3 perditesime
21:24

Molliqaj: Vetëvendosja do të mbajë përgjegjësi nëse nuk zbardhet rasti Dehari

Dardan Molliqaj nga PSD-ja ka thënë se pasi Vetëvendosje fitoi zgjedhjet e 6 tetorit, kjo parti do të mbajë përgjegjësi nëse nuk zbardhet rasti i vdekjes së aktivistit të saj, Astrit Dehari, në burgun e Prizrenit tre vjet më parë.

Ai në Rubikon të KTV-së ka thënë se pasi që Vetëvendosje do të bëjë qeverinë, ajo e ka në përgjegjësi, përmes “institucioneve të çkapura”, të zbardhë këtë rast.

“Ishte e pashmangshme se si është sjellë partia karshi këtij rasti, sepse janë populistë. Astriti ishte aktivisht i jashtëzakonshëm dhe i shkëlqyeshëm. Jeta e tij u humb në përgjegjësinë e shtetit. Pa të drejtë. Tashmë kemi një institut kredibil që ka bërë raport, e institucionet e çkapura sepse kemi qeveri të re shumë shpejt e kanë detyrë të merren me të. VV-ja do të mbajë përgjegjësi sepse është në qeveri”, ka thënë ai.

Sipas Molliqajt, Vetëvendosje “për të bërë pushtetin për vete, harroi që në kohën e vdekjes së Astrit Deharit qeverinë e udhëhiqte LDK-ja, me të cilën po bisedon tash për të formuar qeverinë”.

“Shpresoj shumë, por s’jam optimist shumë, sepse edhe këta janë si LDK-ja që flet shumë për vrasjet e pasluftës e s’bën asgjë edhe pse kishte shumë gjëra në duar. Rasti i Deharit është përgjegjësi ekskluzive e institucioneve të Kosovës, jo vetëm PDK-së, por edhe LDK-së, por kjo u harrua për të bërë pushtetin për vete. Kanë përgjegjësi jo vetëm morale, në raport me të, familjen, rrethit, por ndaj një momenti kyç për drejtësinë për ta zbardhur këtë rast. Duhet të zbardhim rastin nga institucionet e pavarura e të ketë vendim meritor e të gjithë palët të cilat kanë ndjeshmëri për këtë rast të marrim shpërblim në kuptim emocional”, ka përfunduar ai.

20:56

Sipas Molliqajt, zgjedhjet e reja e kthejnë PDK-në në pushtet

Sipas Dardan Molliqajt të PSD-së, nëse dështon arritja e marrëveshjes mes Vetëvendosjes dhe LDK-së për formimin e qeverisë, kjo do të sillte rikthimin e PDK-së në pushtet.

Ai ka thënë se nuk ka kuptim që VV e LDK të çojnë vendin në zgjedhje të reja e të synojnë më pas koalicion të ri mes vete, por njëra nga to do të bënte koalicion me PDK-në për qeverinë e re.

“LDK është parti e elitave, sistemeve të gjata të politikës, lojën politike qysh ata e shohin është edhe negociimi në tavolinë, LDK-ja nuk po del jashtë vetes. LDK-ja që nga fillimi me PDK-në ka qenë në këtë logjikë, ndërsa VV nuk është parti e elitave. VV-ja ka qasje dominuese, e dominon tjetrin”, ka thënë ai.

“Nuk po bëhen më negociatat në takime por në studiot televizive, pra që ta dominojnë tjetrin. Për mua, si parti opozitare, është vetëm një kërkesë, ata duhet ta krijojnë një qeveri. Ata e marrin përgjegjësinë që nuk po dallojnë kurrgjë”, ka thënë Molliqaj duke iu referuar se fillimisht u duartrokit mënyra e tyre e negociatave për programin mirëpo në fund doli se “janë si gjithë të tjerët, duke ngecur të pozitat”.

“Nuk do të mund të qeverisin mirë, gjatë krejt kohës do të këqyrin kush kë po e rrezikon. E kanë të pamundshme për shkak të dallimeve të thella ideologjike që kanë. Besoj se do të rritet numri i kritikëve në LDK kundër këtij bashkëpunimi, nga vdekja e Rugovës, LDK-ja po kthehet në një parti e cila i shërben partisë së parë për ta bërë qeverinë”, ka shtuar ai.

20:43

Molliqaj: Kam preferuar një koalicion me LDK-në, do t’i fitonim zgjedhjet

Kryetari i ri i PSD-së, Dardan Molliqaj, ka thënë se vetë ka preferuar një koalicion parazgjedhor me LDK-në, për zgjedhjet e 6 tetorit. Sipas tij, një koalicion i tillë do të fitonte zgjedhjet.

