18:58

Kusari-Lila: Osmani do të dalë më e fortë nga kjo sfidë

Deputetja e Grupit Parlamentar të Vetëvendosjes, Mimoza Kusari-Lila, thotë se nënkryetarja e Lidhjes Demokratike, Vjosa Osmani, do të dalë ende më e fortë nga kjo sfidë.

E ka kritikuar qasjen e kreut të LDK-së, Isa Mustafa, që në mënyrë elektronike të bëhet shkarkimi i Osmanit nga posti i nënkryetares dhe anëtares së Kryesisë.

Ajo thotë se “Edhe pak minuta ju kanë mbetur anëtarëve të Këshillit Drejtues të LDK-së për të dëshmuar a janë Lidhje Demokratike apo Lidhje Anti Demokratike”.

“Vetëm në vendet me sisteme diktatoriale dhe me cenzurë shtetërore, mund të ndodh të kërkohet shkarkimi i gruas më të votuar në parti, bartëses së listës dhe kandidatës për Kryeministër, nga njeriu që dy palë zgjedhje nuk ka garuar vetë dhe nuk është matur me votën e qytetarëve. Cili është legjitimiteti i z. Mustafa dhe njerëzve rreth tij, të kërkojnë shkarkimin online, pa deklarime, pa debat dhe pa asnjë elaborim të mirëfilltë të strukturës vendimarrëse, për Nënkryetaren Vjosa Osmani-Sadriu, kur e tërë pesha e rezultatit të ngritur të LDK - së nga zgjedhjet e 6 Tetorit, ishte falë znj. Osmani”, shkruan Kusari-Lila në Facebook.

Kusari-Lila thekson se duket se modeli i shtetit të kapur i praktikuar për shumë vite në Kosovë, ka zënë vend me komoditet në LDK dhe tani po e zëvendëson çdo proces demokratik me një tjetër antidemokraci dhe kapje nga një grusht burrash që as pjesëmarrës në zgjedhjet e Tetorit nuk ishin.

“Asnjë dyshim nuk e kam se Vjosa do të dalë ende më e fortë nga kjo sfidë, ashtu sikurse doli me 2017, por këtë sfidë duhet të kalojnë me sukses të gjithë ata që duan shpresë dhe të ardhme për subjektin dhe shtetin. Me qëllimin e heshtjes së të gjithë zërave të arsyes, me qëllimin e mbytjes së çfarëdo mendimi dhe veprimi që nuk është në përputhshmëri me agjendën personale të Kryetarit Mustafa dhe Presidentit Thaçi, LDK nuk do të arrijë të “rikthejë” kontrollin në strukturë, por në të kundërten, do të shpërbëjë atë me shpejtësinë e paimagjinuar për ata që e ndjekin këtë rrugë jo demokratike. Vjosa Osmani Sadriu është aset jo vetëm i LDK - së, por edhe i tërë Kosovës, andaj ata që e duan Vjosën jashtë vendimarrjes, e duan Kosovën më të dobët e vetëm më të fortë”, shkruan deputetja Kusari-Lila.

18:13

Nagavci e Mulhaxha-Kollçaku i dalin në mbrojtje Osmanit pas propozimit për shkarkim nga LDK-ja

Dy deputete të Lëvizjes Vetëvendosje, Arbërie Nagavci dhe Fatmire Mulhaxha Kollçaku, i kanë dalë në mbrojtje kryeparlamentares Vjosa Osmani, ndaj të cilës është iniciuar votimi për shkarkim nga pozita e nënkryetares në Lidhjen Demokratike të Kosovës.

Nënkryetarja e Kuvendit, Nagavci, e ka quajtur qyqare sjelljen e LDK-së ndaj Osmanit. Ajo ka shtuar se “krerët e LDK-së kanë shkuar shumë thellë në lidhjet e tyre me kapësit e shtetit”.

