Veseli e quan ditë jo të mirë për Kosovën, “Policia e Kosovës mbetet më e mira në rajon”

Veseli e quan ditë jo të mirë për Kosovën, “Policia e Kosovës mbetet më e mira në rajon”

20 November 2018 13:10

Kryeparlamentari i Kosovës, Kadri Veseli, pas dështimit për anëtarësim në Interpol, ka lavdëruar Policinë e Kosovës për profesionalizmin e dëshmuar që e ka bërë shtetin tonë partner të besueshëm dhe efektiv në luftën kundër krimit të organizuar ndërkombëtar dhe në veçanti kundër terrorizmit, ka shtuar se ne nuk do të dekurajohemi në rrugën e qëllimeve tona integruese.

Në postimin e tij përmes Facebook, Vesli ka shkruar:

Sot nuk ishte ditë e mirë për Kosovën. Por, më i fuqishëm se fakti i mosanëtarësimit në Interpol është fakti se as Serbia me politikën e saj të pengimit ndërkombëtar të Kosovës, as krimi i organizuar, e as terrorizmi, nuk do të mund ta ndalin fuqizimin e shtetit të Kosovë dhe integrimin ndërkombëtar të tij.

Kosova krenohet me policinë e saj. Është policia më profesionale në rajon dhe më gjerë. Me profesionalizmin e saj të dëshmuar, Policia e Kosovës e ka bërë shtetin tonë partner të besueshëm dhe efektiv në luftën kundër krimit të organizuar ndërkombëtar dhe në veçanti kundër terrorizmit.

Vota e sotme negative ka dëmtuar qartësisht partneritetin ndërkombëtar kundër këtyre të këqijave.

Por, përkundër kësaj, ne nuk do të dekurajohemi në rrugën e qëllimeve tona integruese. Do të punojmë pa u ndalur dhe pa u dorëzuar asnjëherë. Ashtu siç kemi bërë gjithmonë edhe me sfidat e të kaluarës.

Në këtë kontekst, do të ishte mirë dhe patriotike sigurisht që partitë opozitare, në vend që të bashkëndjejnë me Serbinë gëzimin për mosanëtarësimin e Kosovës në Interpol, e t’i fërkojnë duart për pushtet, t’i thërrasin arsyes dhe të gjejnë forcën e duhur për t’iu bashkuar institucioneve të vendit në përballje të përbashkët me sfidat që kemi përpara si shtet e shoqëri.

Nxitja e përçarjes së brendshme, politikat egoiste dhe bllokuese janë qartësisht dëmtim i Kosovës dhe i ndihmojnë fuqizimit të pozicionit ndërkombëtar të Serbisë në raport me Kosovën. Kjo sjellje politike duhet të marrë fund. Sa nuk është bërë vonë, për të gjithë! – thuhet në postimin e Veselit.

© KOHA. Të gjitha të drejtat janë të rezervuara.

Komentet

Prishtinaliu21/11/2018 13:05

Veç shikone se çfare njerez analfabeta e mbi te gjitha ja bejne rrafsh vetes, deshtime mas deshtimeve edhe prap dalin e thojne Policia Kosoves ma e mira ne rajon. Kjo eshte tmerr, por edhe populli eshte i tille, edhe them se nuk meriton ma mire ky popull derisa i zgjedh keta analfabeta(hajna). Me qene te mire, e me pas keta moral, ish desht me dhene doreheqje. Kan thane te vjetrit "Qeni keq ta sjell Ujkun ne torisht".

Shto koment

Të ngjashme