Policia shoqëron katër persona të dyshuar në rastin e Telekomit

Policia e Kosovës ka dhënë detaje lidhur me aksionin në cilin e ka realizuar sot në Telekomin e Kosovës.

Përmes një komunikate për media, Policia ka bërë të ditur se aksioni është realizuar Departamenti Special Anti-Korrupsion, bazuar në një dyshim për “keqpërdorim të detyrës apo autoritetit zyrtar” dhe “lidhje e kontratës së dëmshme”.

Sipas njoftimit, operacioni policor ka përfshirë bastisjen e katër zyrave të Telekomit të Kosovës, zyrat qendrore në Prishtinë, me qëllim të gjetjes së provave materiale lidhur me dyshimet e ngritura rreth nënshkrimit të një kontrate në dhjetor të vitit 2019, ku dyshohet se buxheti i Telekomit të Kosovës është dëmtuar me një shumë prej mbi njëqind mijë (100,000.00) euro.

Lidhur me këtë rast, njoftohet se janë shoqëruar në polici katër persona, të cilët janë duke u intervistuar mbi dyshimin e bazuar për përfshirje në veprat penale ‘keqpërdorim i detyrës apo autoritetit zyrtar’ dhe ‘lidhje e kontratës së dëmshme’.

“Policia e Kosovës gjatë kontrollit në këto lokacione ka sekuestruar disa dëshmi relevante që ndërlidhen me rastin si dokumentacione, pajisje elektronike, telefona celular etj., dëshmi këto të cilat do të procedohen sipas procedurës ligjore. Të gjitha veprimet e mëtutjeshme policore do të ndërmerren në konsultim dhe koordinim me prokurorin kompetent të rastit”, thuhet në njoftim.

Telekomi i Kosovës ka iniciuar kallëzim penal dhe ka ftuar organet kompetente që të merën me një rast të dyshimtë për mashtrim të kompanisë.

Sipas njoftimit nga Telekomi, ata janë njoftuar nga mediat për arrestimin e një personi.

Ky aksion i Policisë ka filluar nga ora 8:30 e mëngjesit të sotëm deri rreth orës 11:00, raporton Koha.

Menduh Abazi zëdhënës i Telekomit ka thënë se bastisja ka ardhur pasi ata kishin iniciuar një kallëzim penal ndaj një personi i cili dyshohet se përmes një kontrate me dokumente të falsifikuara kishte mashtruar këtë kompani

“Telekomi i Kosovës në momentin që ka vërejtur se ka dyshime për mashtrim të kompanisë konform obligimeve ligjore që ka, ka iniciuar kallëzim penal dhe ka ftuar organet kompetente që të merren me rastin. Organet kompetente janë përgjigjur pozitivisht dhe si rezultat i punës së tyre dhe bashkëpunimit me ne, me aq sa jemi informuar nga mediat edhe është arrestuar një person. Si Telekom i Kosovës i kemi thënë organeve të rendit që jemi të hapur në çdo kohë për çdo gjë që atyre ju intereson vetëm dhe vetëm që e vërteta të del në pah”, thuhet në njoftimin e Telekomit.

Bëhet fjalë për një mashtrim prej 105 mijë e 840 euro, nga një shtetas nga Maqedonia e Veriut i cili njoftohet se ka përdorur dokumente të falsifikuara për një kontratë për ofrimin e disa shërbimeve.

Policia e Kosovës është duke bastisur Telekomin e Kosovës.

Sipas informacioneve që posedon Koha, rasti ka të bëjë me një mashtrim prej 105 mijë e 840 euro, kur një shtetas nga Maqedonia e Veriut përdori dokumente të falsifikuara për një kontratë për ofrimin e disa shërbimeve.

Rasti ishte iniciuar nga vetë Telekomi në Polici, ku si pasojë në dhjetor të vitit të kaluar është arrestuar i dyshuari në Ferizaj nga Policia e Kosovës.

© KOHA. Të gjitha të drejtat janë të rezervuara.