“Kanë prekur fundin, duket se s'mund të kthehen prapa. Pasi tradhtuan elektoratin e tyre, vodhën fitoren e VETËVENDOSJES!, u vunë në vijë pas Presidentit Thaçi bashkë me PDK, AAK, NISMA, Lista Serbe, krijuan një Qeveri jolegjitime, tani krerë të LDK-së paskan nisur një votim elektronik për të shkarkuar znj. Osmani nga pozita e saj si nënkryetare. Nuk dua të flas për çështjet e brendshme partiake, as që po provoi të mendoj se si do të ishin reagimet po të ndodhte një rast i ngjashëm në LV!, nuk po flas as për të drejtën e mendimit ndryshe, për domosdoshmërinë e ruajtjes së parimeve e premtimeve të dhëna. Por nuk mund të mos reagoj për mënyrën qyqare të sjelljes ndaj një gruaje, ndaj një politikane që në pozitën e saj si Kryetare e Kuvendit e si deputete e LDK-së nuk ka bërë asnjë shmangie nga premtimet elektorale, nga deklaratat publike, e besoj nga bindjet e saj se cila është më e mira për vendin. Jam tash dhe më e bindur se znj. Osmani ka bërë gabim vetëm pse pranoi të bëhej Kandidate për Kryeministre pa u bërë Kryetare e Partisë, kështu i rriti kredibilitetin e pamerituar LDK-së, e u dha mundësi edhe të tjerëve që të keqpërdorin besimin që u kërkuan qytetarëve”, ka shkruar Nagavci në postimin e saj në Facebook.

“Krerë të LDK duket se kanë shkuar shumë thellë në lidhje e tyre me kapësit e shtetit. Vota e sotme elektronike për të shkarkuar ose jo znj. Osmani nga pozita e saj si nënkryetare është mundësi për anëtarët me të drejtë vote të distancohen sa ndoshta kanë akoma dhe pak kohë për të treguar dinjitet e për të reflektuar. Rezultati i sotëm do të tregoi se sa janë gati anëtarët e KP të LDK-së të vendosin parimisht, racionalisht e të pavarur. Vjosën dhe mund ta shkarkojnë nga pozita e nënkryetares, por legjitimitetin që i dhanë qytetarët nëpërmes saj LDK-së nuk mund t’ia japin Zt. Hoti. Ashtu si as legjitimitetin e Qeverisë Kurti, qeverisë jolegjitime. Këtu veç parime, arsye e argumente s’ka. Ka standarde të shumfishta që paradoksalisht do të kthjellojnë situatën”, ka vazhduar ajo.

Në anën tjetër, deputetja Mulhaxha Kollçaku, ka thënë se Osmani ishte personi “më i sinqertë dhe këmbëngulës për arritjen e bashkëqeverisjes”.

“Nëse parimet bëhen mollë sherri me krerët e subjektit politik, ia vlen të sakrifikosh!”, ka shkruar ajo.

Lëvizja Vetëvendosje dhe LDK-ja ishin në bashkëqeverisje pas zgjedhjeve të tetorit. Vetëvendosje që fitoi zgjedhjet me Albin Kurtin si kandidat për kryeministër, kishte bashkuar forcat me LDK-në që doli e dyta me Vjosa Osmanin kandidate. Qeveria Kurti u rrëzua pas 50 ditësh qeverisjeje me mocion mosbesimi të nisur nga LDK-ja. Në fillim të qershorit, LDK-ja u bë bashkë me AAK-në e Nismën për të formuar Qeverinë Hoti pasi Gjykata Kushtetuese i dha dritën e gjelbër partisë së dytë që të formojë qeverinë. Osmani ishte shprehur kundër një qeverie të re dhe kjo deklaratë kishte nxitur kreun e partisë, Isa Mustafa, që të iniciojë në Këshillin e Përgjithshëm të LDK-së votimin për shkarkim të Osmanit nga posti i nënkryetares së partisë. Mustafa ka kërkuar që anëtarët të votojnë sot deri në orën 19:00 në mënyrë elektronike.