Aliu sheh gjasa reale për rrëzimin e Qeverisë, pret të bashkohen të pakënaqurit nga PAN-i

Aliu thotë se “Thaçi e Molliqaj janë i njëjti brum shpifësish”

20 May 2019 23:32
00:15

Deputeti i Vetëvendosjes, Liburn Aliu, ka thënë se bashkëpartiaku i tij Glauk Konjufca s’ka qenë në SHIK, siç ishte pretenduar nga deputeti i PSD-së, Dardan Molliqaj.

Aliu ka deklaruar se Molliqaj ka provuar të shpifte për Konjufcën, por, sipas tij, gjithçka dështoi qysh në atë që mund të konsiderohej argumenti i parë.

“Absolutisht s’e besoj që ka qenë në SHIK. As që është biseduar ndonjëherë kjo çështje. Tash që është hapur kemi bërë shaka me shpikjen e Molliqajt. E kemi dëgjuar për herë të parë nga Molliqaj. Ai e përfshiu Fadil Lepajën e ai doli shumë qartë që deklaroi të kundërtën. I vetmi argument që provoi të vërtetonte shpifjen, pikërisht personi konkret doli e tha se në çfarëdo lloj gjykate mund të sqarojë çështjen”, ka deklaruar Aliu në Interaktiv të KTV-së.

Sipas Aliut, Molliqaj e bën këtë me qëllimin që të bëhet faktor.

Ai tutje ka thënë se deputetja e PSD-së, Aida Dërguti mund të kishte qenë në këtë shërbim. Sipas tij, megjithatë, kjo s’ka ndikuar fare në Vetëvendosje sepse “njerëzit në momente të caktuara mund të besojnë të kyçen në SHIK e më pas edhe të ndahen”.

Për akuzat e presidentit Hashim Thaçi se deputeti i VV-së, Sami Kurteshi, ka qenë në SHIK, Aliu u është përgjigjur me: “I njëjti brum si shpifësit tjerë”.

“Presidenti Thaçi është i njëjti brum. Kryeshpifësi i të gjithë shpifësve. Neve na janë vënë shumë etiketa e ne kur kundërshtonim Specialen e Zajednicën na quanin njerëz të Rusisë e Serbisë. Akuzat e tilla vazhdojnë. Kështu përpiqen të mbijetojnë ndërkohë që vendi shkatërrohet përditë”, ka thënë Aliu.

00:13

Aliu: Ideja për kufijtë e koordinuar me Vuçiqin e Ramën ka dështuar

Sipas deputetit të Vetëvendosjes, Liburn Aliu, plani për ndryshim kufijsh mes Kosovës e Serbisë aktualisht mund të konsiderohet i dështuar, por që s’do të thotë që një gjë e tillë nuk mund të rihapet.

Ai ka thënë se në Samitin e Berlinit qëndrimi i Gjermanisë tregoi se Kosova ka mbështetjen e madhe dhe se “plani i Thaçit i koordinuar me Vuçiqin dhe Ramën ka rënë”.

“Ideja e ndryshimit të kufijve, ndarjes së Kosovës, konsiderohet njëherë për njëherë e dështuar, por s’do të thotë që s’mund të rihapet. Ajo që ka ndodh në Berlin ishte një qëndrim i fortë i Gjermanisë karshi Kosovës e sidomos insistimi që Serbia ta njohë Kosovën është më intensiv se kurdo më herët. Çdo aventurë që mendohet nuk duhet të ndodh para njohjes nga Serbia. Kemi mbështetje më të fortë nga Gjermania dhe s’duhet të prishim raportet vetëm se faktori Rusi mund të futet në këtë mes”, ka thënë ai në Interaktiv të KTV-së.

Aliu ka thënë se institucionet s’duhet të qëndrojnë lehtësisht me idenë se gjithçka ka përfunduar sa i përket ndryshimit të kufijve.

“Edhe pse ka qenë bukur intensiv e i mirë koordinuar me Vuçiqin e fatkeqësisht me Ramën në Shqipëri, si ide tani për tani ka rënë. Por ka qenë ide e projektuar që ka arritur të depërtojë e të lobohet. Tash ky pozicion është shumë më i dobët se më përpara. Por s’duhet të rrimë lirë karshi kësaj ideje. Për mendimin tim, vendimin vendimtar e ka dhënë protesta e shtatorit dhe kundërshtimi i përgjithshëm që e la të vetmuar presidentin Hashim Thaçi”, ka thënë Aliu.

Ai ka thënë se rol pozitiv në ndaljen e idesë për korrigjim kufijsh ka pasur edhe kryeministri Haradinaj përmes taksës. Ai ka thënë se taksa duhet të vazhdohet.

