6 perditesime
21:26

Haradinaj – Thaçit: Nëse dikujt i rrezikohet lëkura e tij nuk duhet ta dëmtojë Kosovën

Deputeti i AAK-së, Daut Haradinaj ka shprehur bindjen se presidenti Thaçi nuk ka vullnet për ta dëmtuar Kosovën.

“Por unë nuk mendoj se në rast se dikujt i rrezikohet lëkura duhet ta dëmtojë Kosovën. Kushdo qoftë ai, në çfarëdo përgjegjësie që mund të ndodhet ai”, ka thënë Haradinaj në Rubikon të KTV-së.

Ai ka thënë tutje se përgjegjësi e presidentit të vendit është që t a ruajë Kushtetutën dhe t’i ruajë kufijtë.

“E kisha inkuraju që kështu të shkojë, edhe pse ai e di që është obligim kushtetues”, ka thënë ai.

Haradinaj ka thënë se edhe në ndonjë rast kur privatisht ka rastisur të jetë me presidentin Thaçi ia ka thënë qëndrimin e tij qartë për kufijtë.

21:08

Haradinaj: Rama të merret me problemet në Shqipëri dhe ta ndihmojë aq sa mundet Kosovën

Deputeti i AAK-së, Daut Haradinaj, lidhur me polemikat mes Edi Ramës, kryeministrit Haradinaj dhe çështjes së kufijve, Haradinaj ka thënë se kryeministri i Shqipërisë duhet ta ndihmojë Kosovën dhe po ashtu t’u përkushtohet problemeve brenda Shqipërisë.

“Aq shumë ka probleme në Shqipëri Edi Rama saqë duhet me ju përkushtu atyre dhe duhet me na ndihmu shumë Edi Rama, duhet me na përkrah”, ka thënë Haradinaj.

“Ne nuk guxojmë të kemi konflikte verbale me qeverinë e Shqipërisë, duhet të punojmë bashkarisht, duhet t’i shohim mundësitë e bashkëpunimin shumë më fuqishëm”.

Ai përmendi kontrollin kufitar mes Kosovës dhe Shqipërisë, ku tha se këtu duhet të fokusohen të dy palët, meqë mijëra qytetarë sipas tij, trajtohen sikur janë duke kaluar një shtet tjetër e jo Shqipërinë.

“Duhet të krijohen lehtësira aty, të dy palët duhet të fokusohen më shumë në zgjidhjet e problemeve të qytetarëve”, ka thënë ai.

“Nuk duhet me ra pre e kurtheve të Shqipërisë”.

20:50

Haradinaj: Kosova nuk e ka me urgjencë arritjen e marrëveshjes, Serbia po

Deputeti Daut Haradinaj lidhur me marrëveshjen përfundimtare mes Kosovës dhe Serbisë, ka thënë se Kosova nuk e ka me urgjencë njohjen e Serbisë.

“Kosova nuk duhet mu nxitu se nuk e ka asnjë urgjencë me marrë njohjen e Serbisë ndërsa Serbia e ka shumë. Pse po u dashka ne me kaq urgjencë? Asnjë proces nuk mund ta ndal Serbia, nëse ne jemi unik si faktor politik, nëse ne i kemi raportet e shëndosha me aleatët tonë, Serbia mund ta zgjedh rrugën e Rusisë”, ka thënë Haradinaj në Rubikon të KTV-së.

Haradinaj ka thënë se për këtë duhet ta bindin edhe aleatët ndërkombëtarë që Kosova nuk e ka me urgjencë njohjen.

Sipas tij, vendimi i qeverisë për taksën ishte i drejt dhe si i tillë duhet të vazhdojë.

20:36

Haradinaj i gatshëm ta zhbëjë Specialen

Daut Haradinaj është i gatshëm që të zhbëjë Gjykatën Speciale.

Ai në Rubikon të KTV-së ka thënë që çdo iniciativë e tillë do të ketë votën e tij.

“Veç deri sa të mbërrij prej shtëpisë në Kuvend”, ka thënë ai.

Ndonëse kishin insistuar që të mos votohet, Haradinaj përmendi se atë kohë kishte presione që të bëhej një veprim i tillë. Ai ka thënë se ka qenë kundër edhe atëherë, duke rikujtuar se ajo është një gjykatë etnike kundër shqiptarëve.

