prapa qëndrimeve publike”, ka shkruar ai në Facebook.

18:15

PDK: VV-ja po bën show politik me mocionin për rrëzimin e Qeverisë

Sekretari i Përgjithshëm dhe deputeti i Partisë Demokratike të Kosovës, Uran Ismaili, e ka quajtur show politik iniciativën për mocionin për rrëzimin e Qeverisë Hoti, nga ana e Lëvizjes Vetëvendosje.

Në një njoftim të PDK-së, Ismaili ka shtruar dy pyetje për Vetëvendosje, “në një moment të tillë kur kjo parti po kërkon bashkëpunim të drejtpërdrejtë me PDK-në”, për rrëzimin e Qeverisë Hoti.

“Lëvizja Vetëvendosje, në një konferencë për media, paralajmëroi fillimin e mocionit të mosbesimit ndaj Qeverisë, por shpresat i paska varur në Partinë Demokratike të Kosovës. Në një moment të këtillë, kur kjo parti po kërkon bashkëpunim të drejtpërdrejtë me PDK-në, atëherë pashmangshëm shtrohen disa çështje që kërkojnë përgjigje publike. E para, LVV duhet të tregojë se çfarë ndodhi që i paska fshirë vijat e kuqe me PDK-në? E dyta, LVV duhet të tregojë sa është serioze në iniciativën për mocionin që e ka nisur në Kuvendin e Kosovës?” ka thënë fillimisht ai.

Sipas tij, ky është më shumë show politik. Ai ka thënë se me votat e VV-së dhe PDK-së s’mund të rrëzohet Qeveria.

“Nga përvoja e kaluar, ky duket më shumë si një show politik i radhës sesa një përpjekje e sinqertë. Sepse, votat e LVV-së dhe PDK-së nuk mjaftojnë për rrëzimin e Qeverisë. Përkundrazi, e shtyjnë këtë Qeveri edhe për 6 muaj, sepse ligji thotë që mocioni i mosbesimit mund të ngrihet vetëm një herë në gjashtë muaj. Prandaj, VV duhet të tregojë se a e ka kontaktuar paraprakisht ndonjë parti politike që t’i japë formë dhe përmbajtje këtij bashkëpunimi që po kërkon nga PDK? A e mendon seriozisht rrëzimin e Qeverisë, pra sigurimin e 61 votave, apo është iniciativë vetëm për show politik?” ka shtuar Ismaili.

Ismaili ka shprehur dyshimet e PDK-së ndaj iniciativës së VV-së për rrëzimin e Qeverisë në kohë pandemie, duke deklaruar se në kohën kur ishte nisur mocioni për rrëzimin e Qeverisë Kurti, VV-ja ankohej për rrëzim në kohë pandemie.

“Kur LDK nisi mocionin për Qeverinë Kurti, Lëvizja Vetëvendosje ankohej për rrëzimin e Qeverisë në kohë pandemie me vetëm 15 raste infektimi në ditë. E tani kur Kosova është ndoshta në kulmin e pandemisë, me nga 15 raste të vdekjeve dhe mbi 200 të infektuar në ditë, kjo sot nuk po i pengon Lëvizjes Vetëvendosje për ta ndërmarrë iniciativën e mocionit të mosbesimit për Qeverinë. Pra, kemi të bëjmë me standarde të dyfishta të VV-së”, është shprehur ai.

 

12:20

VV-ja synon rrëzimin e Qeverisë Hoti përmes mocionit, nis mbledhjen e nënshkrimeve

Partia opozitare, Lëvizja Vetëvendosje po planifikon ngritjen e mocionit të mosbesimit ndaj Qeverisë “Hoti”, raporton KOHA.

Një gjë e tillë u bë e ditur në konferencën e sotme të kësaj partie nga deputeti, Rexhep Selimi, i cili tha se VV-ja tashmë ka filluar me mbledhjen e nënshkrimeve. "Nga sot Vetëvendosje nis mbldhjen e nënshkrimeve për ngritjen e mocionit të mosbesimit ndaj Qeverisë", tha Selimi

I pyetur se a kanë mbështetjen e partive të tjera për këtë mocion, Selimi tha se pretendojnë t'i marrin votat e mjaftueshme për ta rrëzuar Qeverinë "Hoti", pa specifikuar nëse kanë pajtimin e PDK-së, apo jo.

Kurse deputetja Arbërie Nagavci e quajti qeverinë aktuale " qeveri jokushtetuese dhe joligjore".

"Kjo qeveri është jokushtetuese dhe jo ligjore, ajo e ka dëshmuar tash se është e paaftë për të qeverisur vendin. Kosovës i duhet një Qeveri që deshmoi se mund të qeverset me duar të pastërta", tha Nagavci. "Në mungesë të planifikimit për t’u përballur me pandeminë, kjo qeveri e ka kolapsuar sistetim shëndetësor edhe ashtu të prishtë të vendit tonë. Kemi me dhjetëra raste të vdekjeve në ditë. Nuk ka asnjë plan. Po ashtu nuk ka ndonjë plan për rimëkëmbje ekonomike. Punëtorët, bizneset e pjesa më e madhe e qytetarëve po vazhdojnë të vuajnë pasojat e pandemisë. Kjo qeveri po e çon vendin drejt një katastrofe humanitare. Ndaloi vettingun, që nënkupton se nuk duan gjyqësor të pavarur, sepse nuk duan ndryshime, por duan të vazhdojë avazi i vjetër. Po ashtu njëjtë veproi me ndërmarrjet. U shkarkuan bordet e pavarurar të emëruara nga Qeveria Kurti pa asnjë arsye, për të sjellë njerëz të partive në to. Kjo Qeveri nuk ka as si të na përfaqësojë në skenën ndërkombëtare. Ndër vendimet e para që mori ishte heqja e reciprocitetit. Po ashtu hoqi dorë nga anëtarësimi në organizata ndërkombëtare. Edhe pse pa platformë kjo Qeveri po mundohet të tregojë se po negocion me Serbinë. Por, si përfaqësues nxjerr një njeri që nuk ka legjitimitet. Kosova ka pasur gjithmonë nevojë për një Qeveri të mirë, por tash më tepër se kurrë më parë. Një Qeveri që ka dëshmuar se di të udhëheq me duar të pastra, di të menaxhojë me pandemi dhe se interesin publik e ka në rend të parë”.

Kritika Vetëvendosje pati edhe për menaxhimin që kjo Qeveri po bënë me pandeminë Covid -19. Sipas deputetëve të VV-së vendi po shkon drejt një katastrofe humanitare.

Kujtojmë se në mars të këtij viti ish- Qeveria “Kurti” ishte rrëzuar me ngritjen e mocionit të mosbesimit pikërisht nga LDK-ja, partneri i atëhershëm i saj, pas një seri përplasjesh me njëra tjetrën.