“Kërkesa ndërkombëtare që të hiqet taksa nuk është siç ka qenë sepse edhe kërkesa për dialogun s’është e atij niveli që ka qenë. Rënia e idesë së kësaj marrëveshjes me Serbinë ku do të përfshiheshin Rusia e faktorë të ndryshëm, po shihet që njëherë ka rënë, bashkë me idenë për dialogun”, ka shtuar ai.

00:12

Aliu akuzon Ahmetin për bllokadë në kohën sa ishin bashkë në Komunë

Në Interaktiv të KTV-së, Liburn Aliu ka folur edhe për çështjen e armës, për të cilën thotë se e ka me leje.

Këto deklarata i ka bërë pasi që Shpend Ahmeti ia përmendi se Aliu ka shkuar në Komunë me armë.

“Askush s’e ka pa. Askush s’e ka ditur a po shkoj apo jo. Le të dalë dikush të thotë se më ka pa. Kur jam bërë drejtor, pas pak kohe kur kam pas punë me prokurorinë për lëndët e dërguara, ka qenë kërkesë që të kemi armë. Meqenëse brenda ishte e lehtë qasja, të takosh në rrugë personin me të cilin ke pas situatë kërcënimi në punë gjatë ditës, të sjell në situatë të pakëndshme”, ka thënë ai. “Është situatë kur së paku mund të ndihesh i frikësuar për jetën e të afërmve tua. Jo që do të merrja drejtësinë në dorë, por kur ke mundësinë të paktën të parandalosh vdekjen e fëmijës tënd, çdokush vepron”, ka thënë më tej ai.

Ai ka thënë se mund të kërkohej edhe mbrojtje e afërt, por “te ne s’ishte fort e mundshme e ishte kjo mundësi tjetër”.

Ai ka treguar se aktualisht nuk e mban armën.

“S’kam situata që mund të ndihem i rrezikuar si në pozitën e drejtorit”, ka thënë ai.

Ai ka akuzuar kreun e Prishtinës, Shpend Ahmeti, për bllokadë edhe në kohën sa ai ka qenë në Vetëvnedosje, si kryetar i Prishtinës.

“Kemi hekë, edhe nga zoti Ahmeti. Siç ankohej Ahmeti nga Avdullah Hoti për bllokadë, unë kam prit 6 muaj për një projekt që lidhet sot me hartën zonale, me databazë. Ishte punë që u bë shumë shpejt, por që ka mundur të dështojë nëse nuk përditësohet apo s’futet në sistem. Kjo s’ka ndodh prej korrikut të vitit 2017 edhe pse është gati. Për atë punë është dashur vazhdimisht t’i shkoj te zyra”, ka thënë Aliu.

Megjithatë ka thënë se në fushën e Urbanizmit, ato që janë bërë në kohën sa ishte ai dhe të tjerët në Komunë, nuk është e lehtë të kthehen prapa.

“Sistemi i kontrollit në dhënien e lejeve, në zbatimin e planeve rregulluese që ishte vendosur kur ishim ne është vështirë të kthehen. Ajo s’është avancuar fare. Duhet të bëhet publike ajo databazë”, ka thënë ai.

23:59

Aliu: Veseli nuk mund të fshihet pas Brovinës për skandalin e fotografisë

Deputeti i Lëvizjes Vetëvendosjes, Liburn Aliu, ka thënë se nuk i beson Kadri Veselit në idenë për themelimin e një Tribunali Ndërkombëtar për gjenocidin e kryer nga Serbia në Kosovë.

Duke sqaruar pse deputetët e Vetëvendosjes, por edhe ata të LDK-së, e lëshuan seancën e sotme kur po diskutohej për këtë ide, Aliu tha se “krimet e Serbisë përgjatë shekullit të kaluar dhe veçmas në luftën e fundit është shumë serioze”.

“Nuk mund të trajtohet në nivelin joserioz çfarë synon ky pushtet. Nëse kemi qenë tolerantë deri tash për diçka, për disa çështje, nuk mund të tolerojmë që të dëmtohen vlerat e luftës”, ka thënë Aliu në Interaktiv të KTV-së.

Ai ka thënë se “skandali që ndodhi me fotografinë e publikuar nga deputetja e PDK-së, Flora Brovina, e ka dëmtuar ligjërimin e fundit për krimet serbe në Kosovë”.

“Kur botërisht filloi të ngrihet sërish diskursi për krimet e luftës në Kosovë, ndodhi skandali për të cilin PDK-ja mundohet ta kalojë kinse nuk ndodhi asgjë. Pushteti fillimisht e orientoi fajin kah Flora Brovina, e më pas vetë thonë mos e linçoni e mos e fajësoni humanisten e të drejtave të njeriut”, ka thënë Aliu, përcjell Koha.net. “Pra qe një përpjekje e Kadri Veselit për distancim personal nga rasti, dhe në të njëjtën kohë përpjekje e pushtetit, e mediave dhe e disave që ta përfshijnë në skandal edhe deputeten Saranda Bogujevci. Deshën ta përqendrojnë sulmin te Flora Brovina e Saranda Bogujevci, vetëm që ta shpëtojnë Kadri Veselin”, ka thënë më tej ai.

