Publicisti dhe gazetari britanik, Tim Judah, në emisionin Desku në KTV ka folur për krizën në të cilën është duke kaluar Britania gjatë pandemisë dhe si po përballen me të.

Ai ka treguar po qëndron i mbyllur shumicën e kohës.

“E dini, është goxha e çuditshme, sidomos si gazetar, dhe unë nuk jam në gjendje të them, sepse unë gjatë javëve të kaluara, faktikisht gjatë muajit të kaluar, nuk kam qenë në gjendje të dal më shumë se dy herë, faktikisht dola në fillim të kësaj jave dy herë për shëtitje, por, pos kësaj, unë në të vërtetë nuk kam dalë fare jashtë shtëpisë. Dhe kur dola kishte pak njerëz, rrugët kryesore ishin të thata, dyqanet ishin të mbyllura. Gjithçka është e mbyllur. Kishte shumë pak qarkullim rrugor, por edhe ai pak qarkullim rrugor, ma ha mendja se lidhej me dërgesat shtëpiake. Ta zëmë, ne në shtëpinë time, nuk kemi dalë fare të bëjmë pazarin muajin e kaluar, gjithçka na është sjellë”, ka thënë Judah.

Judah ka treguar gjithashtu se si po sillet policia britanike me qytetarët.

“Mendoj se kur të nisni të dilni – kam jetuar në Londrën Perëndimore shumë afër Signature – por mendoj se kur provoni të shkoni më larg në periferi, gjërat nisin të ndryshojnë”, ka thënë ai. “Një koleg i imi, shok i imi, ndau mendjen të dilte për njëfarë shëtitje në një vend të bukur piktoresk që është në dalje, tha se derisa po ngiste makinën afër, që është përgjatë magjistrales jashtë Londrës, të njohur si M25, derisa po afrohej, kishte gjithnjë e më pak qarkullim, dhe po bëhej gjithnjë e më çuditshme. Ishte e çuditshme”.

Dhe në atë moment, shton ai, nisën t’i përcillnin makinat policore dhe i përcollën për rreth dhjetë minuta dhe më në fund i ndalën.

“Ju thanë çfarë po bëni. Kolegu im u tha: Më vjen keq, dua të luaj mendsh prej këtij izolimi dhe policia i tha se do ta gjobiste me gjashtëdhjetë sterlina. Pastaj polici tha: A di çka, harroje këtë punë. Vetëm kthehu kah ke ardhur dhe shko në shtëpi. Duket se edhe përreth Londrës, prej asaj çfarë mund të shihte miku im, kishte goxha shumë policë që ndalnin njerëzit të hynin e të dilnin”, tregon Judah.

I pyetur se a është ky mjedisi në të cilin po jetojnë krejt njerëzit anembanë Britanisë, apo dominon më shumë në Londër dhe në qytete të tjera më të mëdha, Judah është përgjigjur se nuk e di nëse kjo është e vërtetë, porse pak a shumë është ashtu.

E madje sipas tij ka huti edhe te policia se sa strikte duhet të jetë gjatë këtyre masave.

“Unë mendoj se prej asaj çfarë kam lexuar në media dhe çfarë kam dëgjuar, ka huti edhe në mesin e policisë se çfarë supozohet se duhet të bëjë dhe sa strikte duhet të jetë. Kështu që, mendoj se në disa rajone, së paku në fillim, policia ishte shumë strikte, duke kthyer gjithkënd që dilte jashtë dhe duke mos lejuar asgjë përjashta dhe në disa rajone, policia ishte më e relaksuar. Por, unë nuk e di se deri në çfarë shkalle ka ndryshuar. E di se policia fillimisht ankohej, sepse nuk dihej se çfarë duhej të bënte”, thotë Judah.

Ai shton gjithashtu se si gazetar kjo periudhë është shumë frustruese.

“E dini, afërmendsh se është frustruese si gazetar, sepse nuk mund ta shuaj kureshtjen time dhe të dal jashtë dhe të punoj. Për mua, unë kam shumë punë për të bërë”, ka thënë ai.

Judah gjithashtu ka treguar se ishte duke punuar në demografinë e popullsive në Evropën Juglindore, porse tani ky projekt është penguar nga koronavirusi.

“Për momentin, gjatë vitit të kaluar, po punoja fort në një seri shumë të madhe shkrimesh për demografinë e popullsive në Evropën Juglindore. Dhe në të vërtetë kam shumë punë për të kryer edhe nga shtëpia. Sidoqoftë, në këtë fazë, do të duhej të shkoja në Slloveni dhe në Bullgari. Por, afërmendsh se tashmë jam shtrënguar të hiqja dorë prej këtyre planeve dhe jam përqendruar në intervista që më duhet t’i zhvilloj online, gjë që nuk është e njëjta punë, por ndryshe nuk do të mund të kryeja punë fare”, u shpreh Judah.

E koronavirusi thotë se ka ndikuar edhe në punën e tij në të përjavshmen “The Economist”.

“Mendoj se ka ndryshuar shumë, dua të them, për të gjithë. Nuk di shumë hollësi. E di se shumë njerëz po punojnë nga shtëpia, ama çfarë nuk është puna e marketingut. Biri im, djali im i vogël, punonte për një gazetë lokale. Dhe gazeta lokale ka falimentuar. Edhe ashtu kishte telashe, por edhe ai marketing që e kishte u ndërpre dhe gazeta falimentoi. Dhe, në parim, ai tani është i papunë. Kjo ishte një gazetë në telashe, por sa më shumë që zgjatet, aq më shumë telashe do ta shohim”, thotë ai.

E sipas tij koronavirusi është edhe një kërcënim ekonomik dhe sa më shumë që të zgjasë aq më keq do të jetë.

“Ma merr mendja se ky është edhe kërcënim ekonomik. Afërmendsh, madje kjo është çështja më serioze, sa më gjatë që shkon, aq më keq do të jetë, a do të bjerë GDP-ja jonë për tre për qind, dhjetë për qind, një të tretën, askush nuk e di se sa do të zgjasë. Kjo është gjëja më frustruese. Dua të them, përderisa askush nuk e di se sa do të zgjasë, askush do të mund të bëjë asnjë plan, por në aspektin ekonomik, sa më shumë që zgjat, aq më shumë dëme do të ketë”, shprehet Judah.