KDI-ja gjen parregullsi të shumta në tenderët e ShSKUK-së

Përfshirja e kërkesës për Autorizimin për Marketing si kriter për të aplikuar në një procedurë tenderuese, blerja e produkteve dhe pajisjeve mjekësore që nuk u përshtaten specifikave të përcaktuara me Listën Esenciale të Barnave, tejkalimi i vlerës së parashikuar të kontratës, si dhe kriteret jo të standardizuara në tenderë të ndryshëm janë disa nga parregullsitë që Instituti Demokratik i Kosovës (KDI) ka gjetur në procedurat e Prokurimit në Shërbimin Spitalor Klinik dhe Universitar të Kosovës (ShSKUK).

Këto gjetje janë rezultat i monitorimit të 12 mostrave të dosjeve të tenderëve që KDI-ja e ka zhvilluar në periudhën mars-qershor të këtij viti, shkruan sot Koha Ditore. Gjetjet e këtij hulumtimi, ku janë analizuar proceset e tenderimit me produkte dhe pajisje mjekësore nga Lista e Esenciale e Barnave, janë publikuar të premten në një tryezë diskutimi.