“Thoshin do të gjykojë hijet, po e shohim që po thirren të gjitha nivelet e UÇK-në në gjithë Kosovën, madje po thirren disa që kanë qenë në periferi të luftës, që as vet nuk e di se pse po thirren”, ka thënë ai.

20:30

Haradinaj: Presidenti e ka mik Radojçiqin

Sipas deputetit të AAK-së, Daut Haradinaj, është presidenti Hashim Thaçi ai që e ka mik Milan Radojçiqin.

Madje sipas tij, Thaçi e ka takuar atë disa herë.

“Ai e di më mirë se unë. Unë kurrë nuk e kam takuar, nuk e njoh. Ne kemi pasur një koalicion me Listën Serbe dhe roli i tij ka qenë rol me rëndësi brenda Listës Serbe dhe si i tillë është trajtu, asgjë më shumë”, ka thënë Haradinaj në Rubikon të KTV-së.

“Por t’i thuash dikujt jo kontrabanda me Radojiçiqin, nuk i shkojnë për fytyre një presidenti”, ka thënë më tej ai.

Haradinaj ka thënë se nuk mund të di se çfarë marrëdhëniesh ka Thaçi me Radojiçiqin, por ka shprehur sigurinë se ai ka qenë në zyrë të presidentit, bashkë me të tjerë, ku kanë diskutuar tema politike.

20:25

Haradinaj: Të vetëdijesohemi që të mos ua konsumojmë produktet shtetit që na ka vrarë

Daut Haradinaj, në Rubikon të KTV-së, tha se taksa ka ndikuar pozitivisht ekonomikisht e politikisht.

Sipas Haradinajt, taksa tregon se Kosova ka fuqinë t’i tregojë Serbisë e vendeve tjera se mund të punojë për vendin e vet.

Sipas tij, duhet forcuar mekanizmat edhe më tepër.

“Po flitet se në markete ka produkte serbe, ne nuk i kemi ndaluar produktet serbe por i kemi taksuar”, tha ai.

Haradinaj, thotë se taksa nuk do të jetë e përjetshme.

“Shpresoj që ne do të jemi mjaftueshëm të vetëdijshëm që ai shtet që na ka vrarë, të mos ua konsumojmë produktet. Duhet të rrisim fondet tona, cilësinë tonë dhe të përkrahim prodhuesit tanë”, tha Haradinaj.

Haradinaj ka thënë se duan që dialogu të nisë sa më shpejtë, por, jo të hiqet taksa e ky të jetë kusht.

20:07

Haradinaj: E pandershme të luhet me shqiptarët në Luginë

Daut Haradinaj në Rubikon të KTV-së tha se askush nuk duhet dëmtuar Kosovën veç pse i rrezikohet lëkura e vetë.

Këtë Haradinaj e përmendi duke iu referuar idesë për shkëmbimin e territoreve.

“Unë nuk mendoj që presidenti ka vullnet për me dëmtu Kosovën por unë nuk mendoj që nëse dikujt i rrezikohet lëkura duhet më dëmtu Kosovën. Përgjegjësia e presidentit është ta ruaj Kushtetutën, m’i ruajtur kufijtë edhe unë e kisha inkuraju që kështu të shkoj”, tha ai.

Daut Haradinaj, deputet i AAK-së në Kuvendin e Kosovës, në Rubikon të KTV-së ka thënë se presidenti Hashim Thaçi me deklaratat se është për bashkim të Luginës në territorin e Kosovës po luan me ndjenjat e qytetarëve.

Veprimet e fundit karshi kësaj situate, Haradinaj i quajti fiskulltura.

“Është e pandershme me lujt me emocionet e qytetarëve tanë që padrejtësisht janë jashtë Kosovës, në këtë rast në Luginën e Preshevës. Unë bashkëndjej me ta, vijë prej asaj vije që kemi vuajtur për të ardhur liria në Kosovës dhe e di që ata janë qysh ishim ne para 22-23 viteve”, ka thënë ai.

“As ne nuk duhet të ndalemi, qoftë qeveria e Kosovës qoftë ajo e Shqipërisë duhet të bëjnë veprime konkrete për qytetarët tanë në Luginë dhe kjo kësi fiskullturash që më shumë janë manovra që e nxjerrin më shumë një person ose dy, kushdo qofshin ata”, tha ai.