4 perditesime
21:14

Mbyllja e mitingut të PS-së shoqërohet me përplasje polici-protestues

Është mbyllur mitingu i Partisë Socialiste në Shkodër, ashtu si edhe protesta e opozitës. Policia ka mbajtur për disa minuta, pas mbarimit të fjalimit të Edi Ramës, kordonin që ndante protestuesit me mbështetësit e Qeverisë.

Tërheqja e policisë, u shoqërua me përplasje të herë pas hershme me protestuesit. Efektivët shoqëruan edhe një prej kolegëve që ishte lënduar gjatë përplasjes.

Aktualisht situata paraqitet e qetë në Shkodër./tch/

20:30

Miting dhe protestë, Rama-Ademit: Kryebashkiakja më e paaftë në Shqipëri

Ndërkohë që kryeministri Edi Rama po zhvillon takimin elektoral me mbështetësit e Partisë Socialiste, 150 metra më larg janë mbështetësit e opozitës në Shkodër që po protestojnë dhe që drejtohen nga kryebashkiakja Voltana Ademi.

Në hyrje fjalës së tij, Rama shmangu komentet mbi protestuesit, por nuk la pa komentuar kryebashkiaken Ademi, të cilën e konsideroi si një nga drejtueset më të paafta në historinë e bashkive të Shqipërisë.

Rama theksoi gjithashtu se “zgjedhjet e 30 qershorit nuk mund të shtyhen dhe nuk mund të vihen në dyshim.“

Përpara se të niste takimi i Ramës, protestuesit u përplasën me policinë në përpjekje për të penguar organizimin e PS. Policia përdori edhe gaz lotsjellës për të zbrapsur mbështetësit e opozitës./Tch/

20:24

Voltana Ademi i bashkohet protestës: Nuk lejojmë kriminelin Rama të uzurpojë qytetin

Kryebashkiakja Voltana Ademi ka zbritur në shesh për t’ju bashkuar protestës së opozitës që kundërshton praninë e kryeministrit Edi Rama në Shkodër. Ademi nuk firmosi lejen për organizimin e takimit elektoral të Ramës duke theksuar se 30 qershori është shfuqizuar si datë për zgjedhjet lokale, por PS vendosi të vijojë me planin e saj.

Ademi u shpreh pak minuta më parë se shkodranët nuk do të lejojë uzurpimin e qytetit nga një kriminel si Edi Rama.

“Nuk mund të lejojmë që një bandë kriminale të uzurpojë qytetin. Shkodra ka demonstrua të gjithë jetën e vetë që nuk mund të lejojë uzurpatorin dhe kriminelin e Edi Rama dhe të tjerë përpara tij. E drejta jonë për të protestuar dhe për të thirrur ‘Rama ik’, është e drejta jonë legjitime”, u shpreh kryebashkiakja demokrate.

Ajo deklaroi gjithashtu se “nuk ka asnjë arsye që Policia e Shtetit të gjuajë mbi njerëzit, qoftë me gaz, qoftë me helme.”

Menjëherë sapo Voltana Ademi është afruar pranë kordonit të policisë, ndaj saj u hodh gaz lotsjellës. PD e konsideroi veprimin e policisë ndaj kryebashkiakes si një akt të paprecedent.

Mbështetësit e opozitës vijojnë të qëndrojnë pranë sheshit ku do të mbahet mitingu elektoral i Partisë Socialiste. “Rama ik” është thirrja më e shpeshtë që dëgjohet nga protestuesit. Për momentin janë duke u hedhur gurë dhe sende të tjera drejt efektivëve, por nuk ka përplasje fizike./tch/

18:29

Protesta në Dajç, Rama zgjedh rrugën dytësore për të kaluar Lezhën

Kryeministri Edi Rama ka shmangur aksin kryesor Lezhë-Shkodër, pasi në kryqëzimin e Dajçit janë mbledhur një numër i konsiderueshëm i protestuesve të opozitës. Sipas burimeve të Top Channel, Rama ka zgjedhur një rrugë dytësore për kaluar Lezhën.

Aktualisht, kryeministri Rama ndodhet në bashkinë e Vaut të Dejës, ku po prezanton kandidatin për zgjedhjet lokale të 30 qershorit (të shfuqizuara nga Presidenti i Republikës).

Rama do të zhvillojë takim elektoral edhe në Shkodër, por kryebashkiakja Voltana Ademi nuk pranoi të firmoste lejen, pasi ka njohur dekretin e Ilir Metës./tch.

19:29

Rama në Shkodër, protestuesit përplasen me policinë

Situatë e tensionuar paraqitet aktualisht në qytetin e Shkodrës ku pritet të nisë takimi elektoral i kryeministrit të Shqipërisë Edi Rama.

Protestuesit e opozitës janë përplasur me forcat e policisë, duke kundërshtuar praninë e Ramës.

Policia ka përdorur edhe gazin lotsjellës, për të bërë të mundur shpërndarjen e protestuesve.

Për momentin janë duke u hedhur gurë dhe sende të tjera drejt efektivëve, por nuk ka përplasje fizike.

Mbështetësit e opozitës vijojnë të qëndrojnë pranë sheshit ku do të mbahet mitingu elektoral i Partisë Socialiste.

“Rama ik” është thirrja më e shpeshtë që dëgjohet nga protestuesit./tch/