Haxhiu: Në shtetin e së drejtës askush nuk mund t’i shmanget përgjegjësisë

Haxhiu: Në shtetin e së drejtës askush nuk mund t’i shmanget përgjegjësisë

21 February 2020 15:18

Ministrja e Drejtësisë, Albulena Haxhiu ka pritur në takim drejtorin e Agjencisë Kundër Korrupsion (AKK), Shaip Havolli.

Në këtë takim, Haxhiu u njoftua nga Havolli me sfidat dhe natyrën e rasteve të trajtuara nga Agjencia Kundër Korrupsion, përfshirë edhe punën e deritanishme të Agjencisë, veçanërisht për punën që ky institucion bën në parandalimin dhe luftimin e korrupsionit në Kosovë si dhe ecurinë e zbatimit të ligjeve të cilat ndërlidhen me luftën kundër korrupsionit.

Haxhiu, ka vlerësuar punën e kësaj Agjencie dhe ka theksuar se bashkëpunimi me AKK-në mbetet tejet me rëndësi për Ministrinë e Drejtësisë në koordinimin dhe bashkërendimin e aktiviteteve në luftimin e korrupsionit, thuhet në një njoftim dërguar mediave.

“Po ashtu, gjatë këtij takimi janë diskutuar mundësitë se si të fuqizohet angazhimi i përbashkët, sidomos në temat të cilat kanë të bëjnë me vetëdijesimin e pasojave të korrupsionit si dhe për rëndësinë e integritetit të zyrtarëve të lartë publik dhe institucioneve publike”, thuhet tutje në njoftim.

Të dyja palët u pajtuan se lufta kundër korrupsionit mbetet sfidë e përbashkët dhe se përmes bashkëpunimit dhe koordinimit, efektiviteti në luftën kundër korrupsionit do të rritet dukshëm.

© KOHA. Të gjitha të drejtat janë të rezervuara.

Komentet

Shto koment

Të ngjashme