Konfirmohet sulmi i vëllait të presidentit Thaçi ndaj dy personave në Byronë e Sigurimeve Foto: Koha

Thaçi dhe shoferi i tij përfundimisht mbrohen në liri

24 October 2018 14:09
19:24

Prokurori i rastit, Ali Ajdini, ka konfirmuar për Kohën Ditore se Gani Thaçi dhe shoferi i tij do të mbrohen në procedurë të rregullt.

17:48

Vëllai i Presidentit dhe shoferi i tij pritet të mbrohen në liri

Gani Thaçi, vëllai i presidentit Hashim Thaçi, si dhe shoferi i tij, janë të dyshuarit për sulmin që ndodhi sot në Byronë Kosovare të Sigurimeve.

Ata po dyshohet se kanë sulmuar fizikisht shefin e kësaj Byroje, Blerim Pushkollin, drejtorin e kompanisë private të sigurimeve “Illyria”, Gianni Sokolic, raporton “Koha Ditore”.

Të gjithë aktualisht janë duke u marrë në pyetje nga prokurori Ali Ajdini.

Megjithatë, në një prononcim për gazetë, prokurori përgjegjës për komunikim me Media në Prokurorinë Themelore të Prishtinës, Ibrahim Berisha, ka thënë se Gani Thaçi dhe shoferi i tij po dyshohen për veprën penale të sulmit.

Motivi, sipas tij, nuk dihet ende, por se përleshja ka filluar pas një mosmarrëveshje rreth punës në këtë byro.

Bazuar në praktikat që i kanë ndjekur deri më tani, Berisha ka thënë se për një vepër të tillë penale, prokuroria të dyshuarit i lejon të mbrohen në procedurë të rregullt, që nënkupton se edhe në këtë rast pritet t’u caktohet masa e mbrojtjes në liri. /D.N/

Ndërkohë ka reaguar edhe presidenti Hashim Thaçi.

Ai thotë se është njoftuar për këtë rast, të cilin e quan “përleshje sporadike fizike”.

“Asnjëherë nuk do ta arsyetoj asnjë veprim të kundërligjshëm të askujt, aq më tepër në një rast si ky. Të qenit familjar i një zyrtari të lartë nuk nënkupton imunitet dhe amnisti për askënd. Përkundrazi. Përgjegjësia është individuale”, ka thënë Thaçi.

Tutje ai u ka bërë thirrje organeve të rendit që ta trajtojnë rastin në përputhje me ligjin.

“Vetëm kështu ndërtojmë shtet ligjor, në të cilin të gjithë jemi të barabartë para ligjit dhe drejtësisë”, përfundoi Thaçi.

15:58

Prokuroria merr në pyetje vëllanë e Thaçit dhe dy të tjerët

Pas policisë, prokuroria ka filluar t`i marrë në pyetje Gani Thaçin, vëllanë e presidentit Hashim Thaçi, si dhe shefin e Byrosë Kosovare të Sigurimeve, Blerim Pushkollin e drejtorin e kompanisë private të sigurimeve “Illyria”, Gani Sokolic.

Në një prononcim për “Kohën Ditore”, prokurori Ali Ajdini ka thënë se aktualisht është duke e kryer intervistimin. Ka thënë se për detajet e këtij rasti, mund të prononcohet për media pas një ore.

15:14

Policia konfirmon sulmin e vëllait të presidentit Thaçi ndaj dy personave

Policia e Kosovës duke mos identifikuar emrat e aktorëve të përleshjeve dhe as detaje tjera, ka konfirmuar se ka ndodhur një përleshje fizike mes tre personave në rrugën “Lidhja e Pejës” në të cilën ndodhet Byroja Kosovare e Sigurimeve.

Përmes një komunikate Policia ka bërë të ditur se përleshja ka ndodhur rreth orës 12:00 ndërsa nuk ka treguar nëse ka të arrestuar për këtë përleshje.

“Sot rreth orës 12:00, policia ka marrë informacionin se në rrugën Lidhja e Pejës, në Prishtinë, ka ndodhur një përleshje fizike mes tre personave. Menjëherë pas marrjes së këtij informacioni në vendin e ngjarjes kanë dalë të gjitha njesitet e nevojshme policore te cilat konform rekmandimeve te prokurorit te shtetit i cili po ashtu ka dale ne vendin e ngjarjes, po ndermarin veprimet e metutjeshme hetimore e procedurale”, thuhet në njoftimin e PK-së.

14:09

Konfirmohet sulmi i vëllait të presidentit Thaçi ndaj dy personave në Byronë e Sigurimeve

Prokurori Ali Ajdini, në një prononcim për “Kohën Ditore” ka konfirmuar se është duke u marrë me rastin e vëllait të presidentit Hashim Thaçi.

Ka thënë se aktualisht është duke shkuar në vend të ngjarjes dhe ka kërkuar që për detaje të kontaktohet pasi të kryejë ekzaminimin.

Gani Thaçi, vëllai i presidentit Hashim Thaçi dyshohet se ka sulmuar fizikisht shefin e Byrosë Kosovare të Sigurimeve, Blerim Pushkollin, dhe një drejtor të një kompanie private të sigurimeve.

Burime të Kohës, thonë se sulmi ka ndodhur në një mbledhje që kishte kjo Byro.

© KOHA. Të gjitha të drejtat janë të rezervuara.

Komentet

Kemi 29/05/2019 10:01

Shum vështir është me i dhën përgjigje këtyre veseve të kçija që po ndodhin jo rrall me këta njerz.Edukata në nivel nën XERO,trimëria në Qiell Friga ndaJ Ligjit nën XERO çka të themi tjeter!?!..

Doriani25/10/2018 12:06

Cka ti themi kesaj! Drejtor, truproje, bokser app kasap. Cka po ndodhe keshtu me familjaret e figuravE publike e shteterore. A eshte kjo EDUKATE FAMILJARE.

Shto koment

Të ngjashme