Aliu ka kujtuar se deputetja Brovina vazhdimisht ka thënë se posedon fotografi. Prandaj, ai është shprehur i bindur se ppër ekzistencën e tyre ka qenë i informuar patjetër Kadri Veseli.

“Pse nuk janë vërtetuar ato fotografi, ku janë ata thasë me dokumente, e ai sukses i SHIK-ut për të cilat na fliste Veseli”, ka thënë ai.

Sipas tij, Flora Brovina është e fundit që duhet të japë dorëheqje.

“Kadri Veseli duhet të japë dorëheqje, nuk mund të fshihen pas saj. Brovina ka thënë se e ka këtë fotografi prej kohësh, nuk ka mundur ajo që të verifikohet. Pse nuk është verifikuar vërtetësia e saj”, ka thënë ai. “Nëse e shohim Flora Brovinën si deputete ajo vazhdimisht ka qenë lokale ndaj partisë së saj, edhe në vendime që kanë qenë në kundërshtim me qëndrimet e saj”, ka shtuar më tej.

Kësisoj, ai thotë se iniciativa e Veselit për Tribunal është joserioze.

“Po ndodhë në kohën kur po bëhet Gjykata Speciale. Është punë serioze karshi një çështje serioze. Çështjet të tilla duhet të kenë qasje serioze. Ne kemi qenë vazhdimisht të interesuar për të ndjekur krimet serbe. Këta na janë përgjigjur duke na quajtur njerëz të Serbisë e të Rusisë. Paska qenë e kundërta”, ka thënë Aliu.

Nuk ka pasur përgjigje të qartë nëse do ta votojnë në Kuvend këtë ide.

“Po duhet t’i qasemi kësaj çështje, por duhet t’i forcojmë mekanizmat tonë.

Nuk mund të mbyllet instituti për Krime Lufte, sepse nuk punohej. Kjo është deklaratë joserioze. E mbyllëm Institutin, se disa njerëz brenda nuk punofshin. Po pse nuk i ndërruat njerëzit”, ka thënë ai.

Ai ka thënë se seanca për Tribunalin nuk ka kuptim të vazhdojë dhe të ndodhë pa u sqaruar çështja e fotografisë.

“Si iniciativë e morën krye në vete, e tash pasi shpërtheu skandali doli se Kadri Veseli po i thërret shefat e Grupeve Parlamentare për koordinim”, ka thënë Aliu.

23:32

Aliu sheh gjasa reale për rrëzimin e Qeverisë, pret të bashkohen të pakënaqurit nga PAN-i

Liburn Aliu, deputet i Vetëvendosjes, ka thënë se ka mundësi reale që shumë shpejt të fillojë një mocion mosbesimi dhe të rrëzohet Qeveria Haradinaj.

Në Interaktiv të KTV-së ai ka thënë se pret që shumë shpejt të ndërmerren hapat e parë për rrëzimin e Qeverisë, ndërsa ka shtuar se beson që zërat e pakënaqur brenda koalicionit qeverisës do të dalin me votë pro rrëzimit të Qeverisë.

“Ka mundësi reale që të fillojë një mocion. Lëvizja është në një fushatë të themi. Bëjmë tubime nëpër qendra kundër PANhajnisë. Ka gjasa reale që të fillojë mjaft shpejt, këto ditë. detajet nuk i di, por nga ajo që di prej deklaratave, janë të gatshëm edhe PSD-ja të japin nënshkrimet dhe votën për rrëzimet e qeverisë. Ka gjasa që të ndodhë shpejt. Përpjekja për rrëzimin e qeverisë do të sigurojë votat. Duket në sy të parë që Qeveria s’i ka votat për të mbajtur veten, por duhen më shumë se gjysma e deputetëve të votojnë për rrëzim. Ka deputetë të pakënaqur brenda pozitës. Ka zëra të pakënaqur. Po besoj se do të na bashkëngjiten”, ka thënë ai.

Ai ka shtuar se Qeveria Haradinaj duhet të rrëzohet për “mënyrën tejet të rëndë të udhëheqjes e që ka degraduar më keq se qeveritë e shkuara”.

“Nëse thuhej dikur ajo ishte më e keqe se të shkuarat, kjo ka degraduar edhe më shumë”, ka thënë ai teksa ka përmendur marrëveshjen për Kosovën e Re, autostradat e mbipunësimet në Telekom si arsye shtesë për rrëzim të Qeverisë.

© KOHA. Të gjitha të drejtat janë të rezervuara.

Komentet

Shto koment

Të ngjashme