18:14

Kurti: Tarifa do të hiqet, por reciprociteti nuk guxon të braktiset

Kryeministri i Kosovës, Albin Kurti në seancën e jashtëzakonshme rreth raporteve me SHBA-në ka thënë se tarifa do të hiqet, por nuk do të braktiset reciprociteti.

“Sot nuk është çështja te heqja e tarifës por te heqja e reciprocitetit, sepse unë si kryeministër kam shprehur qëndrimin tim për heqjen e tarifës 100 për qind, njëherë si lëndë e parë e pastaj plotësisht. Beteja po bëhet si të hiqet reciprociteti, e reciprociteti buron nga barazia e unë e dua barazinë”, ka thënë Kurti.

Tutje ai ka thënë se, “çështja është se si të braktiset reciprociteti, e jo se si të hiqet tarifa. Tarifa do të hiqet, por reciprociteti nuk guxon të braktiset”.

Kurti tutje ka thënë se përjetësisht do t’i jetë mirënjohës SHBA-së.

“Neve dinjiteti, integriteti na buron nga brenda qenies tonë, ne jemi falënderues e mirënjohës për jetë për rolin e Shteteve të Bashkuara të Amerikës në luftë e në paqe, për drejtësi, zhvillim e demokratizim, për mbrojtje e për siguri dhe me shumë mundësi edhe jetën ua kemi borxh secili prej nesh. Ama duhet ta kuptoni një gjë dinjiteti të vjen prej brenda, jo prej jashtë. Për shkak se je, duhet të jetosh me dinjitet, për shkak se je duhet të kesh integritet dhe në këtë kuptim Shtetet e Bashkuara të Amerikës nuk na duan neve servil, është gabim të mendojë ndokush se nëse ne jemi servilë atëherë na duan më shumë. Ne kemi nevojë ta duam popullin e ta kemi respektin e tjetrit, por s’ka respekt të tjetrit pa vetërespekt”, u shpreh Kurti.

Tutje ai i është kundërpërgjigjur kreut të opozitës, Kadri Veselit.

Veseli: Sjelljet e Kurtit po e rrezikojnë miqësinë e shenjtë ndërmjet Kosovës dhe SHBA-së

“Lideri i opozitës tha që këtu nuk ka vend për konservatorë, liberalë dhe komunistë, besoj se ka menduar për socialistë, ose socialdemokratë si puna ime sepse Lëvizja Vetëvendosje është subjekt socialdemokrat. Ata nuk i përmendi fare, do të thotë s’ka vend për neve këtu. Është edhe Nisma këtu socialdemokrate që ia kaluan pragun”, u shpreh Kurti.

18:06

Thaçi ka pësuar debakël në SHBA, sipas Kurtit

Kryeministri i Kosovës, Albin Kurti sot në Kuvend ka thënë se ai nuk është antiamerikan, por është kundër antiamerikanëve derisa ka shtuar se presidenti Hashim Thaçi është antievropian, gjë që e ka kritikuar.

Sipas tij Thaçi ka pësuar debakël në SHBA.

“Të shkosh në Shtëpi të Bardhë si president i Republikës, të qëndrosh disa ditë dhe të mos e takosh presidentin amerikan, të mos e takosh as zëvendëspresidentin amerikan e të kthehesh pa marrëveshje politike. E të kthehesh pa ndonjë investim në ekonomi është debakël. Mendoj se ishte e turpshme shkuarja dhe kthimi i presidentit aktual pa u takuar as me të parin, as me të dytin dhe pa bërë as marrëveshje politike, as pa sjellë ndonjë investim ekonomik”, ka thënë Kurti.

Ai thotë se siç ka tani një qeveri të re, mbase duhet të ketë edhe president të ri.

“Çfarë shpenzojmë ne me këtë president që pëson këso dështimesh, të ishin të tij do ia bënim kollaj, por e bën në emër tonin e qe besa edhe me paratë tona. Por, mbase siç kemi qeveri të re duhet të kemi edhe president të ri”, ka thënë Kurti.

Tutje ai ka kritikuar Thaçin për deklarimet antievropiane.

“Unë nuk jam antiamerikan, unë jam kundër antiamerikanëve, por më duhet ta them një gjë: presidenti është antievropian. Pikërisht në kohën kur presidenti aktual i Kosovës deklarohet hapur si antievropian, disa më akuzojnë mua padrejtësisht si antiamerikan. Ai vet tha jam antievropian, unë jam edhe proamerikan edhe proevropian. Unë besoj në lidhjen trans atlantike. Ai u deklarua antievropian dhe filluan akuzat e shpifjet për mua si antiamerikan. Pra, unë i dua edhe Shtetet e Bashkuara të Amerikës edhe Bashkimin Evropian, na nevojiten të dyja. Pa SHBA-në nuk ka NATO, pa NATO nuk ka siguri as në Evropë, e lëre më në Ballkanin tonë, ndërkohë që Kosova është në Ballkan, në kontinentin Evropian e jo në kufi me Meksikën”, ka thënë Kurti.

Ai ka shtuar se Thaçi më keq po sillet me Brukselin se me Beogradin.

“Presidenti aktual i Kosovës po sillet shumë më keq me Bashkimin Evropian sesa me Serbinë. Si kryeministër nuk jam dakord me qasjen ku presidenti flet më keq për Borrellin, Lajçakun e Brukselin sesa për Daçiqin, Vuçiqin e Beogradin, kjo është gabim. Brukseli, Borreli e Lajçaku nuk kanë kryer gjenocid në Kosovë, mos i ngatërroni këto dy gjëra. Unë jam i gatshëm të shkoj në Ëashington DC të SHBA-së si kryeministër me ekipin tim bashkë edhe me kryeparlamentaren tonë, znj. Vjosa Osmani dhe t’i diskutojmë të gjitha çështjet. Kemi nevojë për një proces drejt një marrëveshje të pranueshme për SHBA-në, BE-në dhe rajonin”, ka thënë Kurti.

