KQZ-ja e gatshme për organizimin e zgjedhjeve në Mitrovicë të Veriut dhe Podujevë

Komisioni Qendror Zgjedhor thotë se do të fillojë punën intensive për organizimin e zgjedhjeve të jashtëzakonshme për kryetar të komunës së Mitrovicës së Veriut, e gjithashtu, edhe për Podujevë.

Valmir Elezi, zëdhënës në KQZ, tha për KOHËN se veprimet do të ndërmerren sapo të shpallen zgjedhjet në komunën ku deri sot udhëhiqte Goran Rakiqi.

“Si çdo herë, Komisioni Qendror i Zgjedhjeve do të përmbushë detyrat e veta kushtetuese dhe ligjore, për të organizuar zgjedhjet, kurdo që i kërkohet. Në këtë drejtim, KQZ-ja do të fillojë me punën intensive për organizimin e zgjedhjeve të jashtëzakonshme për kryetar të komunës së Mitrovicës së Veriut, pasi të shpallen këto zgjedhje. Kështu do të veprojmë edhe pas vazhdimit të procesit zgjedhor në komunën e Podujevës. Kjo është përgjigje sa i takon rolit kushtetues të KQZ-së”, tha Elezi.

Goran Rakiqi do të jetë zëvendëskryeministër në Qeverinë Hoti dhe ministër i Pushtetit Lokal.

Ndërkaq, zgjedhjet në Podujevë kanë mbetur peng pasi presidenti Hashim Thaçi, ende nuk e ka caktuar datën.

LEXO EDHE: KQZ-ja s'e vë në rend dite çështjen e zgjedhjeve në Podujevë, Daka thotë se s'janë kompetencë e tyre

Bashkë me Podujevën do të shkojë në zgjedhje edhe Mitrovica e Veriut.

Kjo pasi kryetari i Mitrovicës së Veriut, Goran Rakiq, është zgjedhur zv.kryeministër dhe ministër i Pushtetit Lokal në Qeverinë Hoti, që u votua sot me 61 vota.

Njësoj, edhe Podujeva ishte vendosur të shkonte në zgjedhje lokale, pasi Agim Veliu ishte emëruar ministër i Punëve të Brendshme. Ai më vonë ishte shkarkuar, por edhe zgjedhjet ishin shtyrë për shkak të pandemisë. Tash Veliu, sërish është zgjedhur ministër i Punëve të Brendshme.

© KOHA. Të gjitha të drejtat janë të rezervuara.