Kryetarja e Asociacionit të Gazetarëve të Kosovës, Gentiana Begolli, në një postim në profilin e saj në rrjetin social “Facebook”, ka kritikuar qasjen ndaj gazetarëve nga ana e Lëvizjes Vetëvendosje dhe LDK-së, gjatë negociatave për koalicion qeverisës.
“Tërësisht e papranueshme, jo korrekte, jo profesionale, për më tepër edhe jo humane, trajtimi i gazetarëve dhe xhiruesve gjatë përcjelljes së takimeve në mes VV e LDK. Përderisa këto takime zgjasin me orë të tëra, gazetarët janë të detyruar të qëndrojnë jashtë, në temperatura të ulëta”, ka shkruar Begolli.
Ajo ka kërkuar nga këto subjekte politikë që t`i trajtojnë gazetarët në mënyrë dinjitoze.
“Nëse gazetarët e xhiruesit do të vazhdojnë edhe me tutje të ballafaqohen me këtë trajtim, ne si AGK do të kërkojmë nga kolegët tonë bojkotimin e përcjelljes së takimeve, ku anëtarët e komunitetit tonë shpërfillen dhe pengohen në kryerjen e detyrës së tyre”, ka shkruar kryetarja e AGK-së.