17:12

Kurti: Jam i bindur se ka marrëveshje të gatshme midis dy presidentëve, po kërkohet të thyhet qeveria

Kryeministri i Kosovës, Albin Kurti është shprehur i bindur se ka një marrëveshje të gatshme për dialogun me Serbinë.

Ai në Kuvend ka thënë se heqja e menjëhershme e tarifës 100 për qind është masë ekstreme.

“Mbajtja e tarifës 100 për qind e pa reciprocitet është pozicion ekstrem, pra të thuash tarifë 100 për qind e pa qarë kokën është pozicion ekstrem. Edhe heqja e plotë dhe e menjëhershme pa e vendosur e pa përmendur fare freciprocitetin po ashtu është pozicion ekstrem. Ne nuk duhet të jemi ekstremistë, ne duhet të jemi normal. Jam i bindur që ka një qëndrim normal e ky është zëvendësimi i tarifës me reciprovitetin dhe ka një qëndrim sublim normal e ky është zëvendësimi gradual dhe përgjatë kësaj do të krijoheshin masat e mirëbesimit për dialogun”, ka thënë Kurti.

LDK-ja fton Kurtin të veprojë: Kundërshtarët e heqjes së tarifës janë pakicë

Ai thotë se zgjedhje kishte garuar me reciprocitet.

“Ose krejt ose hiq, ose tash ose kurrë nuk bën, pra është e domosdoshme që të ikim prej këtyre pozicioneve ekstreme. Në fushatë kemi garuar me reciprocitetin, është e domosdoshme që për ndryshimin të kthehemi te qytetarët”, ka thënë Kurti.

Tutje ai ka shprehur bindjen e tij se ka një marrëveshje të gatshme të arritur ndërmjet presidentit Hashim Thaçi dhe homologut të tij serb, Aleksandar Vuçiq.

“Nuk bëhet fjalë për heqje të tarifës e për fillim të dialogut, kjo është gënjeshtër. Bëhet fjalë për heqje të tarifës e përmbyllje të dialogut me një marrëveshje të gatshme midis dy presidentëve. Unë jam i bindur që ka marrëveshje të gatshme. Dhe ajo çfarë po kërkohet është të thyhet qeveria e Kosovës, të thyhem unë paraprakisht si kryeministër në mënyrë që të marrë fuqi ai që në emër të Kosovës në negociata sekrete ka bërë marrëveshje që tash të gatshme do ta servojë, jo për të filluar dialogë, por për të mbyllur çfarëdo mundësie për dialog”, ka thënë Kurti. “Edhe vetëm 10 për qind të ishin gjasat që ka marrëveshje të gatshme ne duhet të jemi tejet të kujdesshëm. E unë jam i bindur që ka marrëveshje të gatshme. Ky është problemi”.

Tutje ai ka shtuar se është gabim pozicioni ekstremist.

“Nga shoqërimi dy vjeçar e gjysmë në sofrën e shkëmbimit territorial ka dalë një ujdi aty, por e keni vërejtur se çfarë ka thënë presidenti i Serbisë: Me kë të negociojë unë, me Kurtin në Bruksel apo me Thaçin në Washington. Me fjalë të tjera ai po thotë, edhe faktorëve ndërkombëtarë por edhe Kosovës, përcaktojeni cili. E për t’u përcaktuar ky i dyti në Washington kërkohet që paraprakisht të thyhet ky i pari në Prishtinë, kjo është e thjeshtë. Pra, duhet të thyhet kurrizi i kësaj qeverie, unë si kryeministër i ri, dhe më pastaj të thuhet në rregull – presidenti fitoi, marrëveshja në tavolinë dhe shampanja prapa. Mirëpo unë them jo, është gabim pozicioni ekstremist – as heqje tarife pa reciprocitet dhe as insistim në tarifë duke mos u angazhuar për reciprocitet”, ka thënë Kurti.

Kurti thotë se heqja e tarifës pa reciprocitet është shumë e dëmshme dhe do të ishte gabim historik.

“Është evidente që mua nuk më pëlqen çfarë po ndodhë, mirëpo ajo çfarë mund të ndodhë po u hoq tarifa pa reciprocitet është pakrahasimisht më e dëmshme, ai do të ishte një gabim i pafalshëm historik”, u shpreh Kurti.

Tutje ai ka shtuar se përkundër që dialogu ishte ndalur, negociatat nuk janë ndalur asnjëherë.

“Kur është vënë tarifa njëherë 10 për qind e pastaj 100 për qind, dy javë më vonë, nuk është vënë si pengesë për dialogun për shkëmbimin territorial, mirëpo ishte presidenti i Serbisë ai i cili tha se pa u hequr kjo tarifë unë nuk e filloj dialogun. Ama ndërkohë vazhduan negociatat sekrete. Pra, është vet presidenti i Serbisë ai që e futi veten në këtë kurth, e mbështeti veten në kënd në mënyrë që të mos mundet të dialogojë. Mirëpo, në atë kënd kishte një rrugë alternative megjithatë, e këto janë negociatat sekrete. Moti s’ka dialog, kurrë s’janë ndal negociatat sekrete”, ka thënë Kurti. “Edhe unë si kryeminsitër i Republikës së Kosovës kam shumë më shumë informacion tash sesa kur isha lider i opozitës”.