Osmani: Deputetët e PDK-së janë në kthetra të Thaçit

Osmani nuk përjashton mundësinë e kandidimit për kryetare të LDK-së

06 November 2018 23:33
23:55

Duke folur për zgjedhjet e brendshme në LDK që do të mbahen gjatë vitit 2019, deputetja Vjosa Osmani nuk e ka përjashtuar mundësinë e kandidimit për postin e të parit të partisë.

Në “Interaktiv” ajo ka thënë se më e rëndësishme është që të jetë garë e ndershme dhe të mos linçohet asnjë anëtar i LDK-së, por secili të japë kontributin e vet. Vendimin për të kandiduar apo jo për postin e kryetarit ajo ka thënë se do ta bëjë publik gjatë vitit të ardhshëm.

“Zgjedhjet janë në vitin e ardhshëm, kam synim që të jetë garë fer, të respektohet statuti i LDK-së, synoj që të mos linçohet askush, por secili të jap kontributin e vet. Gjitha gjeneratat duhet të bashkëpunojnë. Për këtë çështje do të kem përgjigje vitin e ardhshëm”, ka thënë Osmani.

23:35

Osmani: Haradinaj me katër vota mund të parandalojë copëtimin e Kosovës

Deputetja e LDK-së, Vjosa Osmani ka thënë se mandati i qeverisës së Ramush Haradinajt mund të vuloset nëse lejon apo parandalon copëtimin e Kosovës me idenë e presidentit Hashim Thaçi për shkëmbim territoresh me Serbinë.

Në emisionin “Interaktiv” të KTV-së, deputetja ka thënë se Haradinaj me katër vota mund të vendos kundër planit për copëtimin e Kosovës që ka ekzistuar me dekada.

“Ky mandat do të vuloset nëse kjo qeveri ka lejuar apo parandaluar cotpimin e Kosovës. Me katër vota Haradinaj mund ta parandalojë copëtimin e Kosovës, plan që ka ekzistuar që prej viteve 90. Për çka mbetën 13 mijë të vrarë, 20 mijë gra të dhunuara, 1700 persona të zhdukur, për çka është bërë lufta kur plane të tilla është kundërshtuar kur kemi qenë të rrezikuar që të shfarosemi si popull. Në kohë të Millosheviqit e kemi kundërshtuar copëtimin e Kosovës, kurse sot po e heshtim për shkak të mundësive për pushtet”, ka thënë Osmani.

23:33

Osmani: Deputetët e PDK-së janë në kthetra të Thaçit

Deputetja e Lidhjes Demokratike, Vjosa Osmani, në emisionin “Interaktiv” të KTV-së, fajin për dështimin e rezolutës së opozitës kundër presidentit Hashim Thaçi për shkëmbim territoresh, ia ka hedhur deputetëve të pozitës që nuk morën pjesë në seancë gjatë votimit.

Osmani ka thënë se deputetët e PDK-së janë në kthetrat e presidentit Thaçi dhe për këtë shkak ata po mbrojnë interesat e tij, derisa ka thënë se AAK-ja dhe Nisma po i frikësohen kërcënimeve të PDK-së për dalje nga qeveria nëse votojnë propozimet e opozitës.

“Për shkak se PDK-ja është në kthetrat e Thaçit, ai temën e kufijve e hapi për hallin e tij personal. Deputetët janë në presionin e tij dhe i mbrojnë qëndrimet e tij. Sa i përket AAK-së dhe Nismës, ata shprehën gatishmëri [për votimin e rezolutës], por na kanë bërë të qartë që nëse nuk voton PDK-ja, nuk do ta votojnë as ata”, ka thënë deputetja Osmani që ka shtuar se është në rrezik shtetësia e Kosovës nëse bisedohet për shkëmbim territoresh me Serbinë.

“Nuk është problemi heqja e një cope territori, është problemi i rrëzimit të fondamentit të shtetësisë së Kosovës. Prej deklaratës së pavarësisë, kushtetutës dhe opinionit e GJND-së, e kanë konfirmuar statusin e Kosovës me këta kufij”, ka thënë ajo.

Duke mos dashur të flasë me emra, deputetja Osmani ka thënë se zyrtarë të lartë të qeverisë i kanë njoftuar për kërcënimet që u ka bërë presidenti Thaçi nëse ata bëhen bashkë në iniciativat e opozitës pa pajtimin e PDK-së.

“Nuk do të flas me emra, por ka zyrtarë të lartë që na njoftojnë se janë të kërcënuar nga vetë presidenti që nëse bëhen bashkë me opozitën pa pajtimin e PDK-së atëherë do t’i largojë këta deputetë nga pushteti”, ka thënë Osmani.

“Pavarësisht kërcënimeve të tilla dhe duke ditur pasojat nëse plani i tij shkon përpara, askush nga ne nuk duhet të mendoj për veten, por për shtetin e tij, të ardhmen e gjeneratave të ardhshme”, ka shtuar deputetja e LDK-së.

Deputetja e LDK-së ka thënë se tema e shkëmbimit të territoreve është përhapur nga Thaçi me idenë që ndarja e Kosovës të bëhet proces më normal. Ajo ka kritikuar Thaçin për përfshirjen e shqiptarëve të Luginës së Preshevës në këtë proces dhe e ka quajtur naive bashkimin e Kosovës Lindore.

“Tema e shkëmbimit është përhapur për ta bërë normale ndarjen e Kosovës. Ai i ka përfshirë shqiptarët e Luginës të cilët nuk i ka vizituar asnjëherë sa ishte kryeministër dhe tani president dhe tani të presim nga ky njeri se do ta bashkojë Kosovën me atë anë, është naivitet”, ka thënë Osmani.

© KOHA. Të gjitha të drejtat janë të rezervuara.

Komentet

Shto koment

Të ngjashme