Uka konsideron se gjendja me COVID-19 në Kosovë është më e rëndë sesa raportohet

Anëtari i Komisionit Parlamentar për Shëndetësi, Fitim Uka, ka thënë se situata me COVID-19 në Kosovë është më e rëndë se ajo që raportohet.

Edhe pse në Kosovë deri tash si pasojë e koronavirusit kanë vdekur 284 dhe vazhdimisht po raportohen më shumë se 200 raste të reja në ditë, sipas deputetit të Vetëvendosjes, gjendja reale është edhe më e rëndë.

“Ju them me sinqeritetin e plotë dhe me keqardhje se situata është shumë më keq sesa paraqitet, e sa realisht mund ta imagjinojmë. Kjo edhe për faktin e thjeshtë se ne sot testojmë shumë më pak sesa është testuar dikur. Testimi është reduktuar vetëm në testimin e atyre që tregojnë simptoma të ashpra dhe anashkalohen kontaktet totalisht dhe gjasat janë të mëdha që të kemi numër shumë më të madh të të infektuarve, sesa që raportohen për çdo ditë. Kjo ka bërë që të mbingarkohen të gjitha institucionet shëndetësore në Kosovë”, ka thënë Uka.

Uka i quan të dëmshme veprimet e Zemajt lidhur me çmimet e barnave

Tejet të dëmshëm për qytetarët e Kosovës e ka konsideruar deputeti i Vetëvendosjes, Fitim Uka, vendimin për shfuqizim të Udhëzimit Administrativ për rregullimin e çmimeve të barnave, nga ana e ministrit të Shëndetësisë, Armend Zemaj. Ndërsa anulimin e këtij vendimi pas vetëm një dite më vonë, Uka ka thënë se Qeveria u detyrua ta marrë për shkak të presionit.

“Personalisht kam pas takime me përfaqësues të Odës së Farmacistëve. Ata më kanë transmetuar shqetësimet e tyre dhe mund të them se para një muaji është ndjerë nga ta një lloj rreziku i tillë për vendime të tilla arbitrare dhe pa i konsultuar fare farmacistët. Kjo ka ndodhur ditën e djeshme. Natyrshëm që ka qenë vendim i njëanshëm, pa konsulta me profesionistët dhe siç e kemi pa ne dhe gjykuar edhe i dëmshëm për xhepin e qytetarëve të Kosovës dhe në kohën e pandemisë madje një situatë shumë e favorshme për kompani të caktuara farmaceutike të cilat do të mund të manipulonin me çmimet e barnave”, është shprehur Uka në Interaktiv.

Sipas tij, anulimi i këtij vendimi vetëm një ditë pas vendimit të parë, tregon se “po të mos ketë reagim të opinionit publik, kjo qeveri është në gjendje të marrë çfarëdo vendimi pa e konsideruar fare perspektivën e qytetarëve”.

Sipas deputetit të Vetëvendosjes, Fitim Uka, Qeveria e Kosovës është vetëm spektatore në luftën me pandeminë e koronavirusit.

Ai ka thënë se “në kohën kur të gjitha shtetet ishin të izoluara, Kosova ishte model i mirë për menaxhim të pandemisë, ndërsa tash kur janë hapur, jemi modeli më i keq”.

Sipas Ukës, shifrat alarmante të ditëve të fundit të të vdekurve dhe atyre të rasteve të reja me COVID-19 dëmtojnë shumë imazhin e Kosovës në botë.

“Ne kemi qenë të zëshëm për të vënë në pah këtë formë të keqmenaxhimit që kushton edhe në imazhin e Kosovës dhe raportet që kanë shtetet tjera me ne dhe mënyrën si i trajtojnë qytetarët tanë. Imagjinoni vendet e rajonit si Mali i Zi kanë vendosur kushte për lëvizjen e qytetarëve tanë në atë drejtim dhe shumica e vendeve të Bashkimit Evropian kërkojnë testim. Mbrëmë lexova edhe një lajm tjetër për një numër të lartë të shtetasve të Kosovës që kanë rezultuar pozitivë pas kthimit në Gjermani. Kjo i bën vendet e BE-së dhe të tjerat të marrin masa shtesë në raport me Kosovën dhe s'është aspak pozitive. por ajo që më shqetëson akoma më tepër është kjo lloj apatie që ekziston në mesin e Qeverisë. Pra Qeveria është kthyer në spektatore të gjendjes aktuale në Kosovë. Ajo po e bën rolin tuaj si gazetarë, raporton për numrin e të vdekurve e të infektuarve por s'ka veprime për të reduktuar këta numra e që do të reflektonte në një menaxhim më të mirë të situatës”, është shprehur Uka.

