Seanca e jashtëzakonshme e thirrur për nesër në orën 10:30 për miratimin e një rezolute për pezullimin e aktivitetit të kazinove dhe lojërave të fatit, si dhe plotësim-ndryshimin e ligjit ekzistues duket se nuk do të zgjasë shumë.

Deputetja Haxhiu në Rubikon të KTV-së tha se sipas informacioneve që ka, tashmë ka një marrëveshje që në seancë të mos ketë debat dhe të votohet në shpejtësi rezoluta.

“Unë dëgjova që edhe mos me pas debat, mu votu shpejt e shpejt një rezolutë sepse nuk po donë me fol”, ka thënë Haxhiu.

Ajo e drejtoi gishtin kah Aleanca për Ardhmërinë e Kosovës duke thënë se me një kërkim të thjeshtë në ‘Google’ shihet se nën udhëheqjen e kujt janë.

Kadrijaj duke e kundërshtuar deputeten e VV-së, e ftoi që të publikoi cdo gjë që e vërteton një gjë të tillë.

Haxhiu – Kadrijajt: Respekt për kohën e luftës, për të pas luftës më vjen keq

Albulena Haxhiu, deputete e Vetëvendosjes, në Rubikon të KTV-së ka thënë se përveç punësimeve, deputetët e PAN-it po e shkelin Kodin Penal me deklaratat e tyre.

“Unë jam më së shumti e shqetësuar me egoizmin e tyre”, ka thënë ajo.

“Unë isha ndjerë keq nëse sot kisha vjedh, kisha vepruar si ju. Qeveria Haradinaj është qeveri e korruptuar, pikë”, shtoi tutje Haxhiu.

“Respekt për kohën e luftës, për të pas luftës më vjen keq”, i tha Haxhiu - Kadrijajt.

Mirëpo, deputetja e AAK-së i tha se ky sistem është instaluar pas lufta dhe jo nga qeveria aktuale.

“Nuk mund të themi se ky sistem nuk është i instaluar, ky është i instaluar mirëpo është instaluar pas luftës”, ka thënë ajo.

“500 veta me kontrata mbi vepër i keni punësuar në Komunën e Prishtinës”, i tha Kadrijaj Haxhiut.

Haxhiu arsyeton punësimet në Komunën e Prishtinës në kohën e Vetëvendosjes

Deputetja Kadrijaj në vazhdën e debatit rreth punësimeve partiake në institucione shtetërore ka akuzuar deputeten e Vetëvendosjes, Albulena Haxhiu, për punësimet partiake në Komunën e Prishtinës.

Haxhiu i tha se personat të cilat i përmend Kadrijaj kanë qenë pjesë e drejtorisë së Urbanizmit dhe Legalizimit.

Sipas saj, ata ishin të angazhuar në periudhë të caktuar meqë siç theksoi ajo kishin të bëjnë me “mafinë e ndërtimit”.

“Kanë qenë drejtoritë që janë përballur me mafinë e ndërtimeve dhe kanë punuar prej 3 muaj deri në 6 muaj. Edhe ligji e lejon që për punë specifike të angazhosh person të caktuar”, ka thënë ajo.

Deputetja e AAK-së thotë se punësimet partiake e familjare janë praktikë e partive në pushtet

Punësimet partiake dhe familjare në institucionet shtetërore po arsyetohen nga vetë përfaqësuesit e partisë në pushtet.

Time Kadrijaj, deputete e partisë së kryeministrit Ramush Haradinaj, AAK, thotë se punësimi i familjarëve apo partiakëve tashmë është praktikë e partive në pushtet dhe madje sipas saj, Aleanca po e bën këtë në masë tejet të vogël karshi asaj çfarë ndodhi me vite.

Vetëm 1 për qind në nivel qendror, thotë Kadrijaj, të jenë të punësuar nga Aleanca.

“Merrni studioni të gjitha Ministritë dhe keni me pa çfarë shifrash keni me dal. Në njëfarë studimi që e kishin bërë organizata Çohu, aty dalin goxha do statistika të mira se kush ka punësu e kush jo”, ka thënë ajo në Rubikon të KTV-së.

“Le të hulumtohen prej 20 vitesh kush kënd e ka punësuar dhe ka me dal që Aleanca ka punësu më së paku”, ka shtuar më tej ajo.

Gazetarja e KTV-së, Ardiana Thaçi Mehmeti e cila ka filluar publikimin e punësimeve në institucionet shtetërore bëri të ditur se në Telekomin e Kosovës, 50 për qind e të punësuarve të rinj janë të Aleancës për të vazhduar me partitë tjera.

“Për mua si një qytetare, për familjarët dhe të gjithë ata që presin një vend pune është dëshpëruese. Unë i kam dy fëmijë dhe të tretin po e pres dhe jam duke e shqyrtuar nëse do të rri në këtë vend ku AAK-ja e merr shumë normale punësimin e tillë”, ka thënë ai.

“Janë edhe 30 për qind e popullatës të pa punësuar, ndoshta 20 prej tyre nuk janë pjesë e asnjë partie politike. Gabimi më i madh që mund ta bëjë një institucion është kontrata mbi vepër”, ka thënë ajo.

Deputetja Kadrijaj akuzoi edhe deputeten e Vetëvendosjes, Albulena Haxhiun për punësimin e vëllait të saj në Postë.

Mirëpo, Haxhiu, i tha se vëllai ishte punësuar para 10 viteve dhe nuk është e as nuk ishte pjesë e asnjë partie politike.

“Para 10 vjetësh është punësuar vëllai im në Postë. Askund s’ka qenë dhe as tash nuk është në parti. Nuk është as në Vetëvendosje”, ka thënë Haxhiu.