Hoti: Dialogu duhet të udhëhiqet vetëm nga Qeveria Foto: Koha

Hoti: Dialogu duhet të udhëhiqet vetëm nga Qeveria

04 July 2019 12:42

Shefi i Grupit Parlamentar të LDK-së, Avdullah Hoti, ka paraqitur edhe njëherë qëndrimin e kësaj partie rreth dialogut me Serbinë, se si i tillë duhet të udhëhiqet vetëm nga Qeveria e Kosovës që edhe është legjitime për këtë.

“Kosova ka humbur dy vite te plota me ndërhyrjet jo kushtetuese të Presidentit dhe Qeverisë përmes ekipit dialogues në procesin e dialogut. Krejt kjo ka ndodhur për shkak se Kryeministri ka abstenuar nga kompetencat kushtetuese, duke tentuar të bartë kompetencat fillimisht tek Presidenti përmes draft-platformës që Kryeministri e sjelli në Kuvend në Prill 2018, e pastaj tek ekipi dialogues përmes platformës dhe ligjit jo kushtetues për dialog”, ka thënë Hoti.

Ka theksuar edhe vendimin e Gjykatës Kushtetuese e cila e vlerësoi Ekipin Negociator jokushtetues.

“Gjykata Kushtetuese e ka thënë qartë. Dialogu udhëhiqet vetëm nga institucionet që kanë kompetenca kushtetuese për të përfaqësuar Kosovën në çështje të tilla. Kushdo tjetër që ndërhynë në këtë proces bënë shkelje kushtetuese, siç ka bërë koalicioni PAN përmes ekipit dialogues dhe siç po bën çdo ditë Presidenti. LDK mbetet e vendosur për këtë çështje. Vendimi i Gjykatës Kushtetuese na ka dhënë plotësisht të drejtë, se dialogu udhëhiqet nga Qeveria me mbikëqyrje të Kuvendit. Presidenti ka vetëm rol konsultativ. Ne besojmë se dialogu duhet të udhëhiqet vetëm nga Qeveria që është legjitime, bazuar në platformë që bazohet në Kushtetutën e Kosovës dhe që miratohet nga 2/3 e votave të deputetëve”, përfundon Hoti.

© KOHA. Të gjitha të drejtat janë të rezervuara.

Komentet

Shto koment

Të ngjashme