Deputeti i Lëvizjes Vetëvendosje, Fitim Uka, ka thënë se Qeveria Hoti është treguar joserioze në përballjen me pandeminë.

Në Interaktiv, Uka ka thënë se Qeveria Hoti “pos keqmenaxhimit, ka bërë edhe mashtrim ndaj qytetarëve të Kosovës”.

“Ne jemi treguar jashtëzakonisht të butë në raport me këtë keqmenaxhim dhe keqqeverisje. Kur flasim në veçanti për pandeminë, ajo që kemi bërë brenda komisionit, brenda Kuvendit kemi pasur opozitë konstruktive. Ajo që jemi përpjekur të bëjmë në vazhdimësi ka qenë që përpos kritikave tona konstruktive, të ofrojmë edhe alternativa dhe zgjidhjet për problemet. Një nga iniciativat e mbështetura prej VV-së është pikërisht projektligji, por shumica e rekomandimeve tona, alternativave që kemi propozuar, janë injoruar nga kjo qeveri dhe strategjia e tyre ka qenë si mos më keq. Vlen të përmendet fakti që me të marrë qeverisjen, qysh në ditën e parë një nga zotimet kryesore të qeverisë ilegale ka qenë testimi masiv. Është duartrokitur edhe nga subjektet tjera opozitare sepse konsiderohej si shpëtim, por edhe sot, kur po flasim pas kaq muajsh të qeverisjes ilegale nuk kemi testime masive. ato madje nuk po duken fare në horizont. Kjo është një nga arsyet pse konsiderojmë se ka pasur jo veç keqmenaxhim, por edhe mashtrim të qytetarëve të Republikës së Kosovës. Pastaj ajo që ka ndodhur në vazhdimësi është që ka pas joseriozitet në mënyrën e komunikimit me qytetarët me vendosje e largim të masave”, ka deklaruar Uka.

Deputeti i Lëvizjes Vetëvendosje si dhe anëtari i Komisionit për Shëndetësi, Fitim Uka, në Interaktiv të KTV-së ka thënë se një ligj për luftimin e koronavirusit do të ndihmonte ndjeshëm Qeverinë në menaxhimin e situatës.

Pasi që të premten pritet të bëhet shqyrtimi i parë i këtij projektligji, Uka ka thënë se Qeveria Hoti “më në fund ka hequr dorë nga inatet personale”. Sipas tij, ndihma më e madhe me ligjin e ri do të ishte çështja e gjobave ndaj atyre që shkelin rregullat.

“Një projektligj i tillë do t’i lehtësonte punën qeverisë aktuale dhe do të mundësonte po ashtu që të luftohet më mirë pandemia, sepse ajo që do të krijohet në projektligjin aktual është edhe pjesa e gjobave të cilat nuk kanë qenë të definuara mirë. Ka qenë një zbrazëtirë e tillë ligjore dhe që nuk ka funksionuar siç duhet deri më tash. Po besoj që edhe si Komision Parlamentar për Shëndetësi e kemi treguar vullnetin tonë që të shtyjmë përpara një projektligj të tillë e tashmë më në fund edhe Qeveria e ka parë që nuk ka rrugëdalje tjetër dhe duhet t’i lërë anash inatet politike, personale e t’i japë mundësinë të kalojë një projektligj i tillë në Kuvend”, ka deklaruar Uka.

Sipas tij, Qeveria Hoti ka pranuar një projektligj të tillë “për shkak të presionit të vazhdueshëm”.

© KOHA. Të gjitha të drejtat janë të rezervuara.