Mbrojtja kërkon që të hidhet poshtë aktakuza për rrahje deri në vrasje të gruas nga bashkëshorti

Dorentina Thaqi Dorentina Thaqi 07 November 2019 20:36

Ka vazhduar gjykimi ndaj Ilir Haxhiajt që akuzohet për lëndim të rëndë trupor që i kishte shkaktuar gruas së tij, e cila pastaj kishte vdekur nga plagët e marra.

Megjithëkëtë, mbrojtja e tij insiston se aktakuza duhet të hidhet poshtë krejtësisht dhe këtë kërkesë e kanë bërë edhe në seancën e së enjtes, raporton KTV.

Në Gjykatën Themelore në Prizren, avokati mbrojtës i tij, Skënder Morina, ka thënë se Prokuroria nuk disponon prova të mjaftueshme për akuzat që i janë vënë klientit të tij.

E me këtë kërkesë, nuk është pajtuar prokurori i rastit, Metush Biraj, i cili ka thënë se nga provat e grumbulluara gjatë fazës së hetimit, është dëshmuar se i akuzuari ka kryer veprën penale, për të cilën edhe akuzohet.

Ai i ka propozuar Gjykatës që të vazhdohet me gjykim kryesor.

Në aktakuzën dhe në raportin e mjekësisë ligjore që e kishte siguruar “Kohavisioni”, theksohet se për shkak të lëndimeve dhe goditjeve që ka marrë nga bashkëshorti i saj, e ndjera H.D, e cila ishte nga Rahoveci, pas trajtimit në QKUK, ka vdekur.

Për këtë, avokati i familjes të së ndjerës, ka kërkuar edhe njëherë që të bëhet rikualifikimi i veprës penale.

H. D, nga Rahoveci, kishte vdekur më 15 qershor të këtij viti, pas dy javësh trajtimi intensiv në QKUK.

© KOHA. Të gjitha të drejtat janë të rezervuara.

Komentet

Shto koment

Të ngjashme