Cakaj: Kemi nevojë për rritje të integrimit të brendshëm ndër-shqiptarë

22 October 2019 20:32
22:20

Sipas ministrit në detyrë të Punëve të Jashtme të Shqipërisë, Gent Cakaj, te kombi shqiptar ka nevojë për rritjen e integrimit të brendshëm ndër-shqiptarë.

Duke folur për Ibrahim Rugovën e Arbën Xhaferi si “gjeneratë që ka pasur motive të thella kombëtare, por i ka përshtatur e interpretuar në kuadër të rrethanave të dhëna”, Cakaj në Rubikon ka thënë se aktualisht “jemi në shkallën që duhet të mendojmë për format e mëtejme të përafrimit kombëtar”.

“Sot besoj që shqiptarët, unë dhe kolegët e mi, ne që jemi aktivë në politikë mund të kemi ideal të ngjashëm, jo më për artikulim policentrit të interesave kombëtare në rrethanat e dhëna, por paralelisht në ruajtjen e frymës euroatlantike pa cenuar agjendën e Bashkimit Evropian, interesat e BE-së e pa rënë në konflikt me vlerat tona tjera që kemi si komb. Po ashtu jemi në shkallën që duhet të mendojmë për format e mëtejme të përafrimit kombëtar. Kësisoj flas për nevojën për rritjen e integrimit të brendshëm ndër-shqiptarë, e kjo mund të jetë një prej detyrave që definon edhe gjeneratën që unë i përkas”, ka thënë ai.

21:39

Cakaj: Kushdo që ka dashur të më paraqes si shërbëtor të ndryshimit të kufijve - ose ka qenë dashakeq ose i paditur

Gent Cakaj, ministri në detyrë për Evropën dhe Punët e Jashtme të Shqipërisë, në Rubikon të KTV-së, ka treguar se si ka ardhur deri në këtë post.

Ai i ka hedhur poshtë deklaratat e përfolura në publik se ka qenë Baton Haxhiu ai që e ka bërë ministër atë në kabinetin e Edi Ramës.

“Mua më ka njoftuar me kryeministrin e Shqipërisë, Edi Rama, shefja aktuale e kabinetit të kryeministrit. Kam pasur disa takime paraprake me të, kam pasur komunikim aktiv me kabinetin e kryeministrit. Në momentin që e kam marrë shtetësinë shqiptare, kam punuar aktivisht me zyrën e kryeministrit. Rama më ka emëruar Koordinator kombëtar për skrining, dhe kam qenë zv/ministër përgjegjës për Integrimin. Bazuar në performancën time, kryeministri Rama ka vendosur të ma besojë detyrën e ministrit për Evropën dhe Punët e Jashtme. Asnjëherë s’ka qenë në pyetje çështja e Kosovës për mua, e as për largimin e ministrit paraprak. Në intervistën e dhënë më 2018, ku unë supozohet se kam mbështetur idenë e shkëmbimit të territoreve, unë aty them se nëse një marrëveshje e tillë është precendet për të gjitha të arriturat e Ballkanit Perëndimor, atëherë nuk duhet të ndodhë”, ka thënë Cakaj.

Ai sqaron më tej deklaratat e tij në këtë intervistë, ku thekson se ka hedhur poshtë idenë e ndryshimit të kufijve të Kosovës.

“Unë them më pas se ndryshimet e kufijve në rajon duhet të përjashtohen kategorikisht. Më pas them se shfrytëzoj rastin të jem kritik për idenë e ndryshimit të kufijve, dhe nuk do të mbështes një marrëveshje të tillë. Kam përmendur Rumaninë dhe vende tjera. Deklarata ime e parë publike në jetë ka qenë te Blendi Fevziu, në shkurt më 2018, unë kam qenë kundërshtari i kësaj ideje, pra për shkëmbimin e territoreve”, u shpreh më tej ministri në detyrë Cakaj.

Duke iu referuar akuzave se ka shërbyer kundër interesave të Kosovës dhe kundër interesave kombëtare, Cakaj thotë se përderisa është në detyrë dhe akuzat i janë bërë në, “nuk mund të flas derisa jam në detyrë, sepse kam kufizim në komunikim”.

Thotë se edhe Presidenti i Shqipërisë, Ilir Meta, në dekretin e tij ku ka kundërshtuar emërimin e tij në postin e ministrit, “ka nxjerrë jashtë kontekstit deklaratat e mia për ndryshimin e kufijve”.

