Krasniqi: Koalicioni është stabil, nuk ka hapësirë për zgjedhje

Migrimi i kosovarëve nuk është i njëjtë me atë të vitit 2015, thotë Krasniqi

21 April 2019 14:00
16:46

​Migrimi në Kosovë nuk është tani i njëjtë me atë të vitit 2015. Kështu thotë shef i Grupit Parlamentar të PDK-së, Memli Krasniqi.

Në një intervistë për KosovaPress, Krasniqi thekson se njerëzve duhet t’u krijohet besueshmëri që të mundë të kenë perspektiv në Kosovë.

“Nuk është migrimi i njëjtë sikur në vitin 2015, ku njerëzit në mënyrë masive e kanë lëshuar Kosovën dhe ajo ka qenë me të vërtetë traumatike edhe për neve, kur kemi qenë në pushtet atëherë në qeverisje me LDK-në, kur Isa Mustafa ishte kryeministër. Sot kemi një situatë tjetër, nuk them që është e mirë por është ndryshe. Vendimi i njerëzve për ta lëshuar Kosovën me një vizë të punës është një vendim që nuk e marrin lehtësisht, por nuk është i njëjti me rastet që i kemi pasur”, ka thënë Krasniqi.

Gjithashtu, Krasniqi u përgjigj edhe temës për punësimet e njerëzve të afërt me pushtetarët nëpër institucionet publike. Për këtë, ai thotë se është e dënueshme të punësohen vetëm familjarët dhe militantët e partive, por nuk është edhe ligjore.

Sipas tij, kjo do të vazhdojë derisa qytetarët nuk vetëdijesohen dhe nuk kërkojnë llogari e transparencë më të madhe prej institucioneve dhe partive politike.

“Është e dënueshme të punësohen vetëm familjarët. Nuk është ligjore. Ka ndodh, ndodh edhe sot, si dhe do të ndodhë besoj sikur në secilin vend për aq kohë sa ne nuk vetëdijesohemi. Si qytetarë, nuk kërkojmë prej partive politike dhe përfaqësuesve tonë në Kuvend në institucione një përgjegjësi dhe transparencë më të madhe. Kjo temë nuk duhet të zhduket, duhet të trajtohet në vazhdimësi. Nëse nuk trajtohet në vazhdimësi, presioni rritet, kalon, jam i mendimit që presioni ndaj politikanëve dhe politikës për çështjen e shkeljes të së drejtës së barabartë në punësim duhet me qenë absolut edhe i gjithëkohshëm”, shtoi ai.

Krasniqi mendon se organizatat e shoqërisë civile duhet të monitorojnë më shumë transparencën në ndërmarrjet publike.

Ndërsa i pyetur për problemet me listat e veteranëve të UÇK-së, Krasniqi mendon se një çështje e tillë, e cila lidhet me lirinë e Kosovës, nuk është dashur të vijë në këtë nivel.

“Tashmë kemi një proces hetimor apo gjyqësor për këtë çështje. Unë besoj që ai proces të japë një përgjigje dhe po ashtu secili prej institucioneve dhe prej zyrtarëve që e kanë edhe sot një përgjegjësi të tillë, duhet ta zbatojnë këtë përgjegjësi gjithsesi në bashkëpunim edhe me shoqatat e dala nga lufta. Për këtë proces nuk ka zyrtar partiak, ky ka qenë proces ku janë ftuar dhe kanë marrë pjesë njerëzit që e kanë udhëheq luftën në Kosovë, vendimet për të qenë në PDK, AAK ose në një parti janë vendime që i kanë marrë pasi ka përfunduar lufta, por ky proces ka të bëjë me periudhën e luftës, dhe në këtë kuadër besoj duhet të bëhet një siguri, ta kemi një siguri që lista finale e njerëzve të cilët duhet me marrë kompensimin e drejtë të jetë e vërtetë”, thotë ai.

Sipas tij, duhet të ketë drejtësi në kuptimin e verifikimit se kush janë njerëzit përgjegjës për ato lista.

14:00

Krasniqi: Koalicioni është stabil, nuk ka hapësirë për zgjedhje

Shefi i grupit parlamentar të Partisë Demokratike të Kosovës, Memli Krasniqi thotë se koalicioni qeveritar është stabil dhe sivjet nuk ka hapësirë për zgjedhje të jashtëzakonshme.

Deputeti Memli Krasniqi thotë nuk kanë vije të kuqe për askënd, por që nuk preferojnë koalicion me të gjitha partitë në Kosovë. Krasniqi thotë dëshirojnë koalicion me partitë që kanë një përafrim ideologji me PDK-në.

Në një intervistë për KosovaPress, shefi i deputetëve të PDK-së thotë se nuk mund të parashikojnë se çka mund të ndodh vitin e ardhshëm, por që sivjet nuk ka hapësirë për zgjedhje.

Sipas tij, koalicioni qeveritar është stabil.

“Personalisht nuk besoj që ka zgjedhje as ka hapësirë për të pasur zgjedhje në këtë vit. Janë më pak se dy vite që ne kemi përfunduar zgjedhjet parlamentare dhe po ashtu gati dy vite prej zgjedhjeve lokale, është shumë me rëndësi që edhe si vend të kalojmë në një stad ku respektojmë këto orare të rregullta kushtetuese dhe ligjore sa i përket zgjedhjeve. Por nëse mund të them kështu, në të ardhmen e parashikueshme nuk besoj që ka hapësirë për ta pasur zgjedhje sepse koalicioni qeveritar është stabil”, thotë ai.

Sipas Krasniqit, partnerët e koalicionit po e zbatojnë programin qeverisës dhe se stabiliteti mbi të gjitha bazohet në atë marrëveshje.

Krasniqi thotë se është krejt normale që në një koalicion ku ka disa partnerë, të ketë mendime të ndryshme, por sipas tij, ato nuk nënkuptojnë mospajtime.

I pyetur se a ka PDK vije të kuqe për ndonjë parti, Krasniqi thotë se nuk kanë, por që nuk preferojnë koalicion me të gjitha partitë.

Ai thotë se të gjithë në fund bëjnë koalicion me PDK-në, ani pse vazhdimisht thonë se kanë vija të kuqe.

“Për ne kanë pas vija të kuqe krejt, por krejt në fund vinë në koalicion me PDK-në, kjo ka me i përcjell edhe në të ardhmen normalisht. Vetëm ne nuk kemi vija të kuqe për askënd, sepse duhet të marrim parasysh këtë kontekst në të cilin jetojmë dhe këtë rregullim politik të cilin e kemi krijuar, kushdo që del, garon në zgjedhje, dhe merr një mandat qytetar dhe merr besimin e qytetarëve të Kosovës ai e ka legjitimitetin e vet. Nëse ne në një moment mund të pajtohemi për të pasur qeverisje të përbashkët, mund ta arrijmë një gjë të tillë, nëse nuk pajtohemi është krejtësisht e natyrshme që të ketë alternativa. Nuk preferojmë me të gjitha partitë me partitë me pas koalicion”, thotë ai.

Krasniqi shton se preferojnë që të koalicionet me PDK-në të jenë vetëm me partitë që kanë një përafrim ideologjik.

Komentet

Shto koment

Të ngjashme