Ahmeti: S’kemi biseduar për bashkëqeverisje, askush s’e ka përkrahjen tonë për ta rrëzuar kryeministrin për taksën Foto: Koha

Ahmeti: S’kemi biseduar për bashkëqeverisje, askush s’e ka përkrahjen tonë për ta rrëzuar kryeministrin për taksën

19 shkurt 2019 12:50

Kryetari i PSD-së, Shpend Ahmeti, ka mohuar zërat se ka pasur diskutime për përfshirjen e partisë së tij në një qeveri të re pa zgjedhje.

Sipas tij, s’ka pasur asnjë takim apo diskutim lidhur me këtë, ndërsa ka shtuar se vazhdon ta mbështesë qeverinë lidhur me taksën.

Ahmeti ka deklaruar se iu ka thënë dy partive opozitare LDK-së e VV-së se nuk do të ndihmojnë Listën Serbe për rrëzimin e Qeverisë për shkak të taksës, ndërsa me të njëjtin mesazh i është drejtuar edhe PDK-së.

“Po lexoj nëpër media se analistët po thonë se e parashikojnë prishjen e koalicionit, dhe qeveri të re (pa zgjedhje) me LDK dhe PSD. Përderisa për LDK-në nuk mund të flas, sa i përket PSD-së, mund të konfirmoj se nuk ka pas as edhe një takim apo diskutim për këtë gjë. Ne kemi dhënë dhe vazhdojmë të japim mbështetje politike për taksën dhe jemi pjesë e delegacionit shtetëror për dialogun. I kemi thënë edhe LDK-së e VV-së, se nuk do ta ndihmojmë Listën Serbe për ta rrëzuar Qeverinë për shkak të taksës. Tani i themi edhe PDK-së se me ndihmën tonë nuk do ta rrëzojnë e as kërcënojnë AAK-në - si presion ndaj Kryeministrit për ta larguar taksën”, ka shkruar ai në një postim në Facebook.

Ahmeti më tej ka thënë për taksën duhet të merret vendim i përbashkët, “ku edhe presionin edhe kritikat do t’i bartim bashkë”.

“Taksa është e drejtë dhe është vendimi i parë pas të gjitha sulmeve që ka bërë Serbia ndaj nesh. Ne jemi të interesuar të dialogojmë me Serbinë sipas platformës që kemi aprovuar, por Qeveria ka të drejtë të merr vendime për ta mbrojtur interesin e shtetit tonë. Dialogu me Serbinë është çështje tejet e rëndësishme për Republikën e Kosovës, si në aktualitet ashtu edhe në potencialitet. Prandaj, vendimet për të duhet të synojnë përherë koncensualitet dhe të përfshijnë të gjithë ata që janë të interesuar ta ndihmojnë Kosovën. Protagonizmi e personalizimi i këtij procesi as nuk është i mundshëm dhe do të ishte tejet i dëmshëm”, ka shtuar Ahmeti.

© KOHA. Të gjitha të drejtat janë të rezervuara.

Komentet

Shto koment

Të ngjashme