“Unë kam bërë analizë, por s’kam marrë qëndrim. Përderisa për këmbim të kufijve është folur për dhënien e veriut të Kosovës e marrjen e Preshevës, kam thënë se ai term, përveç që është relativizim gjuhësor, tani më nuk po e konceptojnë sikur ndryshim të madh të territoreve midis Kosovës e Serbisë, por ekziston një prirje për ta paraqitur si një proces të natyrshëm të ndryshimit të kufijve. Nëse një fjali e tillë ka bazë për të më paraqitur mua si shërbëtor për ndarjen e Kosovës, në rastin më të mirë është padituri e në rastin më të keq dashakeqësi, por mund të jenë edhe të dyja. Kushdo që ka pasur dëshirë, qoftë për shkak të xhelozive a inateve personale, që ka synuar të më vendos mua në shërbim të kësaj agjende - ose ka qenë dashakeq ose i paditur”, potencoi Cakaj.

21:19

Cakaj e quan të palogjikshme deklaratën e Haradinajt se punoi kundër Kosovës

Të palogjikshme dhe me kundërthënie e ka cilësuar Gent Cakaj, ministër në detyrë i Punëve të Jashtme të Shqipërisë, deklaratën e kryeministrit në largim të Kosovës, Ramush Haradinaj, që tha se Cakaj ka punuar kundër Kosovës dhe ka punuar në mënyrë aktive për shkëmbim territoresh mes Kosovës e Serbisë.

Cakaj ka thënë se s’ka punuar kurrë për një gjë të tillë dhe është i gatshëm të japë përgjegjësi nëse publikohet diçka që tregon se ai ka punuar për ndarjen e Kosovës.

“Deklarata e kryeministrit, nëse unë e kam lexuar me saktësi, nëse ishte e raportuar saktësisht, thuhet se Cakaj ka tetë muaj që nuk e mbështet më këtë ide, por se në fillim ishte entuziast. Unë që tetë muaj kam marrë detyrën në tërësi. Që nënkupton është deklaratë me pakoherencë logjike e kundërthënie të brendshme. Deklaratë që për 30 sekonda ka pakoherencë logjike s’ia vlen të komentohet. E palogjikshme dhe e pavërtetë. Për shkak të edukatës s’po lëshohem në deklarata tjera”, ka thënë ai në Rubikon të KTV-së.

“Sa i përket ndarjes, që nga dita e parë e punës e deri sot as s’e kam mbështetur këtë ide e as s’ka një diplomat në minutat e takimit ku mund të gjendet mbështetje e kësaj ideje, nëse ka le të zbulohet dhe do të jap përgjegjësi. S’e kam mbështetur këtë ide, as aktivisht as pasivisht. S’ka diplomat ndërkombëtar që ka hyrë në zyrën time për të kërkuar mbështetje për një gjë të tillë, për ndarje apo dëmtim territorial të Kosovës. Asnjëherë. Është spekuluar shumë dhe kam heshtur qëllimisht sepse kam konsideruar se është jodinjitoze të merrem me fantazitë më të shfrenuara të njerëzve”, ka thënë ai duke shtuar se nëse Shqipëria do të donte diçka të tillë “s’do të zgjidhte një 28-vjeçar si unë pa ndikim në dialog e pa kontroll në struktura”.

21:03

Cakaj: Shqipëria e ka vijë të kuqe Republikën e Kosovës

Kosova është vija e kuqe për Shqipërinë në raportet e Ballkanit Perëndimor, sipas ministrit në detyrë të Jashtëm të Shqipërisë, Gent Cakaj.

Duke folur për mini-Schengenin Ballkanik, Cakaj ka thënë se parim i Shqipërisë është që në asnjë rrethanë të mos merren vendime për lehtësira pa përfshirjen e Kosovës.

“Sa di unë, ishte iniciativë për të cilën ishin të informuar të gjithë liderët e Ballkanit Perëndimor (mini-schengeni). Parim është që në asnjë rrethanë të mos ketë marrje të masave apo detyrimeve konkrete në raport me lehtësirat që po planifikohet të ndodhin, ku përjashtohet Kosova. Shqipëria e ka të qartë vijën e kuqe, e ajo është Republika e Kosovës. Tirana zyrtare e sheh rajonin me sytë e Kosovës dhe flet me zërin e Kosovës, por jo në emër të saj sepse mund të ketë qëndrime të pavarura”, ka deklaruar më tej ai duke shtuar se Shqipëria flet në emër të Kosovës për ta mbrojtur Kosovën.

20:53

Cakaj: Shqipëria largohet nga mini-Schengeni ballkanik nëse përjashtohet Kosova

Ministri në detyrë i Punëve të Jashtme të Shqipërisë, Gent Cakaj, ka thënë se Shqipëria do të largohet nga iniciativa e mini-Schengenit ballkanik në rast se Serbia bën probleme në raport me Kosovën.

Cakaj, në një intervistë në Rubikon të KTV-së, ka thënë se termi Mini-Schengen duhet të ndryshojë, ndërsa ka theksuar se takimi i parë trelateral mes kryeministrit të Shqipërisë, Edi Rama, presidentit serb, Aleksandar Vuçiq, dhe kryeministrit në largim të Maqedonisë së Veriut, Zoran Zaev, në Novi Sad të Vojvodinës së Serbisë, u ka bërë thirrje edhe liderëve të tri shteteve tjera të Ballkanit që t’i bashkohen kësaj iniciative.