Në Rubikon të KTV-së, duke komentuar dështimin në zgjedhje, ku PSD-ja s’arriti të marrë asnjë ulëse në Kuvend, si pjesë e koalicionit me AAK-në, Molliqaj ka thënë se edhe ky koalicion i ndëshkoi.

“Ne gabuam, ne i morëm vendimet, nuk na tha askush t’i bëjmë. Një rrugë të cilën ne vendosëm të bëjmë, por që të tjerët nuk e pranuan, ne kemi vendosur me vetëdije ta mbështesim ekipin negociator. Nuk kam qenë i bindur që ky koalicion do ta binte rezultatin që unë dhe të tjerët kishim dëshirë ta kemi. Unë kam preferuar në atë kohë se koalicioni më i mirë do të ishte me LDK-në, por s’ka pasur vullnet, pothuajse fare, për shkak të arrogancës aty”, ka thënë ai.

Sipas Molliqajt, kandidati i VV-së për kryeministër, Albin Kurti, është takuar dy herë fshehtas me presidentin Hashim Thaçi.

Ai ka thënë se tashmë është e ditur se Albin Kurti ka pranuar kushtet e amerikanëve, ku përfshihet vazhdimi i dialogut me Serbinë dhe bashkëpunimi me presidentin Hashim Thaçi, Gjykata Speciale dhe bashkëpunimi me listën serbe.

"Tashmë janë dy takime që janë mbajtur mes presidentit dhe kandidatit për kryeministër, Albin Kurti. Një është mbajtur jashtë vendit dhe një brenda vendit, të dyja janë mbajtur fshehtë nga publiku. Nuk kam asgjë kundër për mbajtjen e takimeve por jam kundër asaj që nuk po i bëjnë publike”, ka deklaruar ai.

20:20

Sipas Molliqajt, VV-LDK s’dallojnë nga PAN-i për dialogun me Serbinë

Dardan Molliqaj, kryetar i ri i PSD-së, ka thënë se Vetëvendosje dhe LDK-ja që po përpiqen të formojnë qeverinë, nuk dallojnë nga koalicioni PAN që është në qeverisje në ikje, në pikën e dialogut me Serbinë.

Molliqaj, që sapo ka marrë postin e të parit të PSD-së, pas dështimit në zgjedhjet e 6 tetorit, ka thënë se e sheh si gabim “sjelljen racionale përballë partie populiste”.

“U bënë më shumë se një vit e gjysmë dhe pati mjaftueshëm zhvillimet politike e në veçanti zgjedhjet që prunë këtë rezultat zgjedhor. Menjëherë pas rezultatit filluan diskutimet dhe vlerësimet se çka ishte arsyeja kryesore që solli këtë rezultat për Partinë Socialdemokrate. Ne e kishim të qartë që modeli qeverisës i qeverisë që ishte, pra PAN-i, nuk ishte as modeli që e dëshironim as vlerësonim, por konsideruam se si një sjellje racionale do të ishte zgjidhje e duhur, pasi dinim se dy partitë tjera s’ishin ndryshe në ato tema, për dialogun. Gjithçka njëjtë, te dialogu. Përveç ndërrojnë emrat, jo qëndrimet, e jo platformat”, ka thënë ai në Rubikon të KTV-së.

Ai ka thënë se Vetëvendosje u mundua të mashtrojë opionionin pas fotografive të takimit të Xhelal Sveçlës me Marko Gjuriqin.

“Ne kemi qenë në ato takime, por ajo që pamë ishte se kishte një mashtrim. S’ka problem të takohesh me Gjuriqin, por fakti që u mohua se edhe darkën e kafen e ka organizuar organizatori. Në pjesën zyrtare janë të caktuara ulëset, e në pjesën jozyrtare mund të uleni ku të doni. Ishte mashtrim publik”, ka thënë ai.

Sipas tij, tash “PSD-ja në këtë situatë popullizmit s’do t’i përballemi me racionalitet por me kritikë”.

Ai ka thënë se ish-kryetari i PSD-së, Shpend Ahmeti, që është kryetar i Prishtinës, po “bën qeverisjen më të mirë komunale në Kosovë”.

Molliqaj po ashtu ka treguar se çka çoi në zgjedhjet e reja në PSD dhe si ia doli ai të bëhej kryetar.

“Besoj që jo shumë më herët se 10 ditë para Kuvendit, ajo që ishte e qartë ishte që e kishim bindjen e thellë për rrugën që duhet të ndjekë Partia Socialdemokrate, profilizimin dhe politikat”, ka thënë ai. “Në konsultim me të gjithë bashku, kemi vendosur që unë të jem kandidat për kryetar. Kam insistuar që votimi të jetë i fshehtë. Janë propozuar disa kundërkandidatë të cilët nuk e kanë pranuar kandidaturën për arsye të ndryshme dhe pastaj në garë kam qenë i vetëm”, ka thënë Molliqaj.