23:55

Jeta Krasniqi nga KDI-ja, duke folur për nënshkrimin e një letër qëllimi për t’i lejuar kompanisë gjermane “Lufthansa” që ta hapë korridorin ajror mes Kosovës dhe Serbisë, ka thënë se opinionit kosovar nuk i janë dhënë detaje të mjaftueshme.

Në Interaktiv të KTV-së, Krasniqi tha se ne më shumë informohemi për këto marrëveshje me Serbinë nga vetë Serbia, sesa nga institucionet e Kosovës.

“Ne kemi kërkuar përfshirjen e SHBA-së në negociatat Kosovë-Serbi, dhe nga sondazhet, qytetarët e kanë kërkuar vazhdimisht këtë. Presidenti i SHBA-së e ka dërguar Grenellin që të merret me dialogun. Ndërsa Gjuriqi tha sot se do të kishte një marrëveshje për fluturime, por kjo do të realizohet kur Kosova të heqë taksën. Por, më pas doli lajmi se një marrëveshje u nënshkrua në Berlin në mes të Autoritetit të Aviacionit të Kosovës dhe Ministrisë së Zhvillimit Ekonomik të Serbisë dhe me Lufthansan. Ende nuk kemi informacione më të detajuara nga kjo marrëveshje, për shembull se çfarë dokumentesh do të përdoren nga qytetarët, kur do të fillojnë fluturimet, e të tjera… dhe ne kemi bërë thirrje nga autoritetet e Kosovës që të na informojnë për këtë marrëveshje”, tha Krasniqi.

“Kemi marrëveshjen për lëvizjen e lirë, e arritur më 2011, mes Kosovës dhe Serbisë. Ka pasur edhe disa marrëveshje pasuese që rregullojnë lëvizjen e lirë mes dy vendeve. U vendos më vonë që qytetarët e Kosovës të mund të përdorin pasaportat nëpër aeroportet e Serbisë. Por, tani duhet të sqarohen se çfarë dokumentesh do të përdoren në këtë linjë ajrore. Është e nevojshme që të kemi më shumë sqarime për këtë marrëveshje nga institucionet e Kosovës, sepse vazhdimisht po informohemi nga institucionet e Serbisë”. Deklaroi ajo.

Sipas saj, nuk lejohet që të ketë marrëveshje sekrete shtetërore. Ndonëse këto marrëveshje kanë një dozë konfidencialiteti derisa nuk arrihen, Krasniqi tha se kjo s’do të thotë që ato të mos publikohen pasi të arrihen marrëveshjet.

“Ndoshta jo e tërë marrëveshja në detaje, por kryesoret duhet t’i bëhen të ditura publikut”, u shpreh ajo.

Tutje, ajo foli për mundësinë e një konsensusi politik për dialogun në rast të formimit të Qeverisë Kurti.

“Ne kemi parë në vazhdimësi që partitë që janë në qeverinë në dorëheqje kanë bërë thirrje të vazhdueshme për konsensusin politik për dialogun me Serbinë. E njëjta thirrje i është bërë edhe zotit Kurti, dhe, duke u marrë nga deklaratat e tyre politike, mund të ketë hapësirë për ndërtimin e një konsensusi politik në të ardhmen. Por, nëse do të kemi një qeverisjes mes VV-së dhe LDK-së, opozita do të jetë e fortë. Jo medoemos do të votojnë çdo nismë të qeverisë së ardhshme, nëse potencialisht do të jetë nga zoti Kurti”, tha Krasniqi.

23:48

Krasniqi: VV-ja e LDK-ja ta shikojnë interesin e shtetit jo atë partiak, nuk e kemi luksin për zgjedhje

Jeta Krasniqi nga KDI ka thënë se nga sot janë edhe 15 ditë që të lidhet koalicioni qeverisës ose të formohet një qeveri e pakicës.

Krasniqi thotë se pas datës 26 kur u zgjodh Konjufca, LDK e tërhoqi fjalën e saj për votimin e një qeverie të pakicës nga Vetëvendosje.

Ajo në Interaktiv të KTV-së ka thënë mundësia e funksionimit të një qeverie të pakicës do të ishte shumë e vështirë.

“Patjetër që Kurti mund të shkojë në seancë për krijimin e qeverisë edhe pa marrëveshje me LDK-në. Nëse do të kishim një qeveri të pakicës, funksionimi i saj do të ishte shumë i vështirë. Shumë nisma legjislative nuk do të shtyheshin përpara, ashtu siç ndodhi edhe me legjislaturën e kaluar. Mund të kishim një përsëritje të situatës së kaluar”, ka thënë ajo.

Krasniqi thotë se që nga data 26 dhjetor palët kanë qenë të zëshme duke e akuzuar njëra-tjetrën.

Sipas saj, besimi i palëve është dëmtuar.

“Ajo që është e qartë është se qytetarët e kanë shprehur vullnetin e tyre. Të dyja partitë kanë deklaruar në vazhdimësi se të njëjtat do të formojnë koalicion por se të dyja nuk po arrijnë të dakordohen”, ka thënë ajo.

Ajo thotë se të dyja partitë duhet të shikojnë interesin e përgjithshëm dhe jo atë partiak.

“Patjetër që i takon VV-së e LDK-së që të paraqesin opsionet më të mira për të arritur një marrëveshje, jo duke parë interesin partiak por atë të Kosovës. Kosova nuk e ka luksin që të shkojë në zgjedhje, kemi një situatë të paprecedent, kemi një Kuvend që ka dalë nga zgjedhjet e fundit dhe një qeveri të kaluar. Nëse i shohim afatet kohore e shohim se nuk janë aq të gjata. Janë 100 ditë por kjo është që nga mbajtja e zgjedhjeve”, ka thënë ajo.

Krasniqi ka thënë se buxheti është ndër ligjet kryesore që duhet të votohet deri në fund të shkurtit, duke shtuar se nëse një gjë e tillë nuk ndodhë, do të ketë ndalim të funksionimit të shumë institucioneve.

Sipas saj ekziston mundësia që qeveria aktuale ta dërgojë ligjin për buxhet të votohet në Kuvend.

“Ne kemi pasur edhe në të kaluarën koalicione që kanë parë thyerje të mëdha, por kanë arritur të funksionojnë. Por është e rëndësishme që të ndërtohet besimi mes partive politike dhe të arrijnë që parimet e tyre t’i shtyjnë përpara. Të mos kthehet qeverisja në luftë apo konkurrencë mes dy partive”, ka thënë ajo.

Sipas saj, zgjedhjet nuk duhet të jenë opsion i cili duhet parë në këtë kohë.