“Ka qenë takim trelateral në vazhdën e takimeve të mëhershme. Shumë shpejt pritet të kemi një taksim trelateral me Malin e Zi e Kroacinë, me Kroacinë e Kosovën, e kështu me radhë. Nuk do të jetë ndërmarrje trelaterale. Kryeministri Rama e ka pasur kusht thelbësor të panegociueshëm, që nëse Kosova përjashtohet nga ky bashkëpunim, Shqipëria tërhiqet menjëherë. Aty u është bërë ftesë tri shteteve tjera, Kosovës, Malit të Zi dhe Bosnjës, që t’i bashkohen kësaj iniciative”, ka thënë Cakaj, raporton Koha.net.

Ai tha se edhe kreu i LVV-së, Albin Kurti, partia e të cilit fitoi zgjedhjet e 6 tetorit dhe që është pretendenti kryesor për të marrë postin e Kryeministrit, ka thënë se është i interesuar të marrë më shumë informacione për këtë iniciative.

“Shqipëria s’bëhet pjesë e asnjë iniciative ku përjashtohet Kosova. Kjo iniciativë nuk është finalizuar ende sepse pritet kontributi i shteteve tjera të Ballkanit. Përfshirja e Kosovës është kusht që Shqipëria të vazhdojë të jetë pjesë e kësaj iniciative”, deklaroi ministri në detyrë i Jashtëm i Shqipërisë, Gent Cakaj.

20:49

Cakaj thotë se takimi Rama-Kurti do të ndodhë për pak ditë

Gent Cakaj, ministër i Jashtëm i Shqipërisë, ka thënë se kryeministri i Shqipërisë, Edi Rama do të takohet brenda pak ditësh me Albin Kurtin e Vetëvendosjes që pritet të marrë mandatin për formimin e qeverisë së re.

Në Rubikon të KTV-së, Cakaj ka thënë se “Rama do të takohet me Kurtin brenda disa ditësh dhe do të dakordojnë qëndrimet e tyre” duke iu referuar mini-shengenit ballkanik.

20:32

Cakaj tregon arsyet pse Zaev dha dorëheqje e Rama jo

Ministri i Jashtëm i Shqipërisë, Gent Cakaj, ka dhënë arsyet pse kryeministri i Maqedonisë së Veriut Zoran Zaev dha dorëheqje pas dështimit për hapjen e negociatave për anëtarësim në BE, dhe një gjë të tillë s’bëri Edi Rama si kryeministër i Shqipërisë pavarësisht dështimit të njëjtë.

Sipas tij, si pikë e rëndësishme dalluese janë kushtet që janë përmbushur, punët e brendshme dhe referendumi që ishte bërë në Maqedoni me rastin e ndryshimit të emrit.

“Ka disa gjëra që duhet të sqarohen, e para është fakti se dy vendet janë njëjtë të zhvilluara në rrugën evropiane, por s’do të thotë se dy vendet qëndrojnë njëjtë brenda. Shqipëria e Maqedonia kanë merituar hapjen e negociatave sepse kanë përmbushur kushtet, por kushtet s’ishin të njëjta. Sepse Maqedonia s’ka pasur obligim të kryejë vetingun, por adresimin e prioriteteve nga marrëveshja e vitit 2015 dhe mbylljen e problemeve me Greqinë. Shqipëria ka pas kushte tjera. S’ka pas bazë të ndodhë ndarja, sepse të dyja kanë përmbushur detyrat. Nga qershori 2018 kur edhe realisht filloi procesi, por që u shty vendimi, morëm mësim që procesi i çeljes së negociatave varet nga dy shtylla, dinamika e reformave të brendshme dhe trendi i reformave në Evropë. Kemi ulur pritjet duke mos bërë zotime të prera se negociatat do të hapen, e te Maqedonia pati referendum për ndryshim të emrit shtetëror dhe në vetë pyetjen ishte nëse qytetarët pranojnë ndryshimin e emrit në këmbim të perspektivës evropiane. BE-ja s’mbajti premtimin me këtë rast”, ka thënë Cakaj në Rubikon të KTV-së.

Sipas tij, faktor tjetër është se “Maqedonia s’ka barriera që pamundësojnë një proces të brendshëm zgjedhor” ndërsa i treti se “Maqedonia në shumën e kushteve, qeveria pati përgjegjësi më të madhe se ajo në Shqipëri”.

© KOHA. Të gjitha të drejtat janë të rezervuara.

Komentet

Agim krasniqi05/11/2019 15:14

Cakaj eshte djal i zgjut si sofist i mire,i mare nga Rama per ta mbrojtur ate, Rana nuk jep dorheqje sepse e din se e pret burgu.

Shto koment

Të ngjashme